Gilbert Perdez

Namemeligrong mawalan ng trabaho ang isang miyembro ng National Capital Region Police Office o NCRPO makaraang magpositibo umano sa paggamit ng iligal na droga.

Ayon kay NCRPO Chief Brig. Gen. Debold Sinas, si Police Corporal Sonny Florence ay masisibak sa puwesto bilang bahagi ng internal cleansing program ng Philippine National Police.

Batay sa confirmatory drug test ng PNP Crime Laboratory, sinasabing positibong gumagamit ng ipinagbabawal na gamot si Florence.

Dagdag ni Sinas, sasampahan ng kasong grave misconduct si Florence at maaaring matanggal sa serbisyo bilang parusa.

Nagbabala ang isang global policy think tank laban sa nilulutong joint exploration sa pagitan ng Pilipinas at China.

Ayon kay Derek Grossman, senior defense analyst ng Rand Corporation, malabong umubra ang cooperation deal ng dalawang bansa sa South China Sea dahil na rin sa isyu ng soberenya.

Giit ni Grossman, malinaw ang nakasaad sa ruling ng ‘Permanent Court of Arbitration’ na ang Recto Bank ay sakop ng Exclusive Economic Zone o EEZ ng Pilipinas at walang legal na basehan ang ginagawang pag-angkin ng China sa naturang teritoryo.

Binigyang diin ni Grossman na dapat mag-ingat ang pamahalaan ng Pilipinas at pag-isipang mabuti ang nasabing joint exploration.

Nanawagan sa Pilipinas ang U.S Department of State na tanggalin na ang placement fee para sa mga pilipinong gustong magtrabaho sa ibang bansa upang hindi mabiktima ang mga ito ng mga human traffickers.

Ayon kay U.S State Department Ambassador at Large John Cotton Richmond, maraming Pinoy ang nababaon sa utang kahit na hindi pa nakakapagsimula sa trabaho dahil sa nabanggit na bayarin.

Giit ni Richmond, bagama’t hindi labag sa batas ang pagkakaroon ng utang, kinakasangkapan aniya ito ng mga traffickers para ipahamak ang mga aplikante.

Dahil dito, binigyang diin ni Richmond na mahalagang magkaroon ng bagong recruitment system sa Pilipinas upang hindi na magamit ng mga illegal recruiters ang lumang sistema sa kanilang mga iligal na aktibidad.

Ipinagmalaki ng Department of Health o DOH na bumubuti ang estado ng kalusugan ng maraming Pilipino.

Katunayan, sa tala ng ahensya, bumaba ang bilang ng mga sanggol na namamatay.

Sumadsad din umano ang bilang ng mga nanay na namamatay sa pagbubuntis o pagkapanganak.

Sa kabila nito, aminado naman si Health Sec. Francisco Duque na marami pang dapat pagbutihin sa mga pampublikong ospital sa buong bansa.

Bagama’t nakalabas na ng Philippine Area of Responsibility o PAR ang bagyong ‘Quiel’, patuloy namang magpapaulan ang buntot ng cold front sa hilagang bahagi ng Luzon.

Ayon sa PAGASA, mararanasan pa rin ang mahina hanggang malakas na ulan sa northern at southern Isabela, Quirino, northern at southern Aurora, Nueva Vizcaya.

Mahina hanggang katamtaman naman na buhos ng ulan ang iiral sa ilang bahagi ng Northern Isabela at maging sa Mountain Province, Pangasinan, at Kalinga.

Pinapayuhan naman ang publiko na mag-ingat sa mga posibleng flashfloods, landslides, at rockslides lalo na ang mga nakatira sa mga matataas o bulubunduking lugar.

PAGASA, nagpalabas ng flood advisory

Nagbabala ang PAGASA kaugnay sa posibleng pagbaha sa mga rehiyon ng Central Luzon, Calabarzon, Cordillera, Ilocos at Cagayan Valley.

Ayon sa PAGASA, ito ay bunsod ng umiiral na tail-end of a cold front na nakaka-apekto sa bahagi ng Northern Luzon.

Batay sa ipinalabas ng flood advisory ng PAGASA, maaaring bahain ang mga lugar ng Quezon, Apayao, Abra, Kalinga, Benguet, Ilocos Norte, Ilocos Sur, Pangasinan, La Union, Cagayan at Isabela.

Samantala, pinapayuhan rin ang mga residenteng nakatira sa gilid ng bundok o sa mga mababang lugar na maging handa sa posibleng pagbaha. (Contributor : Lyn Legarteja)