Gilbert Perdez

Magpapatupad na rin ng COVID tests ang France at Britain sa mga biyahero mula China.

Ang hakbang ay ginawa sa gitna ng panawagan ng World Health Organization (WHO) sa Beijing na maglabas ng real-time data hinggil sa tumataas na bilang ng mga tinatamaan ng virus doon.

Lahat ng mga travelers mula China na magtutungo sa Spain, South Korea, at Israel ay obligado na ring magpakita ng negative test.

Una nang inihayag ni Pangulong Ferdinand Marcos Jr. na posibleng magpatupad ng kaparehong requirement sa mga biyahero mula China kung ito’y batay sa siyensiya at depende sa pangangailangan.

Dalawa na namang mananaya ang napabilang sa listahan ng mga milyonaryo matapos mapanalunan ang mahigit P500-M jackpot sa 6/58 Ultra Lotto.

Ayon sa Philippine Charity Sweepstakes Office (PCSO), natumbok ng dalawang bettors ang winning combination na 01-23-15-03-08-05.

Paghahatian ng dalawang winners ang mahigit P521 milyon na papatawan ng 20% tax at maaaring i-claim sa loob ng isang taon mula sa draw date.

Ang isang nanalo ay mula sa Davao City habang taga-Tacloban City naman ang isa pang winner.

Nagpaalala ang Department of Labor and Employment (DOLE) sa pribadong sektor ukol sa ‘pay rules’ para sa mga papasok na manggagawa ngayong Sabado, Disyembre 31.

Base sa abiso, ipinaliwanag ng ahensya na ang mga papasok ngayong araw ay dapat makatanggap ng bayad na katumbas ng kanilang arawang sahod.

Magugunitang naglabas ng Proclamation 1236 si dating Pang. Rodrigo Duterte noong October 2021 na nagdedeklara sa Disyembre 31 bilang special working day.

Kasabay nito, ipinaalala naman ng DOLE sa mga employers na dapat makatanggap ng 30% na dagdag sa kanilang arawang sahod ang mga manggagawa na papasok naman sa Enero 2, 2023 dahil idineklara itong special non-working day.

Magde-deploy ng mga pulis ang Philippine National Police (PNP) sa mga barangay.

Ayon kay PNP spokesperson Col. Jean Fajardo, ito’y upang matiyak na walang gagamit ng mga paputok at walang mangyayaring untoward incidents sa pagsalubong sa Bagong Taon.

Sinabi ni Fajardo na Nobyembre pa lamang ay nakipag-unayan na sila sa mga lokal na pamahalaan para sa paglalatag ng fireworks displays.

Ipinunto naman ng opisyal na ang mga pulis ay magsisilbing supervisors lamang ng mga force multipliers.