Gilbert Perdez

Kinondena ni National Security Adviser Clarita Carlos ang Communist Party of the Philippines-New People’s Army (CPP-NPA) matapos tambangan ang dalawang sundalo sa Sipalay City, Negros Occidental.

Ayon kay Carlos, nakalulungkot isipin na sa kabila ng mga matagumpay na operasyon at kahanga-hangang resulta ng pagtataguyod ng gobyerno ng kapayapaan ay nangyayari pa rin ang mga trahedya at karahasang dulot ng mga rebelde.

Matatandaang pinagbabaril ng mga hinihinalang miyembro ng NPA sina Sgts. Regie Glendro at Ken Camilan ng 47th Infantry Battalion sa Barangay Camindangan, Sipalay City noong Nobyembre 24.

Inabsuwelto ng Court of Appeals ang isang senior official ng Philippine Coast Guard (PCG) sa kasong Serious Dishonesty habang na-downgrade naman ang kaso laban sa pitong iba pa na napatunayan ng Ombudsman na nagkaroon ng partisipasyon sa umano’y pagtanggap ng isang non-specified brand ng equipment noong 2008.

Batay sa desisyon ng CA Fifth Division, ibinasura nito ang kaso laban kay Capt. Lyndon Cendreda habang ibinaba naman sa ‘less serious dishonesty’ ang kaso laban kina Commodore Teotimo Borja Jr., Lt. Junior Grade Wynchester Florentino, Adrian Vargas at Benedicto Bartolome; at PCG officers Rex Villanueva, Mac Roger Lerion at Sheryl Malapit-Cuebas.

Una nang sinuspinde ng anim na buwan ang mga respondents, maliban kay Lerion na pinatawan ng siyam na buwang suspensiyon.

Matatandaang nadiskubre ng Ombudsman na pinayagan umano ng mga opisyal ang pagbili ng PCG ng mga ‘breathing apparatus’ para sa emergency response ngunit sa halip na “Survivair Panther” ay “Huayan” brand ang nai-deliver sa ahensya.

Arestado ang isang elementary school teacher dahil sa umano’y pagtutulak ng ilegal na droga sa Sta. Cruz, Laguna.

Kinilala ni Sta. Cruz Chief of Police, Police Major Gabriel Unay ang suspek na si John Paul Costa.

Labing-anim na sachets ng hinihinalang shabu ang nasabat ng mga awtoridad mula kay Costa.

Ayon kay Unay, sasampahan ang suspek ng kasong paglabag sa Comprehensive Dangerous Drugs Act of 2002.

Nagpahayag ng suporta si Vice President at Department of Education Secretary Sara Duterte sa malawakang pagtatanim ng puno ng Climate Change Commission (CCC).

Ayon kay Duterte, ito’y upang dumami ang ‘carbon sinks’ at maibsan ang greenhouse gas emissions.

Ginawa ni Duterte ang pahayag sa 15th Global Warming & Climate Change Consciousness Week kung saan binigyang diin ng pangalawang pangulo ang kahalagahan ng tree planting at growing activity ng komisyon.

Maliban sa OVP, nakiisa rin sa aktibidad ng CCC ang Department of Environment and Natural Resources (DENR), Professional Regulation Commission (PRC), at iba pa.

Naging highlight sa isang webinar workshop ng Climate Change Commission (CCC) ang mahalagang papel ng kabataan para sa makabuluhan at napapanahong pagtugon sa climate change.

Ayon kay CCC Vice Chairperson at Executive Director Robert Borje, ang event ay bahagi ng ika-15 taong paggunita sa “Global Warming & Climate Change Consciousness Week.”

Ang “Kaalamang Klima: Climate Change Webinar Workshop for the Youth” ay dinaluhan ng mga kabataang edad 18 hanggang 30 taong gulang kung saan layon nitong itaas ang kamalayan ng mga kabataan ukol sa climate science at himukin ang mga ito na gamitin ang angking kasanayan para sa epektibong pagtugon sa pabago-bagong klima.

Ang “Global Warming & Climate Change Consciousness Week” ay inoobserba naman tuwing Nobyembre 19 hanggang 25.

Inihayag ng Office of the Vice President o OVP na patuloy ang pamamahagi nito ng ayuda para sa mga apektado ng bagyong Paeng sa ilang lugar sa Laguna.

Sa pamamagitan ng OVP-Disaster Operations Center o DOC, namigay ang tanggapan ni VP Sara Duterte-Carpio ng food packs sa mga residente ng Pagsanjan at Cabuyao.

Samantala, nabiyayaan din ng tulong mula sa OVP maging ang mga mamamayan ng Bacoor City sa Cavite, Maguindanao del Sur, Maguindanao del Norte, Cotabato City, Hilongos at Bato sa Southern Leyte, Zamboanga City, Antique at Cagayan.