Gilbert Perdez

Ipinagmalaki ng Presidential Commission for the Urban Poor o PCUP na nakakatanggap ng patas at pantay na pagtrato sa gobyerno ang mga pamilyang maralitang tagalungsod.

Ginawa ni PCUP chairperson Undersecretary Elpidio Jordan Jr. ang pahayag matapos mapaulat na kumikiling ito sa mga “professional squatters” na umano’y ilegal na umookupa sa isang private property sa Tanay, Rizal.

Itinanggi ni Jordan na binibigyan nila ng special treatment ang mga informal settlers.

Tiniyak din ng opisyal na “in good faith” ang ginagawa nilang pagtulong sa mga mahihirap na pamilya.

Nagkasa ng moratorium ang Bureau of Fisheries and Aquatic Resources o BFAR sa crackdown laban sa imported frozen fish sa mga wet markets sa bansa.

Ayon kay BFAR Officer-in-Charge Demosthenes Escoto, ginawa ang hakbang matapos manawagan ang ilang mambabatas na busisiin ang nasabing regulasyon.

Nangangahulugan na hindi na kukumpiskahin ang mga diverted frozen fish simula bukas, Disyembre 4, habang nire-review ang guidelines ukol dito.

Sa ilalim ng Fisheries Administrative Order 195, pinapayagan ang pag-apruba ng importasyon ng frozen fish pero dapat itong i-deliver sa mga institutional buyers.

Una nang tinawag ni Sen. Raffy Tulfo na “anti-poor” ang hakbang ng BFAR habang para naman kay Sen. Grace Poe ay masama ang “timing” nito dahil malapit na aniya ang Holiday season.

Isinusulong ng isang senador ang pagkakaroon ng mas malakas na comprehensive sexuality education sa bansa.

Ang hakbang ay ginawa ni Sen. Sherwin Gatchalian matapos mapaulat na mababa ang youth awareness ukol sa human immunodeficiency virus o HIV at acquired immunodeficiency syndrome o AIDS.

Batay sa 2021 Young Adult Fertility and Sexuality Study o YAFSS ng University of the Philippines Population Institute o UPPI, lumitaw na 76% ng mga kabataang Pinoy ang mangmang tungkol sa HIV at AIDS na mas mababa kumpara sa 95% noong 1994.

Nabatid din sa pag-aaral na mahigit kalahati o 52% ng Filipino youth ang naniniwalang nakukuha ang HIV sa pamamagitan nang pagse-share ng pagkain habang 40% naman ang nagsabing kahit ang mga mukhang malulusog na tao ay puwedeng magkaroon ng nasabing sakit.

Matatandaang naghain din ng resolusyon si Gatchalian na nagsusulong ng imbestigasyon hinggil sa pagtaas ng HIV infections at teenage pregnancies sa bansa.

Ginawaran ng Japanese government si dating Senate President Manny Villar ng ‘Grand Cordon of the Order of the Rising Sun’.

Mismong si Japan Ambassador to the Philippines Kazuhiko Koshikawa ang naggawad ng parangal kay Villar sa isang seremonya sa Malacañang na sinaksihan ni Pangulong Ferdinand Marcos Jr.

Ang parangal ay ipinagkaloob ng Japan kay Villar bunsod ng malaking kontribusyon ng dating senador sa malakas na bilateral relations sa pagitan ng dalawang bansa.

Ang ‘Order of the Rising Sun’ ay iginagawad sa mga indibidwal sa Japan at iba pang bansa na nagpakita ng natatanging tagumpay a serbisyo sa kani-kanilang larangan.

Inihayag ng Manila International Airport Authority (MIAA) na inaasahan nitong tataas ng 13% hanggang 15% ang bilang ng mga pasahero ngayong umarangkada na ang panahon ng holiday o peak season.

Ayon kay Bryan Co, senior assistant manager ng MIAA, ang peak season para sa kanila ay mula Disyembre hanggang mga unang linggo ng enero ng susunod na taon.

Sa kasalukuyan, nasa isandaang libo na ang mga pasaherong dumarating at umaalis kapwa sa domestic at international operations.

Para kay Co, nalagpasan na ng bansa ang pre-pandemic noong 2019 pagdating sa usapin ng domestic operations o ang pagbiyahe ng mga kababayan natin sa iba’t ibang destinasyon sa bansa.

Inamin ng PhilSys Registry Office ng Philippine Statistics Authority (PSA) na naghahabol sila sa pag-iimprenta ng physical IDs o national ID.

Ayon kay Engr. Fred Sollesta, officer-in-charge ng PRO, nasa 50 milyon pa ang backlog nila sa physical IDs.

Inamin ng opisyal na nabubulunan ang kanilang sistema o ang IT infrastructure, gayundin ang kanilang card printing facility.

Kaya naman, sinabi ni Sollesta na pinag-uusapan na ng PSA at Bangko Sentral ng Pilipinas (BSP kung papano mapabibilis pa ang produksyon ng mga ito.

Sa ngayon aniya, nasa 75 milyong mga Pilipino ang nairehistro na nila at nasa 25 milyon pa lamang ang naiimprenta nilang physical IDs.