Naglunsad ng eTravel platform ang pamahalaan para sa mga biyaherong papasok sa bansa, kabilang ang mga Pilipino.
Ito ang inanunsiyo ng Office of the Press Secretary o OPS bilang bahagi ng pagpapaluwag ng proseso sa pangongolekta ng mga datos ng mga pasahero.
Ayon sa OPS, epektibo ngayong araw, Disyembre 2, ang health declaration checklist ng Department of Health-Bureau of Quarantine ay maaari nang ma-access sa pamamagitan ng etravel.gov.ph.
Ang mga pasahero naman na dating gumagamit ng onehealthpass.com.ph ay direktang mapupunta sa eTravel domain sa oras na i-click nila ang lumang platform.
Nabatid na simula Disyembre 5 ay hindi na rin maa-access ng publiko ang lumang One Health Pass website.
Makikita sa eTravel platform ang electronic version ng paper Arrival Card ng mga biyahero na isusumite nila sa pagdating ng bansa para sa immigration clearance.
Lahat ng mga biyahero ay obligadong magbigay ng arrival information at health declaration sa pamamagitan ng eTravel portal kung saan libre ang registration.
Nagbabala rin ang OPS sa publiko laban sa pakikipag-transaksiyon sa ano mang entity, website o platform na nanghihingi ng bayad o fees na may kaugnayan sa eTravel.
Ang eTravel platform ay magkatuwang na inisyatibo ng Department of Information and Communications Technology (DICT), Bureau of Immigration (BI), Bureau of Quarantine (BOQ), Bureau of Customs (BOC), Department of Tourism (DOT), Department of Health (DOH), Department of Justice (DOJ), at Department of Transportation (DOTr).