Gilbert Perdez

Muling niyanig ng magnitude 4.4 na lindol ang Davao Occidental ngayong Sabado, Nobyembre 2.

Ayon sa Phivolcs, nangyari ang pagyanig bandang 1 p.m. sa layong 153 kilometro sa timog kanluran ng bayan ng Sarangani.

Wala namang inaasahang aftershocks sa pagyanig na sinasabing tectonic ang pinagmulan.

Naganap ang lindol dalawang araw matapos tamaan ng magnitude 6.5 ang bayan ng Tulunan sa Cotabato.

Maglulunsad ng web application ang Philippine Institute of Volcanology and Seismology (Phivolcs) na magsisilbing gabay ng mga lokal na pamahalaan sa paghahanda laban sa tsunami.

Ayon kay Phivolcs director Renato Solidum Jr., sa pamamagitan ng tsunami analytics app ay makapaghahanda ang mga lokal na pamahaal sa sakaling tumama ang tsunami o ang pagbugso ng tubig mula sa dagat patungo sa lupa matapos ang isang lindol.

Ayon kay Solidum, isasabay ang launching ng nabanggit na app sa paggunita ng World Tsunami Awareness Day sa Martes, Nobyembre 5.

Dagdag pa ng opisyal, sa ganitong paraan ay mapapataas ang kahandaan at kaalaman ng publiko pagdating sa tsunami.

Isinulong ng isang mambabatas ang pag-regulate sa electronic cigarettes at iba pang vaping products sa mga pamilihan sa bansa dahil sa ito’y mapanganib umano sa kalusugan at hindi ligtas gamitin.

Batay sa House Bill no. 40 ni Muntinlupa Rep. Ruffy Biazon, pinahihigpitan nito ang paggamit, pagbebenta at distribusyon ng Electronic Nicotine Delivery System o ENDS products na nagsisilbing alternatibo sa sigarilyo.

Nakasaad sa bill na bawal nang bumili o gumamit ng mga vaping products ang mga menor de edad at dapat ding nakalagay ang pagbabawal na ito sa mga nabanggit na produkto.

Ang mga mapatutunayang lumabag dito ay papatawan ng 5,000 pisong multa o kulong ng hindi bababa sa 30 araw sa unang paglabag.

10,000 pisong multa naman ang ipapataw sa ikalawang paglabag o 30 araw na kulong at may kasamang kanselasyon ng business permit sa kasunod na paglabag.

Giit ng mambabatas, lumalabas sa mga pag-aaral na hindi totoo ang sinasabi ng mga gumagawa ng e-cigarettes na walang nicotine ang kanilang mga produkto.

Malabong magkaroon ng umento sa sahod ang mga nurse sa mga pampublikong ospital sa susunod na taon.

Ayon kay Health Secretary Francisco Duque III, ito’y dahil ang nabanggit na salary adjustment ay hindi nakapaloob sa isinumiteng proposed budget ng Department of Health o DOH para sa 2020.

Nangako naman si Duque na isasama nila ang umento sa sahod ng mga nurse sa ipapasa nilang panukalang budget para sa 2021.

Gayunman, nilinaw ni Duque na maisasakatuparan lamang ito kung may ipapasang batas ang mga kongresista ukol dito.

Magugunitang naglabas ng desisyon ang Korte Suprema na nagsasaad na dapat ay sa mahigit 30,000 piso ang buwanang sahod ng mga nurse sa mga pampublikong ospital.

Nilamon ng apoy ang tinatayang 200,000 pisong halaga ng mga ari-arian matapos masunog ang isang bahay sa Barangay Bahay Toro sa Quezon City.

Ayon sa Bureau of Fire Protection o BFP, nagsimula sa ikalawang palapag ng bahay sa Carmel 3 Subdivision ang sunog na umabot sa unang alarma bago naapula.

Samantala, nasunog din ang isang gusali sa Escolta sa Maynila.

Nagsimula ang pagsiklab ng apoy sa Santa Cruz Building hanggang sa matupok ang dalawang palapag ng gusali.

Umabot sa ikalawang alarma ang sunog bago idineklarang kontrolado ng BFP.

Wala namang naiulat na nasaktan o nasawi sa mga nasabing insidente.