Gilbert Perdez

Nanawagan sa publiko ang motorcycle-hailing app na Angkas na tulungan sila upang maisalba ang kabuhayan ng tinatayang 17,000 drivers na inaasahang mawawalan ng trabaho makaraang tapyasan ng gobyerno ang bilang ng mga ito.

Sa harap ito ng ginawang pagbasura ng Land Transportation Franchising and Regulatory Board (LTFRB) sa petisyon ng Angkas na payagan silang magdagdag ng mas maraming drivers at sa halip ay nilimitahan sila sa 10,000 mula sa dating 27,000.

Ayon sa pinalabas na statement ng Angkas sa kanilang Facebook page, ang hakbang ng LTFRB ay malaking kompromiso sa kalidad ng serbisyong ibinibigay nila sa publiko at direktang dagok naman sa mga pamilya ng kanilang mga drivers.

Binigyang diin pa ng kompanya, mas higit na kailangan ngayon ng mga mananakay ang mga motorcycle taxis dahil sa kabi-kabilang traffic congestions na nararanasan ng mga ito sa iba’t ibang lugar sa Metro Manila.

May nakaamba na namang dagdag-bawas sa presyo ng mga produktong petrolyo sa susunod na linggo o simula sa Disyembre 17.

Ayon sa mga sources mula sa industriya, P0.30-P0.40 ang magiging pagtaas sa halaga ng kada litro ng diesel.

Tataas din ng P0.50-P0.60 ang presyo ng bawat litro ng kerosene.

Gayunman, posibleng manatili ang kasalukuyang halaga o kaya’y magkaroon ng P0.10 rollback sa kada litro naman ng gasolina.

Sinasabing ito’y bunsod ng paggalaw sa presyo ng langis sa pandaigdigang merkado.

Itinalaga ni Pangulong Rodrigo Duterte si Moro National Liberation Front (MNLF) founder Nur Misuari bilang Special Economic Envoy on Islamic Affairs ng gobyerno sa Organization of Islamic Cooperation (OIC).

Sa unang pagpupulong ng Government-MNLF Peace Coordinating Committee, inanunsiyo ng presidente ang kanyang desisyon na malugod namang tinanggap ng Moro leader.

Layon nitong mapalakas ang tsansang makamit ang matagal nang inaasam na kapayapaan sa Mindanao at makakuha ng suporta mula sa mga Islamikong bansa.

Inaasahang dadalo si Misuari sa taunang pagpupulong ng parliamentary union ng OIC member states sa Burkina Faso, Western Africa sa January 2020.

Lumobo ang bilang ng mga estudyante na nakakaranas ng pambu-bully sa eskwelahan.

Ito’y batay sa Program for International Student Assessment (PISA) 2018 survey kung saan lumalabas na 6 sa 10 teenager ang regular na binu-bully sa mga paaralan.

Nabatid sa mahigit 7,000 Filipino students na 15 taong gulang, 65% rito ay binu-bully ng ilang beses sa loob ng isang buwan.

Mas mataas ito kumpara sa 23% average ng mga mag-aaral na nagkakaroon ng katulad na karanasan sa 36 na bansa tulad ng Estados Unidos, Japan, China, at ilang European countries.

Maliban dito, tinatayang nasa 26% rin ng mga estudyante ay nakakaramdam ng kalungkutan habang nasa paaralan.

Kasabay nito, nanawagan naman si Sen. Sherwin Gatchalian sa Department of Education (DepEd) na mahigpit na bantayan at ipatupad ang mga anti-bullying measures sa mga eskwelahan sa bansa.

Halos kalahating milyong pisong halaga ng iligal droga ang nasabat ng mga awtoridad mula sa dalawang drug suspects sa ikinasang buy-bust operation sa Central Avenue Brgy. Culiat, Quezon City.

Kinilala ang mga suspek na sina Billyser Villeta at Rodolfo Viola, kapwa 41 taong gulang, at nasa drug watchlist ng barangay.

Naisagawa ang operasyon sa pangunguna nina PCPL Neil Pedralvez Baquiran, Patrolman Mark Anthony Vizconde Guloy at Pol. Maj. Don-don Llapitan ng QCPD Station 3 Station Drug Enforcement Unit (SEU).

Aabot sa sampung sachets ng umano’y shabu ang nasabat sa operasyon na tumitimbang ng anim na pung gramo at tinatayang nagkakahalaga ng higit sa 400,000 piso.

Kasama rin sa mga nakumpiska ang sampung gramo ng pinatuyong dahon ng marijuana na may street value na 2,000 piso, isang 9mm na baril, anim na bala, isang weighing scale, isang cellphone at 1,000 pisong buy-bust money.

Mahaharap ang mga suspek sa kasong paglabag sa Comprehensive Dangerous Drugs Act of 2002.

Umabot na sa higit 200 ang bilang ng mga medalyang nasungkit ng mga atletang Pilipino sa 30th Southeast Asian (SEA) games.

Tulad ng inaasahan, pinadapa ng Gilas Pilipinas ang Myanmar sa score na 136-67 sa kanilang laro na ginanap sa Mall of Asia Arena ngayong Sabado, Disyembre 7.

Dahil dito, hawak na ngayon ng Gilas ang 3-0 record sa group a matapos nilang ilampaso ang Singapore at Vietnam kamakailan.

Ang Myanmar ay ranked no. 163 ng FIBA na napakalayo sa Pilipinas na ranked no. 31.

As of 8 p.m. ngayong Sabado, hawak na ng mga Pinoy ang 85 gold, 63 silver, at 64 bronze medals para sa kabuuang 212 medals.