Hinarang ng mga awtoridad sa paliparan ang sampung flight attendants ng Philippine Airlines (PAL) dahil sa mga nadiskubreng sibuyas, lemon, strawberries at blueberries sa kanilang mga bagahe.
Sa report ni Deputy Collector for Passenger Services Atty. Ma. Lourdes Mangaoang kay Airport Customs District Collector Carmelita Talusan, ang sampung empleyado ng PAL ay dumating sa NAIA Terminal 1 lulan ng magkahiwalay na flights mula Riyadh at Dubai.
Isiniwalat ni Mangaoang na hindi idineklara ng mga crew sa customs baggage declaration form ang 27 kilos ng sibuyas, 10.5 kilos ng lemon, at isang kilo ng strawberries at blueberries kaya’t kinumpiska ang mga ito.
Sinabi ni Mangaoang na dinala na sa Bureau of Plant Quarantine ang mga nakumpiskang items para sirain.
Nakatakda namang sampahan ng mga kaukulang kaso ang sampung flight attendants. —ulat mula kay Raoul Esperas (Patrol 45)