Patay ang 17 katao matapos pagtatagain ng mga rebelde sa magkahiwalay na insidente sa Democratic Republic of the Congo.
Unang umatake ang mga salarin sa Kolokoko area sa lungsod ng Oicha kung saan 3 ang kanilang pinugutan.
Kasunod nito, 14 naman ang pinagpapatay ng mga rebelde sa kanlurang bahagi ng Mantumbi.
Sinasabing kagagawan ito ng mga miyembro ng Allied Democratic Forces, isang armadong grupo na responsable sa sunod-sunod na masaker noong nakaraang buwan.
Patay ang 19 katao habang sugatan ang 70 iba pa matapos pagbabarilin at pagsasaksakin ng mga armadong lalaki ang mga raliyista sa Baghdad, Iraq.
Sinasabing ito na ang pinakamadugong pag-atake na naitala sa Tahrir Square na siyang main protest camp sa lugar.
Maliban dito, napaulat din na sinunog ng mga hindi pa nakikilalang salarin ang ilang gusali.
Mahigit na 400 demonstrador na umano ang namatay habang higit 20,000 ang nasugatan mula nang sumiklab ang anti-government demonstrations noong Oktubre 1.
Mahigit 700 pamilya ang lumikas sa mga barangay halls, public schools at covered courts na may modular tents sa Muntinlupa City dahil sa bagyong ‘Tisoy’.
Ayon kay City Mayor Jimmy Fresnedi, patuloy nilang mino-monitor ang sitwasyon at nagsasagawa ng response strategies, evacuation system, coordination protocol, at pamamahagi ng food items sa mga evacuation centers sa tulong na rin ng city disaster council members.
Matatandaang ipinag-utos ni Fresnedi ang pagsasagawa ng pre-emptive evacuation lalo na sa mga pamilyang naninirahan sa tabi ng Laguna Lake sa Muntinlupa at iba pang flood-prone areas.
Maliban dito, nanawagan din si Fresnedi sa mga ‘Muntinlupenyos’ na maging mapagmatyag at i-monitor ang mga advisories mula sa PAGASA, lokal na pamahalaan at iba pang reliable sources.
Samantala, may mga residente ring inilikas sa ilang lugar sa Quezon City.
Nabatid na 44 na pamilya ang nanatili ng ilang oras sa covered court ng Brgy. Bagong Silangan dahil pa rin sa masamang panahon.
Nag-alok ng P100,000 pabuya ang Grab Philippines para sa sinumang makapagbibigay ng impormasyon para sa agarang ikadarakip ng responsable sa pagpatay sa isa sa kanilang mga driver.
Sa isang statement, binanggit ng Grab na nakatanggap ng booking ang hindi pinangalanang driver mula Marikina patungong Pasig.
Ang huling lokasyon umano ng driver ay sa Quezon City hanggang sa matagpuan na lamang ito ng taumbayan na naghihingalo at may injury sa ulo.
Nadala pa sa Quirino hospital ang biktima pero binawian din ng buhay.
Patuloy ang imbestigasyon sa naturang pamamaslang.
Kumpiyansa ang Philippine kickboxing team na kahit kulang sila sa karanasan ay mananalo sila sa 30th Southeast Asian Games.
Maagang lumuwas sa Maynila mula sa pagsasanay sa La Trinidad, Benguet ang National team para magpakondisyon sa mainit na klima.
6 na lalaki at 2 babae ang sasabak sa combat sports at kapwa sanay sa mga larong Wushu, Sanda, Boxing, Muay Thai at Mixed Martial Arts (MMA).
Aminado ang koponan na ito ang unang pagkakataon na sasabak sila sa kickboxing.
Gayunman, pahayag ni Coach Mark Sangiao, hindi maituturing na disadvantage ang kakulangan nila ng karanasan sa kickboxing, bagkus ay masasabing bentahe pa nila ang kanilang mga karanasan sa iba’t ibang martial arts.
Magsasama sa unang pagkakataon sa iisang concert ang singers na sina Sarah Geronimo at Regine Velasquez.
Ang announcement tungkol sa joint concert ng 2 ay ginawa sa pamamagitan ng isang short clips at photos mula sa ginawa nilang shoot para sa kanilang bagong proyekto.
Bagama’t wala pang dagdag na detalye hinggil sa concert ng dalawa, sinasabing ito’y magaganap sa 2020.
Balik-kulungan ang isang lalaki na may kasong rape at homicide at pumuga sa bilangguan sa Mexico, Pampanga noong 2005.
Ang 36 na taong gulang na si Rudy Yambao ay nahuli sa mismong tinutuluyan niya sa Barangay Panipuan matapos ang higit 14 na taong pagtatago sa batas.
Sinilbihan si Yambao ng arrest warrant mula sa San Fernando Regional Trial Court.
Batay sa rekord, nakulong si Yambao sa detention facility ng Mexico Municipal Police Station ngunit pumuga noong gabi ng July 10, 2005.
Inatasan ng isang International Court ang Philippine Government na magbayad ng P7.39B sa Manila Water bilang kompensasyon dahil sa nalugi ng kompanya nang ibasura ang hirit nitong taas-singil noong 2015.
Batay sa hatol ng permanent court of arbitration na nakabase sa Singapore, binigyang diin na may karapatang maghabol ang water concessionaire para makabawi bunsod ng umano’y ‘breach of its obligation’ na ginawa ng gobyerno ng Pilipinas.
Maliban dito, sinasabing ang nabanggit na halaga ay katumbas ng naranasang pagkalugi ng Manila Water mula June 2015 hanggang November 2019.
Isa ang naitalang sugatan matapos magsalpukan ang 2 bus na sinasakyan ng mga foreign delegates habang bumibiyahe patungo sa opening ceremonies ng 30th Southeast Asian Games sa Bulacan.
Ayon sa police report, binabaybay ng 2 bus ang North Luzon Expressway (NLEX) at pagsapit ng Bocaue area ay doon na naganap ang aksidente.
Sinasabing sakay ng isang bus ang 40 delegado mula sa Laos habang 42 naman ang lulan ng isa pang bus na pawang mga delegado mula sa Vietnam.
Pinatawan ng hanggang 20 taong pagkakabilanggo ng isang korte ang Presidente ng bansang Suriname na si Desi Bouterse dahil sa pagkakasangkot sa mga kasong pagpatay noong 1982.
Ang Suriname ay isang maliit na bansa na matatagpuan sa Northeastern Atlantic Coast ng South America.
Batay sa desisyon ng ‘panel of three judges’, si Bouterse umano ang nanguna sa ilang operasyon noong 1982 kung saan 15 mga kritiko ng gobyerno ang dinukot at pinatay, kabilang ang ilang abogado, mamamahayag at guro.
Wala pa namang inilalabas na arrest order ang mga hukom laban kay Bouterse na kasalukuyang nasa official trip sa China.