Inilampaso ng Miami Heat ang Oklahoma City Thunder sa kanilang laro sa NBA sa score na 115-108.
Nakapagtala si Kendrick Nunn ng 22 points habang nagdagdag si Jimmy Buttler ng 14 points, 10 rebounds at 7 assists para sa Heat.
Samantala, si Danilo Gallinari naman ang nanguna sa Thunder sa pamamagitan ng kanyang 27 points.
Patay ang 7 katao habang 2 iba pa ang sugatan sa malagim na aksidente sa Prosperidad, Agusan Del
Sur.
Wala pang pagkakakilanlan ang 7 nasawi habang dinala naman sa ospital ang 2 nasaktan sa trahedya.
Nasa custodial facility na ng Prosperidad police station ang driver ng pickup.
Sa imbestigasyon, lulan ng tricycle ang 9 katao na maliligo sana sa dagat habang papuntang Davao naman ang kasalubong na pickup na bumangga sa kanila sa Purok 6, Patin-ay.
Sa lakas ng impact, nakaladkad ng pick-up ang tricycle hanggang sa mapunta sila sa palayan.
Patuloy ang imbestigasyon sa naturang aksidente.
Pagpapasyahan na ng South Korea sa susunod na linggo ang magiging kapalaran ng isang kauna-unahang transgender soldier.
Sinasabing ang hindi pinangalanang non-commissioned officer ay pumasok sa militar bilang lalaki pero sumalang sa sex re-assignment surgery habang nasa serbisyo.
Batay sa patakaran ng South Korea, bawal ang transgender people sa kanilang sandatahang lakas pero wala itong specific regulations kung anong dapat gawin kung ang sex-change operations ay ginawa habang nasa active service ang isang sundalo.
Ayon naman sa isang rights organization, isinalang na nila ang nabanggit na staff sergeant sa counselling at physiological treatment.
Ipinagharap na ng kasong frustrated homicide ang dating aktor na si Jiro Manio makaraang saksakin umano ang isang lalaki sa lungsod ng Marikina.
Kinilala ang biktima na si Zeus Doctolero, 25 taong gulang.
Ayon sa imbestigasyon ng Marikina Police, nangyari ang insidente sa Barangay San Roque.
Sinasabing naglalakad ang biktima nang biglang bumunot ng kutsilyo si Manio at sinaksak ito ng 3 beses sa iba’t ibang parte ng katawan.
Subalit ayon sa isang testigo, kutsara ang ipinansaksak ni Manio sa biktima at hindi kutsilyo. Nakursunadahan lang din umano si Manio ng grupo ni Doctolero kaya’t humantong ito sa pananaksak.
Pabor kay Fil-Am Jordan Clarkson ang ginawang pag-trade sa kanya ng Cleveland sa Utah.
Ayon kay basketball analyst Enzo Flojo, nakakatulong din si Clarkson sa Jazz lalo pa’t mahaba-habang oras ang ibinibigay ng team sa kanya.
Matatandaan na nitong Biyernes ay nakasungkit ng 20 points si Clarkson sa 109-92 victory ng Utah laban sa Charlotte Hornets.
Si Clarkson ay itinapon ng Cavaliers sa Jazz kapalit ni Dante Exum noong Disyembre ng nakaraang taon.
Nagdeklara na ng panalo sa eleksiyon si Taiwanese President Tsai Ing-Wen matapos mag-concede si opposition candidate Han Kuo-Yu.
Sa kanyang victory speech, nagpasalamat si Tsai sa lahat ng mga bumoto sa kanya sa katatapos na presidential election.
Matatandaan na lalong naging popular si Tsai matapos niyang itulak ang panukalang batas na naglalayong gawing legal ang same-sex marriage noong May 2019.
Nag-post ng larawan ang aktor na si James Reid habang kasama ang kanyang nobyang si Nadine Lustre sa tuktok ng Mt. Ulap sa Benguet.
Ito’y sa gitna na rin ng alingangas hinggil sa paghihiwalay ng dalawa.
Sa isang instagram post, makikita ang dalawa habang magkatabi sa ibabaw ng bundok matapos maglakbay ang magkasintahan kamakailan.
Matatandaang itinanggi ni Nadine na hiwalay na sila ni James kasunod na rin ng artikulong isinulat ng isang newspaper columnist tungkol sa naturang isyu.
Mariing itinanggi ng Metropolitan Waterworks and Sewerage System (MWSS) na nakikipagsabwatan ito sa 2 water distributors.
Giit ni MWSS Chief Regulator Patrick Ty, walang katotohanan ang paratang na kumikiling sila sa Manila Water Company, Inc. at Maynilad Water Services, Inc. upang makakuha ang mga ito ng profitable government contracts.
Ayon kay Ty, ang panibagong concession agreement na ilalatag nila sa 2 kompanya ay mas maganda upang maprotektahan ang interes ng publiko.
Mas paiigtingin pa ng Philippine National Police (PNP) ang ‘internal cleansing’ sa kanilang hanay.
Ito’y kasunod ng pahayag ni Pangulong Rodrigo Duterte tungkol sa “embedded corruption” o nakabaon nang korapsiyon sa PNP.
Ayon kay PNP Officer-in-Charge, Lt. Gen. Archie Gamboa, may nakalatag na silang mga programa kaugnay ng internal cleansing upang tuluyan nang malinis ang kanilang organisasyon.
Ipinagmalaki naman ni Gamboa na mula noong October 2019 nang umupo siya bilang OIC ay halos 300 tiwaling pulis na ang nasibak sa puwesto.
Inaasahang bababa ang presyo ng mga produktong petrolyo sa darating na Martes, Enero 14.
Sa kabila ng pinangangambahang big time oil price hike dahil sa tensyon sa gitnang silangan sanhi ng sigalot sa pagitan ng Iran at Amerika, tinatayang .30 hanggang .40 ang magiging tapyas-presyo sa kada litro ng diesel at kerosene.
Posible namang manatili o kaya’y matapyasdan ng .10 ang singil sa kada litro ng gasolina.
Ang paggalaw sa presyo ng langis ay sinasabing bunsod nang paghupa ng tensiyon sa Middle East.