Nanumpa na sa katungkulan si Alfredo Pascual bilang kalihim ng Department of Trade and Industry (DTI).
Mismong si Pangulong Ferdinand Marcos Jr. ang nanguna sa panunumpa ni Pascual.
Tiwala naman si Pangulong Marcos na patuloy na gagampanan ni Pascual ang kanyang tungkulin nang may buong puso para sa bayan.
Inatasan ni Pangulong Ferdinand Marcos Jr. ang mga kinauukulan na pagkalooban ng service recognition incentive o SRI ang mga empleyado ng executive department at one-time rice allowance ang lahat ng mga kawani ng gobyerno ngayong taon.
Batay sa direktiba ng Presidente, ipinag-utos nito ang pagbibigay ng pantay-pantay na service incentive sa lahat ng executive department personnel na hindi hihigit sa P20,000.
Saklaw ng kautusan ang mga civilian personnel sa mga national government agencies, state universities and colleges o SUCs, government-owned or controlled corporations o GOCCs, regular, contractual o casual employees, pulis, sundalo, at maging ang mga fire at jail personnel sa ilalim ng DILG.
Ang mga tauhan naman ng Bureau of Corrections (BuCor), Philippine Coast Guard (PCG), at National Mapping and Resource Information Authority (NAMRIA) ay ‘entitled’ din na makatatanggap ng nasabing insentibo.
Inanunsiyo ng Communist Party of the Philippines (CPP) na pumanaw na ang kanilang founding chairperson na si Jose Maria Sison sa edad na 83 taong gulang.
Ayon kay CPP spokesman Marco Valbuena, binawian ng buhay si Sison matapos ang dalawang linggong pagkakaratay sa ospital.
Binuo ni Sison ang CPP noong December 26, 1968 hanggang sa mag-exile ito sa Netherlands noong 1980s.
Samantala, hindi naman binanggit ng tagapagsalita ng CPP ang dahilan ng pagkamatay ni Sison.
Binuksan na sa publiko ang Malacañang Palace para sa Simbang Gabi.
Ito ang inanunsiyo ni Pangulong Ferdinand Marcos Jr. matapos itong dumalo sa Christmas party ng mga empleyado ng Office of the President (OP) sa parking area ng Mabini Hall.
Ayon sa Punong Ehekutibo, mayroong misa tuwing alas-4:30 ng umaga sa harap ng Mabini Hall kung saan pinapayagan din ang mga deboto na dumaan sa Gate 6 sa bungad ng Kalayaan Hall.
Matatandaang matapos ang Christmas tree lighting event sa Malacañang, pinangunahan din ng Presidente kamakailan ang gift-giving event at Christmas celebration sa harap pa rin ng Palasyo.
Pinangunahan ng Philippine Air Force (PAF) ang PAF-Media Fellowship Fun Shoot na ginanap sa PAF Firing Range, Colonel Jesus Villamor Air Base, Pasay City.
Idinaos ito bilang pagpapakita ng mas pinaigting na ugnayan at pagtutulungan para sa seguridad at kaligtasan ng mga nasa sektor ng pamamahayag,
Pahayag ng Air Force Public Affairs Office (AFPAO), mahigit 20 miyembro ng local media ang nakasabay ng mga PAF officials at personnel sa nasabing aktibidad.
Sinasabing binuo ang 11 teams kung saan pinaghalo ang mga air force at media players bago isinabak sa friendly competition sa iba’t ibang stages.
Umarangkada ang fun shoot sa pamamagitan ng isang ceremonial shoot na pinangunahan nina PAF Commanding General LtGen Connor Anthony David Canlas Sr., veteran at senior reporter Raoul Esperas ng DWIZ, dating Tourism Undersecretary Ricky Alegre ng DZRH TV, at Air Force Ret. BGen. Gerardo Zamudio ng DWIZ/DWDD (AFP Radio).
Nabatid na natapos ang event sa pangwakas na pananalita ni CG Canlas at pagbibigay ng parangal sa mga nanalo, kasama ang ilang miyembro ng Team DWIZ at PAF officials na humakot ng team awards.
Si PAF Acting Vice Commander MGen. Stephen Parreno ang nanguna awarding ceremonies kung saan nagpasalamat ito sa lahat ng mga lumahok na mediamen, airmen, at iba pang partners.
Umaasa si Parreno, at maging ang mga nasa media sector, na magkakaroon pa ng kaparehong aktibidad sa hinaharap.
Ayon naman sa ilang mamamahayag, “mainam na pagkakataon ito lalo pa’t sinisikap ng pamahalaan na mawala nang tuluyan ang Pilipinas sa listahan ng mga bansang pinakadelikado para sa mga mamamahayag.”
Hindi pa umano natatapos ang laban ng mga kinauukulan upang ipagtanggol at pangalagaan ang buhay ng mga kapatid natin sa hanapbuhay.
