Isinilang na ang anak ni television host KC Montero at asawa nitong si Filipino-Australian model Stephany Dods.
Sa Twitter, ibinahagi ni Montero sa publiko na lalaki ang kanilang anak at pinangalanan nila itong Wyatt Cody Miller.
Bumuhos naman ang mga pagbati kina Dods at Montero na ikinasal noon pang Setyembre 2019.
Kahit Presidente pa ng bansa, puwedeng parusahan kapag lumabas sa mga health protocols.
Ito ang napatunayan sa bansang Chile matapos patawan ng multang $3,500 o nasa P168,000 ang kanilang Pangulo na si Sebastian Pinera.
Natuklasan kasi ng mga awtoridad na nag-selfie si Pinera sa isang beach kasama ang isa pang bystander habang walang suot na face mask.
Agad namang nagbayad ng multa si Pinera kasabay nang paghingi ng paumanhin sa publiko makaraang kumalat sa social media ang kanyang larawan.
Mahigit 500,000 na ang bilang ng mga tinamaan ng COVID-19 sa Chile habang higit 16,051 din ang mga nasawi doon.
Tila atat nang sumabak muli si Utah Jazz guard Jordan Clarkson sa susunod na season ng NBA.
Katunayan, ayon kay Clarkson, handa na sila sa pagbubukas ng bagong season ng liga.
Hindi rin nangangamba ang Filipino-American player sa maikling preparasyon ng kanilang koponan at naniniwala siyang hindi ito makakaapekto sa performance nila sa hard court.
Iwasan muna ang pisikal na pangangaroling at pagkanta sa karaoke o videoke.
Ito ang inirerekomenda sa publiko ng Department of Health (DOH) dahil pa rin sa banta ng COVID-19.
Sa halip ay inirerekomenda ng DOH sa pamamagitan ng isang advisory ang pagsasagawa ng online at virtual activities.
Mas maigi rin umanong makinig na lang ng musika sa halip na kumanta upang makaiwas sa droplets na maaaring maging dahilan ng pagkalat ng COVID-19.
Muling nilinaw ng Department of Health (DOH) na wala pang inaprubahang bakuna ang gobyerno laban sa COVID-19.
Dahil dito, pinaalalahanan ng DOH ang publiko na maging maingat at i-report sa mga awtoridad o sa Food and Drugs Authority (FDA) sakaling may mag-aalok at magbebenta sa kanila ng Coronavirus vaccine.
Pinaiiwas muna sa mga matataong lugar ang lahat at kung lalabas naman ay dapat sumunod sa minimum public health standards.
Nakapagtala ang Department of Health (DOH) ng 436 na bagong recoveries mula sa Coronavirus Disease 2019 (COVID-19).
Dahil dito, sumampa na sa 421,086 ang kabuuang bilang ng mga gumaling sa sakit sa buong bansa o katumbas ng 91.9% ng total recoveries.
Sa pinakahuling COVID-19 case bulletin ng DOH, pumalo naman sa 458,044 ang total cases bunsod ng 1,491 na bagong kaso kung saan 28,047 dito ang active cases.
Mas maraming bagong kaso ang naitala sa Quezon City na 129 na sinundan ng Rizal (102), Benguet (81), Davao City (75), at Laguna (54).
Samantala, bunsod naman nang pagpanaw ng 36 pang pasyente ay umakyat na sa 8,911 ang death toll sa buong bansa.
Magiging isang full medal event na ang eSports sa 2022 Asian Games.
Sinasabing ito ang napagdesisyunan sa general assembly ng Olympic Council of Asia kung saan kasama na ang eSports at breakdancing sa programa sa Games na gaganapin sa Septembre 2022 sa Hangzhou, China.
Una rito, inaprubahan na rin ang breakdancing, skateboarding, surfing at sport climbing para sa Paris 2024 Olympics.
Matatandaang naging sikat na demonstration event ang eSports sa 2018 Asian Games noong Jakarta habang ginawa naman itong isang medal sport sa Southeast Asian Games sa Pilipinas noong nakaraang taon.
Pumanaw na ang British actor na Jeremy Bulloch sa edad na 75 taong gulang.
Napag-alaman na si Bulloch ay binawian ng buhay sa isang ospital sa Tooting, South London dulot ng komplikasyong dala ng Parkinson’s disease.
Matatandaang ginampanan ni Bulloch ang papel ng bounty hunter na si Boba Fett sa Star Wars films tulad ng “The Empire Strikes Back” at “The Return of the Jedi.”
Unang nakilala si Bulloch sa ilang palabas sa telebisyon noong 1970s at 80s kabilang na rito ang “Doctor Who” at “Robin of Sherwood.”
Arestado ang isang dating alkalde sa Chihuahua state sa Mexico dahil sa umano’y pagkakasangkot sa kasong pagpatay sa isang mamamahayag noong 2017.
Ayon sa korte, hinihinalang si Hugo Amed Shultz ang nagbigay ng impormasyon sa isang organisadong crime group na siyang pumaslang sa journalist na si Miroslava Breach.
Ang Mexico ay kasama sa listahan ng Reporters Without Borders ng mga bansang mapanganib para sa mga mamamahayag.
Si Breach ay isa sa 11 journalists na napatay at nagkober sa giyera kontra droga ng Mexican government.
Inamin ni Biliran Governor Rogelio Espina na dinapuan siya ng COVID-19 at maging ang kanyang misis na si Dra. Cecil Espina.
Ayon kay Espina, maaaring nakuha nila ang virus mula sa 2 empleyado na nagtatrabaho sa kanilang opisina na unang tinamaan ng impeksiyon.
Aniya, unang nagpositibo sa test ang kanilang mga kawani na kapwa asymptomatic at kasalukuyang sumasailalim sa quarantine.
Nagsasagawa na ngayon ng contract tracing upang matunton ang lahat ng mga nakasalamuha ng mga ito.