Gilbert Perdez

Naglaan ng tatlong milyong pisong pondo ang pamahalaan para sa pagkukumpuni ng mga school buildings na napinsala ng kalamidad sa Misamis Oriental.

Sa situation briefing sa Gingoog City, MisOr, tiniyak ni PBBM sa lokal na pamahalaan na pinaaasikaso na niya ang pagre-release ng pondo para rito.

Ayon sa Pangulo, nasa 63 na silid-aralan ang napinsala ng pag-ulan at pagbaha na dulot ng shear line.

Kasabay nito, inatasan ni PBBM ang Department of Public Works and Highways (DPWH) na madaliin ang pagsasaayos ng mga imprastraktura sa oras na humupa na ang tubig-baha.

Namahagi ng tulong pinansiyal si Pang. Ferdinand Marcos Jr. sa mga mangingisda at magsasaka na apektado ng mga pag-ulan at pagbaha sa Northern Mindanao.

Pinangunahan ni PBBM ang pamimigay ng tig-limang libong piso sa mga benepisyaryo sa ilalim ng Assistance to Individuals in Crisis Situations o AICS program sa Gingoog City Hall sa Gingoog, Misamis Oriental.

Tiniyak ng Pangulo na tutulungan ang mga residente na maitayo muli ang kanilang mga tirahan.

Sa ginanap na situation briefing, iniulat ng lokal na pamahalaan ng Gingoog [Hingoog] na umakyat na sa 18,452 ang bilang ng mga pamilyang apektado ng kalamidad.

Nasa 45 sa 59 na barangay ang apektado ng kalamidad kung saan karamihan sa mga napuruhan ay mula sa mga coastal areas.

Nagpahayag ng pakikiisa si Pangulong Ferdinand Marcos Jr. sa mga Pilipinong Katoliko sa pagdiriwang ng Pista ng Itim na Nazareno ngayong araw, Enero 9.

Habang ipinamamalas aniya ng mga mananampalataya ang kanilang debosyon sa Poong Nazareno, dapat alalahanin ang malalim na ugat ng ating kultura sa paggapi ng mga matitinding pagsubok at kapighatian.

Hangad din ni Pangulong Marcos ang ligtas, makabuluhan, at taimtim na pagdiriwang ng mga deboto ng Feast of the Black Nazarene.

Limang police chiefs at unit commanders sa Negros Oriental ang itinalaga sa panibagong posisyon ilang oras bago nagbaba ng courtesy resignations ang mga matataas na opisyal ng PNP-Central Visayas.

Ito’y matapos ipag-utos ni Provincial Police Chief Col. Reynaldo Lizardo ang paglipat kay Lt. Col. Richard Gadingan, Chief of the Police Community Affairs Development Unit (PCADU) ng probinsya, bilang Tanjay City Chief of Police.

Pinalitan ni Gadingan si Lt. Col. Ronoel Fungo na inilipat naman bilang head ng Dumaguete police habang ang dating hepe rito na si Lt. Col. Joeson Parallag ay pinuno na ngayon ng PCADU.

Tinanggal naman si Maj. Fortunato Villafuerte bilang Bacong police chief at itinalaga bilang acting Police Chief ng Ayungon.

Mula naman sa provincial office, inilipat si Maj. Antonio Jabar bilang bagong Bacong Police Chief at Assistant PCADU Chief.

Samantala, iniluklok naman si Capt. Rafael Serion bilang acting Basay Police Chief habang mula sa Dumaguete Police Station ay itinapon si Lt. Jito Buloron bilang acting police chief ng Vallehermoso.