Gilbert Perdez

Makaraan ang ilang araw na “private time”, muling nagpakita sa publiko si Pangulong Rodrigo Duterte.

Ito’y matapos bumisita ang Presidente sa burol ng yumaong veteran journalist at the Daily tribune founder na si Ninez Cacho-Olivares sa Forbes Park, Makati City.

Maaalalang hindi nakadalo si Pangulong Duterte sa isang event sa Davao del Sur para sana sa mga biktima ng lindol doon noong Huwebes, January 2.

Ngunit lumipad patungong Maynila ang Presidente mula sa Davao City at dumalo sa change of command ceremony sa Camp Aguinaldo kahapon, January 4.

Inihayag naman ni Presidential spokesman Salvador Panelo na bumuti na ang pakiramdam ng Pangulong Duterte at kaya hindi ito nakadalo sa ilang events ay dahil sa pagod at sa tambak nitong trabaho.

Wala pang planong i-repatriate ang mga Pinoy gitnang silangan, partikular sa Iran at Iraq.

Ito ang nilinaw ni Foreign Affairs Secretary Teodoro Locsin Jr. Sa gitna ng nagaganap na tensiyon sa nabanggit na rehiyon.

Gayunman, ayon kay Locsin, maigi nilang binabantayan ang sitwasyon sa Middle East.

Ipinanawagan naman ng DFA ang pagkansela sa mga biyahe patungong Iraq.

Sa datos ng ahensya, mahigit 1,000 documented workers ang kasalukuyang nagtatrabaho sa bansang Iraq habang 800 dito’y naninirahan sa Baghdad kung saan sumiklab ang airstrike.

Tinatayang higit 500 undocumented pinoy workers din ang nananatili sa naturang bansa.

Nababahala si Maguindanao Rep. Esmael “Toto” Mangudadatu sa hirit ni convicted murderer at dating ARMM Governor Zaldy Ampatuan sa korte na ilipat siya sa New Bilibid Prison (NBP).

Ayon kay Mangudadatu, kung talagang para sa kalusugan ni Ampatuan ang request ng dating gobernador, dapat aniya’y hayaan na lamang nito ang mga doktor na magpasya ukol dito.

Magugunitang naghain ng urgent motion si Ampatuan sa korte noong nakaraang buwan kung saan kanyang iginiit na lumalala na ang kanyang pisikal at mental na kondisyon makaraang ma-stroke ng tatlong beses.

Subalit ipinunto ni Mangudadatu na kung pagbibigyan ang hirit ni Ampatuan ay baka tumakas lamang ito o kaya’y gusto lamang nitong ma-confine sa mamahalin at pribadong ospital.

Obligadong magbalik-eskwela ang mga estudyante sa mga pampublikong paaralan bukas, ika-6 ng Enero, matapos ang christmas vacation.

Ayon sa Department of Education (DepEd), ito’y dahil ang mga pribadong paaralan lamang ang binigyan ng pagkakataon na makapamili ng petsa kung kailan papapasukin muli sa paaralan ang kanilang mga mag-aaral.

Batay sa Republic Act 7797, dapat ay hindi bababa sa 200 days at hindi naman hihigit sa 220 days ang school calendar ng mga public elementary at secondary schools.

Ang school year 2019-2020 ay nagsimula noong Hunyo 3 ng nakaraang taon at magtatapos naman sa Abril 3 ng taong kasalukuyan.

Mabuti na ang pakiramdam ni Pangulong Rodrigo Duterte.

Ito ang tiniyak ni Presidential spokesman Salvador Panelo makaraang hindi makadalo ang presidente sa isang event sa Davao del Sur.

Katunayan, sinabi ni Panelo na si Pangulong Duterte pa nga ang nanguna sa change of command ceremony para kay AFP Chief of staff Lt. Gen. Felimon Santos kahapon, gayundin sa retirement honors para naman kay outgoing AFP Chief of staff Lt. Gen. Noel Clement.

Matatandaang huling nakita sa publiko ang punong ehekutibo noong December 30, 2019.

Mananatili ang African Swine Fever alert sa bansa.

Ito ang nilinaw ng Department of Agriculture (DA) makaraang magpositibo sa ASF ang ilang meat products na nadiskubre sa isang supermarket sa Quezon City.

Ayon kay Agriculture Secretary Willam Dar, hindi aalisin ang alerto hangga’t hindi natitiyak ng ahensya na ligtas na sa ASF ang mga karneng baboy sa Pilipinas.

Matatandaang inisyuhan ng ‘notice of closure’ ang North Star Meat Merchants Inc. bunsod ng kontaminadong karne nito na naka-display sa isang pamilihan noong Disyembre ng nakaraang taon.

Kumuha ng magagaling na “Kuwaiti lawyers” ang pamahalaan ng Pilipinas na siyang hahawak sa kaso ng isang Pinay domestic worker na pinatay umano ng kanyang amo.

Ayon kay Foreign Affairs Secretary Teodoro Locsin Jr., ito’y bilang paghahanda na rin ng gobyerno sakaling simulan na ang pagsisiyasat sa kaso ng pagkamatay ni Jeanelyn Villavende.

Tatagal aniya ng isang linggo ang imbestigasyon sa kaso bago ang pormal na pagdinig ng Kuwaiti court.

Matatandaang nagpatupad na ng ‘partial ban’ ang gobyerno sa pagpapadala ng mga domestic workers sa Kuwait dahil sa insidente.