Gilbert Perdez

Kakasuhan din ng Manila Police District o MPD ang anim na miyembro ng isang sorority na konektado sa Aegis Juris Fraternity na siyang idinadawit sa pagkamatay ng hazing victim na si University of Santo Tomas o UST Law student Horacio “Atio” Castillo III.

Ayon kay MPD Director Chief Supt. Joel Napoleon Coronel, ang mga hindi pinangalanang kasapi ng Regina Legis Et Juris Sorority ay kasama sa inisyal na listahan ng mga suspek na nakatakda nilang kasuhan sa Department of Justice o DOJ.

Una nang sinampahan ng kasong murder, robbery, obstruction of justice, perjury at paglabag sa anti-hazing law ang 19 na respondents, kabilang ang primary suspect na si John Paul Solano at iba pang Aegis Juris frat men.

—-

Wawalisin na ng lokal na pamahalaan ng Maynila ang mga tindahan ng pagkain na tinaguriang ‘Hepa Lane’ sa mga kalye ng ‘University Belt’.

Ito’y matapos matuklasan sa ikinasang sorpresang inspeksiyon ng Manila Sanitation Division ang tunay na kalagayan ng mga tindahan na nasa kariton lang at nakahilera sa kahabaan ng R. Papa mula sa Morayta sa nabanggit na lungsod.

Pinuna naman na naka-sando lamang ang ilang tindero habang walang takip at naka-tiwangwang ang mga ibinebentang pagkain sa lugar na paboritong kainan ng mga estudyante.

Maliban dito, sa gilid lamang din ng kalye niluluto ang mga pagkain at hindi din masiguro kung malinis ang lalagyan ng tubig.

Bunga nito, muling nagpaalala sa publiko ang mga awtoridad na huwag basta magtiwala sa murang presyo ng karne o pagkain posibleng hindi ito ligtas kainin.

_____

Hinding-hindi manggagaling sa Armed Forces of the Philippines o AFP ang mga napapabalitang tangkang destabilisasyon laban kay Pangulong Rodrigo Duterte.

Ayon kay AFP Spokesman Major General Restituto Padilla, malabong mga sundalo ang magsasagawa ng destabilisasyon laban sa Pangulo dahil alagang-alaga nito ang militar.

Giit ni Padilla, damang-dama ng AFP na mayroon silang Commander-in-Chief na may tunay na malasakit sa mga kawal ng bayan.

Nagpasalamat naman ang AFP kay Pangulong Duterte kaugnay sa pangako nitong doblehin ang sahod ng mga sundalo, bukod pa sa mga karagdagang kagamitan sa kanilang operasyon laban sa mga kalaban ng pamahalaan.

_____