Isang linggo matapos sumakabilang-buhay ang bilyonaryong si John Gokongwei Jr., pumanaw naman ang kanyang maybahay na si Elizabeth.
Ayon sa statement ng pamilya Gokongwei, ang ginang ay nasawi sa edad na 85.
Ang mga Gokongwei ay mayroong 6 na anak at mahigit 60 taong nagsama bilang mag-asawa.
Bukod sa J.G. Summit Holdings, ang mag-asawang Gokongwei ay mayroon ding mga negosyo sa larangan ng transportasyon, food and beverage, retail, real estate, banking at iba pa.
Isa ang naitalang patay matapos sumiklab ang gulo sa magdamagang kilos-protesta sa lungsod ng Sirjan sa Iran.
Ayon kay acting Governor Mohammad Mahmoudabadi, hindi pa tiyak kung nabaril o hindi ang biktima.
Maliban dito, 2 iba pa ang naitalang sugatan sa madugong demonstrasyon.
Matatandaang ikinasa ang protesta ng mga mamamayan dahil sa pasya ng Iranian Government na magrasyon at taasan ang presyo ng petrolyo ng hanggang 50% upang makabawi sa ipinataw ng sanctions ng Estados Unidos.
Tatlong kapamilya artists ang magsasagawa ng tribute performances para sa Overseas Filipino Workers (OFW’s) sa Las Vegas, Nevada.
Sina Jaya, Inigo Pascual, at Randy Santiago ay kabilang sa mga featured performers sa show na gaganapin sa November 23 sa International Theater ng Westgate Las Vegas Resort and Casino.
Ang “global pinoy idol” ay isang kampanya na naglalayong i-promote ang mga inspiring stories ng mga OFW’s na tumutulong sa mga kapwa nila pinoy sa ibayong dagat.
Inihayag ni Film Development Council of the Philippines Chairperson at CEO Liza Diño na ipinagmamalaki niya ang kanyang asawa na si Ice Seguerra matapos itong mag-perform sa harap ng mga Bakwit sa North Cotabato.
Ayon kay Diño, proud na proud siya sa kanyang kabiyak dahil hindi nito nakakalimutang tumulong at maglaan ng ilang araw sa mga biktima ng lindol sa Mindanao.
Buhay na buhay aniya si Seguerra kapag nakakatulong sa ating mga kababayan na nabiktima ng sakuna.
Abot-kamay na ng Ateneo ang inaasam nitong three-peat.
Ito’y makaraang masungkit ng Blue Eagles ang 91-77 win laban sa University of Santo Tomas sa game 1 ng UAAP season 82 men’s basketball finals sa Araneta Coliseum kahapon.
Sa harap ng mahigit sa 19,000 fans, kumamada si Thirdy Ravena ng 32 points, 5 rebounds, at 3 assists para sa Ateneo.
Sa unang bahagi pa lamang ng laro ay tinambakan na ng Blue Eagles ang Growling Tigers.
Sinubukang dumikit ng UST sa ikatlong quarter pero lalong bumangis ang Ateneo at mula noon ay hindi na lumingon pa ang defending champions.
Kung papalarin sa game 2 na gaganapin sa Mall of Asia Arena, masusungkit na ng Blue Eagles ang kanilang ika-11 korona sa UAAP.
Nang-agaw ng armas ng pulis kaya napatay ang isang preso sa Davao City.
Dead on arrival sa Jose Robillo Hospital si Renuel Habillo, 31 taong gulang at isang magsasaka.
Pahayag ni Police Maj. Archimedes Wesley, hepe ng Calinan Police Station, isasalang sana sa fingerprint processing si Habillo ngunit bigla na lang umanong inagaw ang baril ng kanyang escort na pulis.
Nagkataon namang narinig ng isa pang pulis ang komosyon hanggang sa bumunot ito ng baril at pinaputukan sa ulo si Habillo.
Una rito, hinuli si Habillo dahil sa dalawang bilang ng kasong murder na isinampa laban sa kanya makaraan umanong pagtatagain ang isang mag-ina sa Calinan District.
Kalaboso ang isang jeepney driver makaraang mahulihan umano ng tinatayang 680,000 pesos na halaga ng hinihinalang shabu sa E. Rodriguez Ave., Barangay Kristong Hari, Quezon City.
Ayon sa PDEA-NCR, hawak nila ngayon ang 44-anyos na suspek na residente ng Balut, Tondo, Maynila.
Pahayag ni PDEA Agent Leverette Lopez, naging matagumpay ang isinagawa nilang buy-bust operation laban sa naturang tsuper.
100 gramo ng umano’y shabu, mga cellphone at pera ang nasabat mula sa suspek na ngayo’y nahaharap sa kasong paglabag sa Comprehensive Dangerous Drugs Act.
Pinagbigyan ng Sandiganbayan First Division ang hirit ni Sen. Ramon “Bong” Revilla Jr. na makabiyahe patungong Estados Unidos.
Batay sa motion for permission to travel ni Revilla, inihirit ng senador na nais niyang dumalo sa kasal ng kanyang anak na si Cavite Vice Governor Ramon “Jolo” Revilla III sa susunod na buwan.
Si Jolo ay nakatakdang ikasal kay Angelica Alita, ang Binibining Pilipinas 2016 first runner-up.
Pumanaw na ang isa sa mga pinakamayamang negosyante sa bansa na si John Gokongwei Jr. sa edad na 93.
Sa ulat ng Esquire Philippines, si Gokongwei ay nakaratay sa Manila Doctor’s Hospital nang bawian ng buhay.
Nabatid na si Gokongwei ay ikatlo sa pinakamayamang tao sa Pilipinas na may tinatayang net worth na aabot sa 5.3 billion dollars.
Hindi bababa sa 30 bahay at istruktura ang tinangay ng rumaragasang baha makaraang umapaw ang ilog sa bayan ng Abulug sa lalawigan ng Cagayan bunsod ng tuloy-tuloy na pag-ulan.
Ayon kay Barangay Daan-Ili Chairman Henry Masuli, nasa 36 na bahay ang nilamon ng ilog kaya agad na lumikas ang mga residente.
Namahagi naman ng tulong ang lokal na pamahalaan ng Abulug sa mga apektado ng kalamidad.