Inilabas na ni Rosé ng Blackpink ang music video ng kanyang solo single na “On The Ground.”
Ang mahigit tatlong minutong video na in-upload sa official YouTube page ng South Korean female group ay humakot na ng mahigit 22 million views kagabi.
Matatandaang inanunsiyo ng YG Entertainment na lahat ng mga miyembro ng Blackpink ay magkakaroon ng kanya-kanyang solo acts.
Ipinag-utos ng Inter-Agency Task Force (IATF) ang “full implementation” ng contact-tracing application o app sa loob ng 10 araw.
Ayon kay Palace spokesman Harry Roque, plantsado na ang mga nakitang problema sa StaySafe app at isa ito sa mga sinasabing weakest point sa COVID-19 response ng pamahalaan.
Matatandaang isiniwalat ni contact-tracing czar at Baguio Mayor Benjamin Magalong na dapat matunton ang 30 hanggang 37 indibidwal na nakasalamuha ng isang COVID-19 positive.
Masuwerteng hindi napuruhan ang isang pulis matapos pasabugan ng improvised explosive device ang kanilang patrol car sa Barangay Pughanan, Lambunao, Iloilo.
Ayon sa Lambunao Police, lulan ng back-to-back patrol car si Police Master Sergeant Christopher Losbañez at iba pa nang maganap ang insidente kung saan tinamaan ng shrapnel ang kanyang kamay.
Sa imbestigasyon, papunta sana sa Barangay Panuran ang mga pulis para imbestigahan ang engkuwentro noong Huwebes nang mangyari ang pagsabog.
Wala pang umaakong grupo sa naturang pag-atake.
Tiniyak ng Department of Health (DOH) sa publiko na sapat pa ang panahon ng gobyerno para maipamahagi ang ikalawang “dose” ng COVID-19 vaccines ng AstraZeneca bago ang expiration nito sa Mayo.
Ayon kay Health Undersecretary Maria Rosario Vergeire, walang katotohanan ang mga kumalat na report na nagmamadali ang DOH sa pag-administer ng nasabing bakuna bago umano ito mawalan ng bisa.
Matatandaang nakakuha ang Pilipinas ng 525,600 doses ng AstraZeneca vaccines at 600,000 doses naman mula sa Sinovac.
Sinabi rin ni Vergeire na walang ginawang bakuna sa ilalim ng “emergency use authority” sa buong mundo na may mahabang expiry date.
Hindi lehitimo ang umano’y kumalat na resolusyon na humihimok kay Pangulong Rodrigo Duterte na tumakbo sa pagka-bise presidente sa 2022 national elections.
Ito’y dahil ayon kay PDP-Laban president at Sen. Manny Pacquiao, hindi pa naisasapinal ang kanilang line-up para sa halalan sa susunod na taon.
Sinasabing nilagdaan ng maraming alkalde at mga mambabatas ang resolusyon na may petsang Marso 8 habang nakapirma rin umano rito ang deputy party secretary general ng partido na si Melvin Matibag.
Kasama naman sa mga tinukoy na signatories sina MMDA chairman Benhur Abalos, Mandaluyong Mayor Carmelita Abalos, Quezon City Rep. Alfred Vargas, at Parañaque City Mayor Edwin Olivares.
Samantala, nilinaw naman ni Sen. Aquilino Pimentel III na kahit nagkaroon ng kalituhan sa resolusyon ay hindi ito nangangahulugan na watak-watak na ang kanilang partido.
Arestado ang isang 64-anyos na lolo matapos umanong gahasain ang kanyang tatlong taong gulang na apo sa Pampanga.
Kinilala ang suspek na si alyas Juan, residente ng bayan ng Sasmuan.
Sa imbestigasyon, nadiskubre ng mga magulang ng biktimang si alyas Nene ang sinapit nito kaya’t agad na nagsumbong sa pulisya na nagresulta sa pagkakadakip ng suspek.
Nakakulong na ngayon si alyas Juan at nakatakdang sampahan ng kasong rape at child abuse.
Suspendido hanggang ika-16 ng Marso (Martes) ang on-site work sa punong tanggapan ng Department of Justice (DOJ).
Ito’y ayon kay Justice Secretary Menardo Guevarra upang bigyang daan ang disinfection bunsod ng mga naitatalang kaso ng COVID-19 sa kanilang tanggapan.
Gayunman, nilinaw ni Guevarra na nagtatrabaho pa rin ang kanilang mga empleyado sa pamamagitan ng work-from-home arrangement.
Samantala, suspendido rin ang trabaho sa punong tanggapan ng Supreme Court (SC) na katabi lang ng DOJ hanggang bukas, ika-14 ng Marso, dahil pa rin sa isinasagawang disinfection.
Inihayag ng Department of Health (DOH) na pumalo na sa 114,615 ang kabuuang bilang ng mga nabigyan ng AstraZeneca at Sinovac vaccines.
Ayon kay Health Undersecretary Maria Rosario Vergeire, nasa 101,827 na ang naturukan ng CoronaVac habang 12,788 naman ang mga nakatanggap ng AstraZeneca.
Pinakamarami mula sa Metro Manila (40.7%), Cordillera Administrative Region (CAR) (13.9%), at Region 12 (11.7%).
Sinasabing karamihan naman sa mga naturukan ng bakuna ng AstraZeneca ay mula sa NCR, CAR, Ilocos Region, at Calabarzon.
Samantala, batay sa datos ng DOH, nasa 978 na ang mga indibidwal na nakaranas ng hinihinalang “adverse events” matapos mabakunahan.
Laya na ang isang British-Iranian national na inakusahang sangkot sa tangkang pagpapabagsak sa pamahalaan ng Iran.
Ayon sa ulat, nakumpleto na ni Nazanin Zaghari-Ratcliffe ang kanyang limang taong sentensiya para sa kasong sedisyon kung saan tinanggal na rin ang kanyang electronic tag.
Gayunman, muli umano itong nakatanggap ng summon mula sa korte para naman sa panibagong kaso na isinampa laban sa kanya.
Dahil dito, hindi pa rin malinaw ngayon kung maaari na itong umuwi ng London.
Si Zaghari-Ratcliffe ay inaresto noong 2016 matapos akusahan ng pang-eespiya sa Iran nang magtungo ito roon kasama ang kanyang anak na babae.
Lumarga na ang vaccination program ng pamahalaan sa Occidental Mindoro matapos dumating doon ang 750 doses ng bakuna ng Sinovac.
Kasama sa mga unang tinurukan ng bakuna si Dr. Rylan Howell Superiano, chief of clinic ng Occidental Mindoro Provincial Hospital.
Sa 318 health workers at empleyado ng provincial hospital, 228 lamang ang nagpabakuna.
Ngayon araw, magsisimula naman ang vaccination sa Oriental Mindoro.
Samantala, nabakunahan na rin ang ilang health workers sa Cagayan Valley, kabilang si Dr. Glenn Mathew Baggao, medical director ng Cagayan Valley Medical Center (CVMC) sa Tuguegarao City.
Itinakda naman ngayong araw ang pagbabakuna sa ilang ospital sa Cagayan Valley habang sinimulan na rin ang katulad na programa sa Sarangani kung saan unang tinurukan si provincial health officer Dr. Arvin Alejandro.