Gilbert Perdez

Ipinagmalaki ng Philippine Charity Sweepstakes Office o PCSO na nahigitan nito ang P60-billion target sales para sa taong 2018 habang pinalalakas nito ang giyera laban sa illegal gambling sa bansa.

Ayon sa datos ng gaming, product development and marketing sector na pinamumunuan ni Assistant General Manager Arnel Casas, kumita ang PCSO ng higit sa P63.5 billion noong nakaraang taon.

Pahayag ni Casas, tumabo ang small-town lottery ng P26 billion gross sales na mas malaki kumpara sa P4.7 billion hanggang P5 billion sa kaparehong panahon noong 2017.

Magugunitang nagpalabas ng executive order no. 13 si Pangulong Rodrigo Duterte noong Feb. 2, 2017 kung saan pinalalakas nito ang kampanya laban sa iligal na sugal.

Nilinaw ng isang opisyal ng Commission on Elections (Comelec) na maaari pa ring tumakbo sa hahalan sa Mayo si Daraga, Albay Mayor Carlwyn Baldo kahit sinampahan na ito ng kasong murder.

Ayon kay Comelec spokesperson James Jimenez, wala itong epekto sa kandidatura ni Baldo dahil hindi pwedeng i-disqualify ang isang kandidato batay lamang sa isang criminal complaint.

Aniya, maaari lamang idiskwalipika ang kandidatura ng isang kandidato kapag na-convict na sa isang kaso at nagkaroon na ng ‘finality’ ang desisyon ng Korte.

Magugunitang isinangkot ng Philippine National Police si Baldo bilang utak sa pagpatay kay AKO BICOL Partylist Rep. Rodel Batocabe at sa kanyang security escort na si SPO2 Orlando Diaz noong Disyembre 22 ng nakaraang taon.

Mas maraming scholarship slots ang alok ngayon ng Taipei Economic and Cultural Office in Manila (TECO) para sa mga Pilipino na gustong kumuha ng degree studies o Mandarin language program sa Taiwan.

Ayon sa TECO, ang hakbang ay ginawa ng Ministry of Education bunsod ng ‘popular demand’ at positibong tugon ng mga Filipino students noong nakaraang taon.

Dahil dito, umaasa si Taiwan Representative to the Philippines Michael Peiyung Hsu na sasamantalahin ng mas marami pang Pinoy ang pagkakataong makapag-aral at makapunta ng Taiwan.

Paliwanag ni Hsu, maituturing na ‘best location’ ang kanilang bansa para sa mga Pinoy na gustong kumuha ng mas mataas na edukasyon.

Simula nitong Enero 1 hanggang Marso 16, 2019 ay tatanggap ang TECO ng aplikasyon para sa International Cooperation and Development Fund.

Posibleng bumungad sa mga motorista sa susunod na taon ang toll fee hike ng North Luzon Expressway (NLEX) at South Luzon Expressway (SLEX).

Ito’y makaraang ihayag ng Toll Regulatory Board na pinag-aaralan na nila kung aaprubahan ang hirit na 21 porsiyentong singil sa toll ng NLEX.

Sinasabing tatlong beses nang nabinbin simula noong 2012 ang petisyon ng Metro Pacific Tollways Corporation bunsod ng nilagdaang kontrata ng kompanya sa gobyerno na nagsasaad na maaari lamang itong magtaas-singil kada dalawang taon.

Subalit paliwanag ni TRB consultant Bert Suansing, kapag naaprubahan, mula P45 ay magiging P54 ang singil sa mga sasakyang daraan mula Balintawak sa Quezon City hanggang Bulacan.

Kasabay nito, nag-abiso rin ang pamunuan ng SLEX para sa hiwalay nilang hirit na taas-singil.

Sa kabila nito, tiniyak ng TRB na kung maaaprubahan ito, hindi isang bagsakan ang toll hike at maaaring utay-utayin ang dagdag-singil para hindi maging mabigat sa mga motorista.

Sinusuri nang maigi ng Malacañang ang ipinalabas na travel advisory ng United States Department of Homeland Security kaugnay ng umano’y mahinang security measures na ipinatutupad sa Ninoy Aquino International Airport (NAIA).

Ayon kay Presidential Spokesperson Salvador Panelo, isa sa mga pinagtutuunan ng pansin ng pamahalaan ay ang kaligtasan ng mga mananakay sa gitna ng banta ng terorismo.

Giit ni Panelo, iku-konsidera ng gobyerno ang rekomendasyon ng Estados Unidos sa usapin ng seguridad sa mga paliparan sa pamamagitan ng paggamit ng mga global partners, kabilang na ang International Civil Aviation Organization.

Nakatutok din aniya ang Department of Transportation, Manila International Airport Authority at Office for Transportation Security sa pagpapatupad ng mahigpit na security measures sa NAIA.

Gayunman, aminado si Panelo na medyo matatagalan pa ang pagbili ng mga x-ray machines, walk-through metal detectors, alarm systems at iba pa na siyang inirekomenda ng Amerika na dapat gawin ng Pilipinas.