Gilbert Perdez

Inanunsiyo ng Bureau of Customs (BOC) ang pagkakasabat sa 20 containers ng mga puslit na sibuyas at iba pang agricultural products na nagkakahalaga ng P171.35 milyon.

Ayon kay Customs Commissioner Yogi Filemon Ruiz, isinalang sa examination ang mga shipment mula Dec. 6 hanggang 22 na nakapangalan sa Taculog J International Consumer Goods Trading.

Dumating sa Manila International Container Port (MICP) ang mga kargamento mula Nov. 12 hanggang Dec. 3.

Karamihan sa mga containers ay idineklarang naglalaman ng mantou o steamed buns habang ang ilan ay frozen food products tulad ng frozen prawn balls, frozen lobster, crab stick, udon noodles at fresh carrots.

Ngunit nang suriin ng BOC ay natuklasang naglalaman ang mga ito ng mga sibuyas at iba pang agri products.

Ayon kay Customs Deputy Commissioner Juvymax Uy, agad ding nagpalabas ng Warrants of Seizure and Detention (WSDs) laban sa lahat ng shipment habang inirekomenda rin ang paghahain ng kaukulang kaso at pagsuspinde sa accreditation ng importer at iba pang mga maaaring sangkot dito.

Ipinag-utos ni Pangulong Ferdinand Marcos Jr. ang pagkakaloob ng gratuity pay sa mga Contract of Service at Job Order na mga kawani ng gobyerno bilang pagkilala sa kanilang pagsisikap o kasipagan sa trabaho.

Ito’y batay sa ipinalabas na Administrative Order no. 3 ni PBBM kung saan sakop dito ang lahat ng mga government employees

Nakapagserbisyo ng kahit apat na buwan ng aktwal na satisfactory performance sa kanilang trabaho at ang mga kontrata ay epektibo pa rin hanggang nitong Dis. 15 ngayong taon.

Ayon sa direktiba ng Presidente, hindi lalagpas sa limang libong piso ang ibibigay sa kanilang gratuity pay sa mga ito.

Ang mga nakapagserbisyo nang wala pang apat na buwan  ay bibigyan pa rin ng one-time gratuity pay sa ilalim ng pro-rata basis o halagang hindi lalagpas ng apat na libong piso para sa tatlong buwan, tatlong libong piso sa mga nakadalawang buwan, at hindi lalagpas sa dalawang libo sa mga nakapagserbisyo ng kulang sa dalawang buwan.

Samantala, hinikayat naman ng Pangulo ang mga lokal na pamahalaan na i-adopt din ang pagbibigay ng gratuity pay sa kanilang mga empleyado.

Nasabat ng Bureau of Customs-Port of Subic (BOC-POS) ang 44 containers ng misdeclared agricultural products mula China.

Ayon kay District Collector Maritess Martin, ang mga shipment ay dumating sa Subic noon pang Dec. 5, 9 at 10.

Nabatid na nag-isyu ng labimpitong alert orders at pre-lodgment orders ang ahensya laban sa mga kargamento na pag-aari ng Asterzenmed Inc. at Victory JM Enterprise OPC.

Sa mga nasabing containers, nasa dalawampu’t apat ang naka-consign sa Asterzen at dalawampu naman sa Victory JM.

Batay sa initial report, lumitaw na ang limang containers ay idineklarang naglalaman ng frozen shabu-shabu balls ngunit may halo itong mackerel, boneless buffalo meat at boneless beef.

Samantala, ang apat na containers naman na nakapangalan sa Victory JM ay sinasabing naglalaman ng tinapay o pastries pero may mga nakasingit na sariwang red onions at iba pang produkto.

Mahigit walumpung milyong piso (P81 milyon) ang halaga ng siyam na containers.

Muling tiniyak sa publiko ng Bureau of Fire Protection (BFP) na may sapat silang bilang ng mga fire trucks na ide-deploy nila sa pagsalubong sa bagong taon.

Ayon kay BFP spokesperson Supt. Analee Atienza, nakikipag-ugnayan sila sa Philippine National Police (PNP) para sa deployment ng mga truck sa mga strategic areas.

Mahalaga aniya ang presensya ng mga ‘force multipliers’ sa Metro Manila tulad ng mga fire volunteers upang matiyak na ligtas ang pagpasok ng bagong taon.

Sa halip na gumamit ng paputok, pinayuhan ni Atienza ang publiko na manood na lamang ng fireworks displays sa mga designated areas sa kanilang mga komunidad.

Matatandaang inatasan ni Pangulong Ferdinand Marcos Jr. ang mga lokal na pamahalaan na gumawa ng mga fireworks displays para sa kanilang mga constituents.

Binigyang diin ng Quezon City government ang kahalagahan ng pagkakaroon ng testing, counselling at consultation para sa Human Immunodeficiency Virus (HIV).

Ito’y matapos makapagtala ang QC Service Delivery Network ng 56% na pagtaas sa bilang ng mga Sexually Transmitted Infections (STI) ngayong 2022.

Batay sa datos, nasa 2,538 STI cases ang naitala mula Enero hanggang Nobyembre ngayong taon na mas mataas kumpara sa 1,625 cases na naitala sa kaparehong panahon noong 2021.

Naililipat ang HIV sa pamamagitan ng pagpapalitan ng body fluids mula sa infected na tao tulad ng dugo, breast milk, semilya at vaginal secretions habang maaari ring mahawa ang sanggol kung may taglay na virus ang buntis na ina.

Samantala, nilinaw naman ng World Health Organization (WHO) na hindi maaaring magdulot ng HIV ang ordinaryo o regular contacts gaya ng paghalik, pagyakap, pagkamay o pagse-share ng personal objects at pagkain o tubig.

Ikinagalak ng isang kongresista ang naging desisyon ng Insurance Commission (IC) na suspendihin ang pagpapatupad ng insurance premium rate hikes sa mga sakuna tulad ng bagyo, baha at lindol.

Ayon kay AGRI Partylist Representative Wilbert Lee, ang pasyang ito ng IC ay maituturing na pamasko sa taumbayan.

Una nang nagpahayag ng pagtutol sa planong pagtataas ng insurance premiums ang ilang kompanya at organized business groups, kabilang ang Philippine Chamber of Commerce and Industry (PCCI), Employers Confederation of the Philippines (ECOP), PHILEXPORT, Philippine Franchise Association (PFA) at iba pa.

Dinalaw at binigyan ng pamasko ni Philippine National Police chief Gen. Rodolfo Azurin Jr. ang mga Pulis na naka-confine sa PNP General Hospital sa Camp Crame, Quezon City.

Bilang Christmas wish, sinabi ni Azurin na hangad niya ang mabilisang paggaling ng mga Pulis.

Kasama si PNP deputy chief for administration Lt. Gen. Rhodel Sermonia at iba pang senior Camp Crame officials, nagpasalamat din si Azurin sa lahat ng mga health service personnel sa walang pagod na pag-aalaga sa kanilang mga pasyente.

Hinikayat din ng PNP chief ang mga ito na ipagpatuloy ang mga magagandang gawain at magtulong-tulong para sa ikakabuti at lalo pang ikagaganda ng kanilang organisasyon.