Gilbert Perdez

Tuloy-tuloy ang pamamahagi ng tulong ng Department of Social Welfare and Development (DSWD) sa mga pamilya at indibidwal na apektado ng kalamidad sa iba’t ibang lugar sa bansa.

Pinapurihan naman ni DSWD Officer-in-Charge Edu Punay ang mga empleyado sa kanilang oras at pagsisikap na matugunan ang mga pangangailangan ng mga biktima.

Dahil aniya sa halos walang patid na paghahatid ng ayuda at relief operations ay naihanay ang DSWD sa tatlong best-performing agencies sa bansa.

Mahigit P40 milyong halaga na ng tulong ang naihatid ng ahensya sa Regions 5, 6, 8, 9, 10, 11, 12, Caraga, at Bangsamoro Autonomous Region in Muslim Mindanao (BARMM).

Patay ang isang babaeng call center agent matapos tumilapon mula sa sinasakyan nitong traysikel at nasagasaan pa ng kasunod na truck sa Eastbank Road, Brgy. Sta. Lucia, Pasig City kagabi.

Kinilala ang biktima na si Rochelle Mae Belmonte, nasa hustong gulang, empleyado ng Wells Fargo, at nakatira sa nasabing lugar.

Sa paunang imbestigasyon, nakasakay sa likurang bahagi ng traysikel si Belmonte nang bigla itong mahulog kaya’t nagulungan ng kasunod na truck ang biktima.

Napisak ang ulo ni Belmonte na naging sanhi ng agaran niyang kamatayan.

Pinaghahanap naman ng mga awtoridad ang truck driver na tumakas matapos ang malagim na pangyayari.

Hinangaan ang katapatan ng isang security guard sa Ninoy Aquino International Airport (NAIA) Terminal 2 matapos magsauli ng bag na naglalaman ng P1.5 milyong cash at mga personal na gamit ni Maluso, Basilan Mayor Hanie Bud.

Ayon kay Albert Bautista, sekyu ng Lockheed Security Agency, nagsasagawa siya ng routine traffic patrol sa domestic arrival area nang mapansin niya ang isang kulay asul na trolley bag.

Sa halip na pag-interesan dahil walang CCTV camera sa lugar, agad niya itong dinala sa Airport Police Department at doon na natukoy na naglalaman ito ng malaking halaga ng cash na kalaunan ay nalaman na pag-aari ni Bud.

Sinabi ni Bautista na naniniwala siya sa good at bad karma kaya’t hindi siya nagdalawang-isip na isauli o ibigay sa mga kinauukulan ang napulot niyang bag.

Laking pasasalamat naman ni Bud kay Bautista, gayundin sa Airport Police, matapos maibalik ang kanyang trolley bag. –  mula sa ulat ni Raoul Esperas (Patrol 45)

Iniluklok ni Pangulong Ferdinand Marcos Jr. si Rolando Ledesma Macasaet bilang acting president at chief executive officer ng Social Security System (SSS).

Ayon sa Presidential Communications Office (PCO), nanumpa na nitong Huwebes, Enero 5, si Macasaet kay Executive Secretary Lucas Bersamin bilang bagong pinuno ng SSS.

Noong Marso 2020 ay nagsilbing pangulo at general manager ng Government Service Insurance System (GSIS) si Macasaet at naging board chairman at officer-in-charge din ng ahensya.

Samantala, nanumpa rin kay ES Bersamin ang beteranong mediaman na si Edelberto “Bert” Mozo bilang board of director (BOD) ng Subic Bay Metropolitan Authority (SBMA).

Ibinasura ni Pangulong Ferdinand “Bongbong” Marcos Jr. ang mga kasong administratibo laban sa mga opisyal na idinawit sa naudlot na importasyon ng 300,000 metric tons ng refined sugar.

Batay sa 10-pahinang resolusyon na nilagdaan ni Executive Secretary Lucas Bersamin at inaprubahan ni PBBM, ipinawalang-saysay ang mga kasong grave misconduct, gross dishonesty at conduct prejudicial to the best interest of the service laban kina dating Agriculture senior undersecretary Leocadio Sebastian, dating Sugar Regulatory Administration o SRA administrator Hermenegildo Serafica at dating SRA board members na sina Roland Beltran at Aurelio Gerardo Valderrama Jr.

Matatandaang nagkasa ng ‘motu proprio investigation’ kasunod ng direktiba ni Pangulong Marcos bunga ng alegasyon na pineke ni Sebastian ang lagda ng Pangulo at pinirmahan ang Sugar Order No. 4 na may kinalaman sa importasyon ng asukal noong Agosto ng nakaraang taon.

Ayon kay Bersamin, napatunayan na inisyu ang SO No. 4 ‘in good faith’ o walang masamang intensiyon si Sebastian at iba pa nang gawin nila ito.

