Gilbert Perdez

Nakuha ng Film Director na si Roderick Cabrido ang best director award para sa kanyang horror film na “Clarita” sa ika-sampung edisyon ng mirabile dictu [mi·ra·bi·le dic·tu] International Catholic Film Festival na ginanap sa Vatican City.

Dahil dito, tinalo ng award-winning Filipino film at documentary producer ang iba pang mga direktor mula sa Peru at Italy.

Magugunita na unang nakilala ang batang filmmaker sa mga pelikulang ginawa niya tulad ng “pinays for export,” “tasaday,” “yaman sa basura,” “cuchera” at “nuwebe.”

Masayang ibinalita ng aktres na si Ryza Cenon na “engaged” na siya.

Gayunman, nilinaw ng dalaga na ang singsing ay galing lang din sa kanya at ito’y regalo niya sa kanyang sarili.

Aniya, ito’y tanda ng kanyang full commitment na mamahalin niya muna ang kanyang sarili bago niya ibibigay ang kanyang puso sa sinumang lalaking magmamahal sa kanya nang tunay.

Noong Pebrero ng taong kasalukuyan ay inamin din ni Ryza na hiwalay na sila ng kanyang longtime boyfriend na si Pocholo Barretto.

Magugunitang unang ginamit ni Hollywood star Emma Watson ang terminong “self-partnered” kamakailan kung saan niregaluhan niya rin ang kanyang sarili ng engagement ring bilang patunay na hindi pa niya nahahanap ang kanyang “Mr. Right.”

Nakatanggap ng kaliwa’t kanang papuri ang bandang Coldplay makaraang magdaos ng tour sa Jordan para sa inang kalikasan.

Kasabay nang paglulunsad ng kanilang album na “everyday life” ay nagsagawa ang british band ng 2 gigs sa Amman habang nasa katirikan ng araw.

Masaya naman ang kanilang fans dahil libre rin nilang napanood ang performance ng banda sa Youtube.

Ayon kay Gareth Redmond-King ng World Wildlife Fund (WWF), nakabibilib ang ginawa ng Coldplay dahil bihira ang mga bandang nagdaraos ng konsiyerto para labanan ang climate change.