Sarado ang punong tanggapan ng Bureau of Immigration (BI) sa Intramuros, Maynila bukas at sa Marso 16.
Ayon kay immigration Commissioner Jaime Morente, ito’y upang bigyang daan ang sanitation at disinfection sa kanilang tanggapan.
Dahil dito, inabisuhan ng ahensya ang mga mayroong kumpirmadong online appointments na i-rebook ang kanilang schedule.
Samantala, may mga nakatalaga namang skeleton workforce para sa general at critical support services ng nasabing ahensya.
Aabot sa P6.8 milyon halaga ng hinihinalang shabu ang nasabat ng mga awtoridad mula sa dalawang drug suspek sa buy-bust operation sa Barangay Kalanagan sa bayan ng Pantar, Lanao del Norte.
Ang mga suspek na sina alyas Nena at alyas John ay nadakip ng pinagsanib na puwersa ng Philippine Drug Enforcement Agency-Northern Mindanao (PDEA), National Bureau of Investigation at Pantar PNP.
Samantala, anim naman ang nasakote ng mga ahente ng PDEA sa Barangay Hinaplonan sa Iligan City kung saan tinatayang P68,000 na halaga ng pinaniniwalaang shabu ang nakumpiska mula sa mga ito.
Kasong paglabag sa Comprehensive Dangerous Drugs Act ang isasampa laban sa mga suspek.
Apat ang kumpirmadong patay habang sugatan naman ang dalawang iba pa sa pagbagsak ng isang military plane sa Almaty City, Kazakhstan.
Sa imbestigasyon, galing ng Nur-Sulta at palapag na sana ng paliparan sa Almaty ang military aircraft nang bigla itong umusok hanggang sa sumalpok ito sa dulo ng runway.
Inaalam pa ang sanhi ng pagbagsak ng eroplano na sinasabing pag-aari ng border guard agency ng Kazakhstan.
Bigo ang Pinoy fighter na si Rolando Dy kay Abdisalam Kubanychbek ng Kyrgyzstan sa kanilang lightweight title eliminator sa Brave CF 47: Asian Domination sa Arad Fort sa Bahrain.
Ayon sa ulat, dahil sa malupit na ground game ni Kubanychbek ay hindi ito kinaya ni Dy kaya’t hindi na ito bumalik pagsapit ng ikatlong round.
Samantala, sa puntos naman natalo ang isa pang Pinoy na si Jenel Lausa sa kamao ni Ryskulbek Ibraimov ng Kyrgyzstan.
Walo ang nasawi habang sugatan ang 50 iba pa sa panibagong karahasan sa Afghanistan.
Ayon kay Interior Ministry Spokesman Tariq Arian, bigla na lamang sumabog ang isang car bomb sa Herat province na ikinasawi ng maraming tao.
Wala pang umaakong grupo sa nasabing pambobomba.
Nabunyag na hiwalay na sina singer Jennifer Lopez at dating New York Yankees baseball star Alex Rodriguez.
Sa ulat ng TMZ, binanggit ang ilang sources na nagsabing split na ang celebrity couple matapos ang apat na taong pagsasama.
Matatandaang inanunsiyo ni Rodriguez noong 2017 na nagde-date sila ni J.Lo habang noong March 2019 naman ay nabulgar na engaged na ang dalawa.
Samantala, isiniwalat naman sa hiwalay na report ng Entertainment Tonight na si Lopez ang nakipag-break kay Rodriguez sa hindi tinukoy na rason.
Oobligahin na ng Bohol ang mga papasok na turista sa kanilang lugar na sumalang sa swab test.
Ayon kay Bohol Gov. Arthur Yap, dapat ang RT-PCR test results ay nakuha o inilabas 72 oras bago umalis ang biyahero patungo sa kanilang lalawigan.
Sinabi ni Yap na dapat ay wala ring makikitang sintomas ng COVID-19 sa mga papasok na turista sa kanilang probinsya.
Inihayag ng Food and Drug Administration (FDA) na nakumpleto na ng Sputnik V ang mga dokumento para sa kanilang emergency use application o EUA sa Pilipinas.
Ayon kay deputy director general for field operations Dr. Oscar Gutierrez Jr., isasailalim pa sa evaluation ang aplikasyon ng Gamaleya Institute ng Russia.
Matatandaang lumabas sa medical journal na The Lancet na 91.6 % ang efficacy rate ng Sputnik V laban sa coronavirus.
Isinailalim sa Extreme Localized Community Quarantine (ELCQ) ang dalawang lugar sa Muntinlupa City bunsod ng tumataas na bilang ng mga tinamaan ng COVID-19 doon.
Ayon kay Public Information Office (PIO) Chief Tez Navarro, sa pamamagitan ng executive order ni Mayor Jimmy Fresnedi ay ikinasa ang 14-day localized lockdown sa Cruzero Street, Villa Carolina 1 sa Barangay Tunasan at 124 Purok 1 sa Barangay Cupang.
Batay naman sa rekord ng City Health Office, nakapagtala ito ng mataas na transmission rate na 57 persons per 1,000 people mula Pebrero 27 hanggang Marso 6 sa Cruzero Street habang 150 per 1,000 people naman ang attack rate sa 124 Purok 1 sa kaparehong panahon.
Samantala, nagpatupad na rin ng lockdown sa Barangay Pio del Pilar (District 1) sa Makati City upang mapigilan ang pagkalat ng impeksiyon sa naturang lugar.
Patay ang anim na minero habang sugatan naman ang dalawang iba pa sa naganap na pagsabog sa isang minahan sa probinsya ng Balochistan sa Pakistan.
Ayon sa mga awtoridad, bigla na lamang sumabog ang isang tangke ng methane gas at na-trap ang walong indibidwal na ikinasawi ng anim sa mga ito.
Pahayag naman ng Balochistan Coal Mines Workers Federation, mahigit isang daang minero ang nasawi sa magkakahiwalay na insidente noong nakaraang taon sa nasabing probinsya.