Sinabi ni Bersamin na inakala ng mga respondent na awtorisado silang gawin iyon dulot ng miscommunication bunsod na rin ng memorandum noon ni dating ES V ic Rodriguez na nagpapahintulot kay Sebastian na lumagda ng mga kontrata, memorandum of agreement, at administrative issuances.

Samantala, pinayuhan naman ni Pangulong Marcos ang mga opisyal na maging maingat at huwag magpadalos-dalos sa pagdedesisyon lalo pa’t may kinalaman ito sa kanilang trabaho sa gobyerno.

Nanumpa na si Richard Bachmann kay Executive Secretary Lucas Bersamin bilang bagong chairman ng Philippine Sports Commission (PSC) at iba pang mga bagong opisyal ng pamahalaan.

Pinalitan ni Bachmann si Atty. Noli Eala na nagsilbing PSC chief ng mahigit 3 buwan.

Maliban kay Bachmann, kabilang din sa mga nanumpa kay ES Bersamin si retired Police General Gilbert Cruz matapos iluklok ni Pang. Ferdinand Marcos Jr. bilang undersecretary ng Presidential Anti-Organized Crime Commission (PAOCC).

Dating permanent member ng Dangerous Drugs Board (DDB) si Cruz at naging direktor din ng Philippine National Police Academy (PNPA).

Samantala, nanumpa rin si Atty. Rogelio Peig II bilang Undersecretary for Strategic Action and Response Office sa ilalim ng tanggapan ni ES Bersamin.

Magiging Presidential Communications Office (PCO) na ang Office of the Press Secretary (OPS).

Ito’y matapos maglabas ng kautusan si Pangulong Ferdinand Marcos Jr. ukol sa pagpapatupad ng streamlining ng administrative structure ng Office of the President (OP).

Batay sa Executive Order No. 11 na nilagdaan ni Pangulong Marcos, binanggit na ang mga tanggapang nasa ilalim ng OP ay ang PCO, Executive Secretary, Office of the Chief Legal Counsel, Protocol Office and Social Secretary’s Office, at Office of the Special Assistant to the President.

Nakasaad sa EO na ang PCO ang siyang mamamahala pa rin sa messaging system ng executive branch at OP.

Samantala, ang Presidential Management Staff (PMS) naman ay mapupunta na sa ilalim ng pamamahala ni Executive Secretary Lucas Bersamin.

Nagpahayag ng suporta si National Capital Region Police Office (NCRPO) Director Major General Jonnel Estomo sa panawagan ni Interior Secretary Benhur Abalos sa lahat ng heneral at full-pledged colonels sa Philippine National Police (PNP) na magsumite ng kanilang courtesy resignation.

“The appeal to submit courtesy resignation magnifies the strong commitment of our SILG and CPNP PGEN Rodolfo Azurin Jr. to make a fresh start and win the war against illegal drugs,” ayon kay Estomo.

Naniniwala rin si Estomo na ang radical approach ni Abalos sa mga opisyal ng PNP ay makakaapekto sa internal cleansing program ng organisasyon at makatutulong sa pagpapaigting ng mga ground operations.

“As the Regional Director of NCRPO, I hereby lead the Team NCRPO generals and police colonels to render our courtesy resignation to His Excellency, President “Bong-Bong” Marcos Jr through the Chief PNP and Napolcom Chairman/ DILG Secretary Abalos…for the best interest of the country,” dagdag pa ng NCRPO Chief.

Ipinag-utos ni Pangulong Ferdinand Marcos Jr. ang pagsuspinde sa premium hike ng Philippine Health Insurance Corp. (Philhealth) na nakaamba ngayong taon.

Batay sa isang pahinang memorandum na nilagdaan ni Executive Secretary Lucas Bersamin, ipinabatid ng Punong Ehekutibo kina Department of Health officer-in-charge Usec. Maria Rosario Vergeire at Philhealth Acting President at CEO Emmanuel Ledesma Jr. ang tungkol sa pagpapaliban sa taas-kontribusyon ng mga manggagawa.

Ang hakbang ay ginawa ng Pangulo upang mabigyan ng financial relief ang mga empleyado sa gitna na rin ng nagpapatuloy na COVID-19 pandemic.

Nasa .5 percent ang magiging dagdag sana sa kontribusyon sa PhilHealth mula sa kasalukuyang 4 percent o magiging 4.5 percent simula ngayong buwan.

Nangangahulugan na kung ang sahod ng manggagawa ay P10,000, magiging P450 na ang hulog nito mula sa kasalukuyang P400.

Kung mas mataas sa P10,000 hanggang mababa sa P80,000 ang sahod ng manggagawa, papalo sa P850 o magiging P50 ang dagdag-kontribusyon ng mga miyembro ng state insurer.

Una nang ipinaliwanag ng Philhealth na ikakasa ang premium hike upang mapahusay ang benepisyong natatanggap ng mga miyembro, alinsunod na rin sa Universal Health Care Act.