Sumampa na sa 2,664 ang bilang ng mga Pilipino na dinapuan ng coronavirus disease 2019 (COVID-19) sa ibang bansa.
Ayon sa Department of Foreign Affairs (DFA), ito’y makaraang makapagtala sila ng 29 na bagong kumpirmadong kaso.
Nadagdagan naman ang bilang ng mga nasawing Pinoy nang pumanaw ang tatlo pang kababayan natin sa Gitnang Silangan kaya’t pumalo na 334 ang death toll sa ibayong dagat.
Dagdag pa ng DFA, nagkaroon ng 25 na bagong recoveries sa Europa at Middle East.
Nakalusot na sa committee level ng Kongreso ang isang panukalang batas na naglalayong bumuo ng isang 35-hour working scheme bilang alternative work arrangement para sa mga empleyado sa pribadong sektor.
Sa isinagawang pagdinig ng House Committee on Labor and Employment na pinamumunuan ni 1-Pacman Rep. Enrico Pineda, bumoto pabor sa pag-apruba ng bill ni Albay Rep. Joey Sarte Salceda ang mayorya ng mga kasapi ng komite.
Batay sa panukala ni Salceda, binanggit na mahalagang paikliin ang working week ng mga manggagawa lalo na ngayong nagbabago ang labor market at tumitindi rin ang hirap na dinaranas ng sektor ng paggawa sa pagko-commute.
Gayunman, nilinaw sa bill ni Salceda na dapat ay voluntary basis ang pagpapatupad ng 35-hour working week arrangement o flexible working time, depende sa mapag-uusapan ng mga empleyado at ng kanilang employer.
Lilipat sa University of Santo Tomas (UST) ANG dalawang manlalaro ng Technological Institute of the Philippines (TIP) Men’s Basketball Team dahil sa pagkakabuwag ng kanilang koponan.
Sinasabing maglalaro na sina Bryan Santos at Ivan Santos sa panig ng growling tigers sa oras na masunod na nila ang residency requirement.
Si Bryan ay nag-average ng 16.3 points at 6.9 rebounds sa engineers noong sumalang ito sa 2019 PBA D-league Foundation Cup habang nakaposte naman si Ivan ng 8.9 points at 4.7 rebounds.
Matatandaang binuwag ng TIP ang kanilang men’s basketball team, maging ang iba pa nitong varsity squads, dahil sa epekto ng COVID-19 pandemic.
Inaresto ng mga awtoridad sa Japan ang lalaki na hinihinalang sumunog sa isang Kyoto Animation Studio na ikinasawi ng 36 katao noong nakaraang taon.
Ayon sa ulat, hinintay muna ng Kyoto Police na makarekober ang suspek na si Shinji Aoba, 42 taong gulang, bago dinakip dahil sa patung-patong na kasong murder.
Noong July 18, 2019 ay pinasok umano ni Aoba ang no.1 studio ng Kyoto Animation bago ito sinunog na ikinasawi ng maraming tao.
Hihingi na ng tulong sa mga local government units (LGUs) ang Department of Health (DOH) upang mapunan ang kakulangan sa contact tracers ng gobyerno.
Ayon kay DOH spokesperson Maria Rosario Vergeire, kailangan ng gobyerno ng tinatayang 95,000 tracers na siyang tutunton sa mga nakasalamuha ng isang taong dinapuan o nagpositibo sa coronavirus disease (COVID-19).
Sinabi ni Vergeire na nasa higit 38,000 pa lang ang na-hire ng DOH at marami pa ang kinakailangan upang mapuksa ang COVID-19.
Sa ngayon, isinasapinal na ng ahensya ang minimum qualifications para sa mga contact tracers at aniya’y ibabase sa salary grade ng Civil Service Commission (CSC) ang magiging suweldo ng mga ito.
Niyanig ng magnitude 4.8 na lindol ang Davao Occidental dakong 3:46 p.m. ngayong Miyerkules, Mayo 27.
Ayon sa Philippine Institute of Volcanology and Seismology (Phivolcs), naitala ang sentro ng pagyanig sa layong 51 kilometro timog kanluran ng bayan ng Sarangani.
Sinasabing ‘tectonic’ ang pinagmula ng lindol na may lalim na 185 kilometero.
Dagdag ng Phivolcs, wala namang nasirang ari-arian, nasawi o nasaktan at wala ring inaasahang aftershocks sa naturang pagyanig.
Nagpalabas ang Food and Drug Administration (FDA) ng cease and desist order laban sa hindi rehistradong Fabunan antiviral injections na sinasabing lunas laban sa coronavirus disease 2019 (COVID-19).
Ayon kay Department of Health (DOH) Undersecretary Maria Rosario Vergeire, hindi nag-apply ang mga Fabunan para sa certificate of product registration (CPR).
Pinag-aaralan na rin ng DOH ang posibleng kaso na may kaugnayan sa gamot lalo pa’t kumalat na sa social media ang mga balitang ginagamit na ito sa Zambales.
Dagdag ni Vergeire, saklaw ng FDA ang mga usaping may kinalaman sa mga unregistered drug o vaccine.
Magugunitang nanawagan sa FDA ang Malacañang noong Abril 22 na pag-aralan kung epektibo nga ba ang Fabunan antiviral injection laban sa COVID-19.
Inaasahang makakalahok ang Pilipinas sa clinical trials para sa bakuna laban sa coronavirus disease 2019 (COVID-19) sa last quarter ng 2020.
Ang statement ay ginawa ni Presidential Spokesperson Harry Roque matapos magpahayag ng kumpiyansa si Pangulong Rodrigo Duterte na magkakaroon ng positibong resulta ang nilikhang COVID-19 vaccine.
Ginagawa ang clinical trials ng iba’t-ibang bansa upang malaman kung alin sa mga gamot ang epektibo para sa coronavirus.
Samantala, sinabi rin ni Roque na pangungunahan ng Department of Science and Technology (DOST) ang clinical trials sa Pilipinas.
Isa na namang Pilipino sa ibayong dagat ang napositibo sa coronavirus disease 2019 (COVID-19).
Dahil dito, ayon sa Department of Foreign Affairs (DFA), umakyat na sa 2,523 ang bilang ng mga Pinoy sa ibang bansa na tinamaan ng COVID-19.
Tatlo ring mga kababayan natin ang nadagdag sa listahan ng mga nasawi sa sakit dahilan upang pumalo na sa 294 ang bilang ng mga ito.
Samantala, nasa 879 na ang mga gumaling na Pinoy mula sa COVID-19 sa labas ng bansa.
Patay ang apat katao matapos mag-amok ang isang lalaki sa Barangay Banuar, Laoac, Pangasinan.
Pahayag ni Police Capt. Mark Taminaya, hepe ng Laoac police, bigla na lang umanong nagwala ang lalaki sa bahay na tinutuluyan ng kanyang pamilya.
Ayon kay Taminaya, kasama sa mga napatay ng hindi pinangalanang suspek ang may-ari ng bahay at maging ang kanyang misis at ina.
Nadamay naman sa pag-aamok ng lalaki ang dalawa pang residente sa lugar habang nagpakamatay ang suspek matapos ang ginawang krimen.
Patuloy ang imbestigasyon sa naturang insidente.