Isa ang kumpirmadong nasawi habang sugatan naman ang 40 na iba pa matapos madiskaril ang isang tren sa Sindh province, Pakistan.
Ayon kay railway official Kamran Lashari, galing ng Karachi City ang tren at patungong Lahore City nang maganap ang trahedya.
Habang tumatakbo ito ay bigla na lamang umanong lumihis ang anim na bahagi ng tren at nahulog sa kanal.
Inaalam pa kung ilan ang eksaktong bilang ng mga pasahero, gayundin ang dahilan ng pagkadiskaril ng naturang tren.
Bibida si Filipina-Japanese golfer Yuka Saso sa Philippine Sportswriters Association (PSA) Awards ngayong taon.
Ito’y makaraang i-anunsiyo ng media organization na itinanghal nila si Saso bilang Athlete of the Year.
Magugunitang nakasungkit ng dalawang Ladies Professional Golf Association titles sa Japan ang 19-anyos na si Saso habang nagpakitang-gilas din ito sa US Open makaraang makatapos ng 13th overall.
Sa kabila ng pandemya, natapos din ni Saso ang 2020 na taglay ang No. 45 spot sa world rankings habang kumita rin umano ito ng tinatayang P50 milyon.
Inatasan ng Presidential Task Force on Media Security (PTFoMS) ang Philippine National Police (PNP) na mas paigtingin pa ang pagtugis sa pangunahing suspek sa pagpatay sa broadcaster na si Eduardo Sanchez Dizon sa Kidapawan City.
Sa isang memorandum kay Brig. Gen. Michael John Dubria, direktor ng Police Regional Office o PRO-12, ipinag-utos ni PTFoMS Executive Director Joel Sy Egco ang pagbuo ng Special Tracker Teams upang mas mapabilis ang paghuli kay Tabusares at sa isa pang umano’y kasabwat nito na si Junell Poten.
Si Dizon ay nasawi matapos tambangan ng riding-in-tandem habang pauwi ng kanilang bahay sa Makilala noong Hulyo 10, 2019.
Nakapagtala ang Philippine Red Cross ng mas mataas na COVID-19 positivity rate sa kanilang confirmatory tests mula noong nakaraang buwan.
Ayon kay Dr. Paulyn Ubial, head molecular laboratories ng PRC, kung noong Disyembre hanggang Enero ngayong taon ay nasa dalawa hanggang apat na porsiyento lamang ang positivity rate ng ahensya, nitong Pebrero ay pumalo na ito sa pito hanggang 11 % .
Mahigit 400 samples na rin aniya ang ipinadala ng PRC sa Philippine Genome Center (PGC) para isalang sa sequencing.
Sinampahan na ng mga kasong kriminal ang walong hinihinalang miyembro ng Al Khobar group na umano’y nasa likod ng pambobomba sa Tulunan, North Cotabato noong Enero.
Kabilang sa mga nahaharap sa mga kasong murder at frustrated murder sina Salahudin Hassa, Lutre Aman, Tasly Saligan, Norodrin Haman, Datu Ali Camsa, Sandali Sindatok, Jordan Kamad, at Tahir Abubakar.
Matatandaang sumabog ang bomba sa isang waiting shed sa Barangay Sibsib na ikinasawi ng fruit vendor na si Gina Paunon habang nasugatan naman ang dalawang iba pa.
Ikakasa na bukas, lunes ika-8 ng Marso ang pagbabakuna kontra COVID-19 sa mga health workers sa Bulacan.
Ayon kay Dr. Hjordis Celis, hepe ng Response Cluster ng Provincial Task Force against COVID-19, ang kabuuang 900 doses ng Sinovac vaccine na kanilang gagamitin ay bahagi ng donasyon ng China sa Pilipinas.
Sinabi ni Celis na aarangkada ang vaccination program sa Hiyas ng Bulacan Convention Center kung saan kasama siya sa mga unang babakunahan.
Inatasan ng Pangulo ng Paraguay na si Mario Abdo Benitez ang lahat ng cabinet ministers na magbitiw sa puwesto.
Ang hakbang ay ginawa ni Benitez matapos magkasagupa ang mga demonstrador at mga pulis sa kilos-protesta ng mga mamamayan dahil sa umano’y palpak na paghawak ng gobyerno sa Covid-19 crisis.
Matatandaang ipinanawagan din ng mga raliyista ang pagre-resign ni Benitez dulot ng patuloy na pagtaas ng bilang ng impeksiyon sa kanilang bansa kung saan halos masagad na ang kapasidad ng mga ospital.
Hindi pipilitin ng pamunuan ng National Basketball Association o NBA ang mga manlalaro na magpabakuna kontra COVID-19.
Bukod dito, ayon kay NBA commissioner Adam Silver, kapag gumanda na ang sitwasyon ay posibleng ibalik na nila ang normal schedule ng liga sa susunod na season.
Gayunman, nilinaw ni Silver na wala pa silang balak na magdaos ng overseas exhibition o regular-season games sa labas ng Estados Unidos.
Ikinasal na ang aktres na si Empress Schuck sa kanyang long-time boyfriend na si Vino Guingona.
Sa post ni Empress sa Instagram, nabatid na nagpalitan ng “I Do” ang dalawa sa Hillcreek Gardens sa Tagaytay City kahapon.
Ngayong nabigyan na ng basbas ang kanilang relasyon bilang mag-asawa, inulan ng kaliwa’t kanang pagbati sina Empress at Vino mula sa kanilang mga kaibigan at fans.
Si Guingona ay dating modelo na apo ni dating vice president Teofisto Guingona Jr. at pamangkin ni dating Senador Teofisto Guingona III.
Isinisisi ng Department of Health (DOH) sa mga paglabag sa minimum health standards ang pagtaas ng bilang ng kaso ng coronavirus disease o COVID-19 sa bansa.
Ayon kay Health Undersecretary Maria Rosario Vergeire, ang presensya ng mas nakakahawang coronavirus variants ay maituturing lamang na isa sa mga posibleng sanhi o “aggravating factors” sa pagtaas ng bilang ng impeksiyon.
Kasabay nito, muling nanawagan sa publiko si Vergeire na tumalima pa rin sa mga health protocols sa kabila ng pagluluwag ng quarantine restrictions sa iba’t ibang panig ng bansa.