Sa kabilang banda, dapat anilang tandaan na “bagama’t kinikilala ng estado ang kahalagahan ng pagkakaroon ng lehitimo at legal na pag-aari ng baril, hindi dapat gawing libangan ang pagpapaputok o pagkalabit ng gatilyo ng armas.”
Dagdag pa nila, “ang pagkakaroon ng baril ay may kaakibat na kasanayan at responsibilidad.”
“Maraming salamat nga pala kina BGen. Zamudio, Pat45 RE sa dagdag na 15 ammo, “Sir Tandoc”, “AW Caronan”, at iba pang AFPAO personnel sa pag-assist sa amin sa fellowship event. Mabuhay po kayo, mga bossing, at God bless!” ayon sa isang miyembro ng Team DWIZ na lumahok sa event.
Itinalaga ni Pangulong Bongbong Marcos si dating LTO chief Teofilo Guadiz III bilang bagong chairman ng LTFRB.
Ayon sa Office of the Press Secretary o OPS, nanumpa na kanina si Guadiz sa harap ni Executive Secretary Lucas Bersamin.
Matatandaang itinalaga ni PBBM si Jay Art Tugade kapalit ni Guadiz bilang LTO chief.
Ang puwesto naman ngayon ni Guadiz sa LTFRB ay dating hawak ni Usec. Cheloy Garafil na ngayo’y officer-in-charge o OIC ng OPS.
Tuluyan nang inalis sa puwesto ni Pangulong Ferdinand Marcos Jr. si National Irrigation Administration Acting Administrator Benny Antiporda.
Ito’y matapos italaga ni Pangulong Marcos si Eduardo Eddie Guillen bilang bagong NIA Acting Administrator.
Ayon sa isang source, ipinagkakatiwala ng punong ehekutibo kay Guillen ang pinakamataas na puwesto sa NIA.
Si Guillen ay sinasabing dating alkalde ng Piddig, Ilocos Norte.
Matatandaang pinatawan ng anim na buwang suspensiyon ng Office of the Ombudsman si Antiporda matapos sampahan ng mga kasong administratibo ng ilang empleyado ng nasabing ahensya.
Sinisikap ng DWIZ Patrol na makuha ang panig ni Antiporda hinggil dito.
Muling nanawagan ng hustisya sa Department of Justice (DOJ) ang mga magulang ng mga batang namatay matapos umanong maturukan ng Dengvaxia.
Ayon sa “Samahan ng mga Magulang Anak ay Biktima ng Dengvaxia”, dapat mag-inhibit sa kaso ang panel of state prosecutors at si Justice Undersecretary Jesse Hermogenes Andres.
Si Andres ay dating abogado ni ex-Health Secretary at ngayo’y Iloilo Congresswoman Janette Garin na isa sa mga respondents sa Dengvaxia cases.
Naniniwala naman ang grupo na si Justice Sec. Boying Remulla ay isang makatarungang tao kaya ito itinalaga ni Pangulong Ferdinand Marcos Jr. bilang DOJ Chief.
Kumpiyansa rin ang mga magulang ng mga nasawing bata sa katapatan ni Remulla sa hustisya kaya’t naniniwala silang diringgin nito ang kanilang panawagan.
Nagbukas ng limang kurso ang Philippine National Police-Special Action Force (PNP-SAF) upang lalo pang mahasa ang kakayahan ng mga operatiba.
Pinangunahan ni PNP chief Gen. Rodolfo Azurin Jr. ang pagbubukas ng mga bagong SAF training courses sa isang simpleng seremonya sa Camp Bagong Diwa, Bicutan, Taguig City.
Kabilang sa mga kursong binuksan ay ang Special Action Force Commando Course, SAF Basic Airborne Course, Basic Mechanized Operation Course, SAF Sniper Course, Intelligence Basic Course, at Parachute Packing Course.
Samantala, nangako si Azurin na mas pahuhusayin pa ng PNP ang operational capability ng SAF upang magampanan nila nang buong puso ang kanilang tungkulin sa publiko at ilalaan ang kanilang mga sarili na maging epektibong miyembro ng pambansang pulisya.
Isinusulong ng Bureau of Immigration o BI ang modernisasyon sa lahat ng immigration-related transactions sa iba’t ibang paliparan sa bansa.
Ayon kay BI Commissioner Norman Tansingco, plano nilang i-modernize at gawing automated ang lahat ng transaksiyon simulan sa susunod na taon upang mapabilis ang pagbibigay ng serbisyo sa mga pasahero.
Nagkasa na rin ng planning activity ang BI sa pangunguna ni Tansingco, kasama sina Deputy Commissioners Ronaldo Ledesma at Rogelio Gevero Jr., upang maisakatuparan ang nasabing proyekto.