Nilinaw ng Department of Labor and Employment (DOLE) na iligal ang lahat ng mga manggagawang pinoy sa bansang Iran.
Ayon kay Labor Secretary Silvestre Bello III, ito’y dahil wala namang labor agreement na nilagdaan sa pagitan ng Iran at Pilipinas.
Gayunman, nangako si Bello na handa naman silang tulungang makauwi ang mga nagtatrabahong pinoy doon.
Magugunitang lumala ang tensiyon sa gitnang silangan matapos mapatay sa airstrike ng Estados Unidos ang Iranian top commander na si Qassem Soleimani.
Dapat nang gumawa ng plano ang pamahalaan para mapauwi ang mga pinoy sa Gitnang Silangan.
Ito ang binigyang diin ng Trade Union Congress of the Philippines (TUCP) sa gitna ng tumitinding tensiyon sa pagitan ng Estados Unidos, Iran, Iraq, at iba pang bansa sa rehiyon.
Ayon kay TUCP party-list Rep. Raymond Mendoza, maaaring maperwisyo ang tinatayang 1.2 milyong pinoy na nasa Middle East sakaling lumala ang gulo.
Matatandaang nagbanta ng matinding paghihiganti ang gobyerno ng Iran makaraang mapatay sa airstrike ng Amerika si Iranian top commander Qassem Soleimani na itinuturing na ikalawang pinakamataas na lider ng nabanggit na bansa.
Magkakaroon na naman ng dagdag-bawas sa presyo ng mga produktong petrolyo ngayong linggo.
Sinasabing maglalaro sa .30 hanggang .40 ang magiging dagdag-presyo sa kada litro ng diesel at kerosene.
Ayon sa mga sources mula sa industriya, malaki rin ang posibilidad na mapako lang ang presyo o magkaroon ng maliit na rollback na .10 sa kada litro naman ng gasolina.
Inaasahang aarangkada ang paggalaw sa presyo ng petrolyo sa Martes, Enero 7.
Ayon naman sa Department of Energy (DOE), wala pang kompanya ng langis ang nag-abiso tungkol sa price hikes bunsod ng panibagong fuel excise tax ngayong 2020.
Nilinaw ng ahensya na bago maipatupad ito ay kailangang magpaskil ng karatula ang mga oil companies kaugnay ng mas mataas na buwis na ipapatong nila sa kanilang mga produkto.
Halos hindi pa rin makapaniwala si Allen Dizon nang matanggap niya ang parangal bilang best actor sa 2019 Metro Manila Film Festival (MMFF) awards night.
Sa gabi ng parangal, sinabi ni Dizon na para sa kanyang pamilya at sa lahat ng mga tumangkilik ng pelikula ang nakuha niyang award.
Maaalalang nasungkit ni Dizon ang best actor award bunsod ng naging papel niya sa pelikulang “Mindanao” na humakot ng 11 parangal.
Tinalo ni Dizon sina Aga Muhlach, Rocco Nacino at iba pa para sa nabanggit na award.
Itinanghal ding best actress si Judy Ann Santos na siyang asawa ni Dizon sa pelikula.
Ang “Mindanao” ay produced ng center stage production at idinerihe ni Brillante Mendoza.
Handang tumulong ang National Power Corporation (NAPOCOR) upang maayos ang problema sa kuryente sa Camotes Islands sa Cebu.
Nabatid na lumagda na ang NAPOCOR sa isang deed of usufruct kasama ang Cebu Provincial Government na naglalayong maresolba ang mga lumang linya ng kuryente sa isla.
Noong nakaraang buwan ay nakita mismo ni Cebu Governor Gwen Garcia ang sitwasyon sa Camotes kaya’t nanawagan ito sa NAPOCOR at sa Camotes Electric Cooperative (CELCO) na gawing episyente ang suplay ng elektrisidad sa lugar.
Ayon kay NAPOCOR President Pio Benavidez, hihintayin muna nila ang ipapasang resolusyon ng Cebu Provincial Board upang masimulan na nila ang pag-aaral sa power situation sa naturang isla.
Napili si Gretchen Ho bilang isa sa mga torchbearers sa gaganaping torch relay para sa 2020 Tokyo Olympics.
Sa kanyang Twitter account, inanunsiyo rin ng dating volleyball player at media personality ang magandang balita.
Tinatayang 10,000 torchbearers ang makakalahok sa relay sa Japan.
Magugunitang binuksan sa publiko noong Hunyo ang aplikasyon para sa mga gustong maging torchbearer at isa sa mga mapalad na napili si Ho.
Ang Japan relay ay aarangkada sa March 26, 2020 sa Fukushima Prefecture at tatakbo ng 121 araw habang magbubukas naman ang Tokyo Olympics sa July 24, 2020.
Pumanaw na ang kapatid na babae ng singer na si George Michael.
Ayon sa ulat, si Melanie Panayiotou ay namatay sa mismong araw ng pasko na nagkataon namang ikatlong anibersaryo ng kamatayan ng pop singer.
Sinasabing nakatanggap ng tawag ang London police at paramedics hinggil sa babaeng 53 taong gulang na nakitang patay sa lugar.
Wala naman umanong nakitang foul play sa pagkamatay ni Melanie pero humihingi ng privacy ang kanyang pamilya sa gitna ng kanilang pagluluksa.
Patay ang 76 katao makaraang sumabog ang isang kotse na may kargang bomba sa Mogadishu, Somalia.
Ayon kay police officer Ibrahim Mohamed, madalas tinatamaan ng car bombings ang lugar na kagagawan ng Al-Shabaab Islamist Militants na kaalyado ng Al-Qaeda.
Nabatid na maraming tao at masikip ang daloy ng trapiko sa Mogadishu dahil may nakalatag dito na security checkpoint at isang tax office.
Maliban sa mga nasawi,90 iba pa ang nasugatan sa pambobomba.
Makakatanggap ng umento sa sahod ang mga kumikita ng minimum wage sa gitnang Luzon.
Ito’y makaraang magpalabas ng wage order ang regional Tripartite Wages and Productivity Board na nagkakaloob ng P20 dagdag-sweldo na epektibo sa susunod na buwan.
Saklaw ng kautusan ang mga minimum wage earners sa Bataan, Bulacan, Nueva Ecija, Pampanga, Tarlac, Zambales, at Aurora.
Ayon sa regional wage board, ang wage hike ay ibinatay sa resulta ng mga pag-aaral sa umiiral na socio-economic conditions sa rehiyon.
Nagpasaklolo sa Commission on Human Rights (CHR) ang isang grupo ng mga mangingisda dahil sa ‘red-tagging’ sa kanila ng mga miyembro ng local anti-communist task force sa Palawan.
Ayon kay Pamalakaya (Pambansang Lakas ng Kilusang Mamamalakaya ng Pilipinas) chairman Fernando Hicap, dapat aksiyunan ng CHR ang ginagawa sa kanila ng task force partikular ang pagturing umano sa kanila bilang mga rebelde at mga taga-suporta ng New People’s Army (NPA).
Giit ni Hicap, karaniwan nang nararanasan ng mga biktima ng extrajudicial killing sa bansa na bago sila patayin ay nagiging biktima pa ng red-tagging.
Matatandaang kamakailan ay nagpahayag din si CHR commissioner Jacqueline De Guia na ang akusasyon laban sa ilang grupo o indibidwal bilang komunista ay dapat patunayan sa Korte.