Gilbert Perdez

Bagama’t mas nakakahawa ang bagong Filipino variant ng COVID-19 na natuklasan sa Pilipinas ay posible namang wala itong kakayahang magdulot ng mas malalang sakit.

Ito ang inihayag ng Philippine Genome Center matapos kumpirmahin ng Department of Health na mayroon nang P.3 variant sa bansa at nasa 98 cases na ang na-detect nito.

Ayon kay PGC executive director Cynthia Saloma, hindi naman nakitaan ng mas malubhang sintomas kahit ang mga tinamaan ng bagong variant kaya’t naniniwala itong hindi deadly o nakamamatay ang nasabing virus.

Tiniyak ng Metro Rail Transit Line 3 (MRT-3) na kakastiguhin nito ang kanilang mga tauhan matapos kumalat ang kontrobersyal na video kung saan bara-bara o madalian lang ang ginawang pag-disinfect sa mga hawakan ng tren.

Pahayag ng Department of Transportation (DOTr), hindi nila kinukunsinti ang mga ganoong gawain at katunayan ay nahaharap na sa disciplinary action ang cleaning staff ng MRT.

Giit ng DOTr, lahat ng public concerns ay tinutugunan nila, partikular ang kahalagahan ng maayos na disinfection sa kanilang mga tren ngayong pandemya.

Gayunman, hindi binanggit ng ahensya kung anong sanction ang ihahagupit nila sa kanilang mga empleyadong nakunan ng video na tila naglalakad lamang habang bitbit ang basahan at disinfectant spray sa loob ng tren.

Hindi nakalusot sa mga tauhan ng Bureau of Immigration ang 11 Chinese tourists na nagtangkang pumasok sa bansa.

Ayon kay Immigration Commissioner Jaime Morente, idinahilan ng mga dayuhan na inimbitahan sila ng dalawang telecommunications companies para sa dumalo sa kanilang komperensiya.

Ang mga turista ay sinasabing lulan ng China Southern Airlines nang dumating ng Maynila galing Guangzhou at pawang may hawak na ‘exemption documents’ at ‘temporary visitor visa’.

Gayunman, sinabi ni Morente na magkakasalungat ang pahayag ng mga suspek at hindi rin umano sapat ang mga dokumentong hawak ng mga ito para payagan silang makapasok ng bansa.

Dahil dito, agad na pinabalik sa kanilang bansa ang mga dayuhan at inilagay ang mga pangalan sa immigration blacklist.

Nanawagan sa Inter-Agency Task Force (IATF) ang isang opisyal ng Department of the Interior and Local Government (DILG) na isama ang mga gobernador, alkalde at barangay chairmen sa mga prayoridad na mabakunahan kontra COVID-19.

Ayon kay DILG Undersecretary Martin Diño, kung maisasama sa listahan ang mga lokal na opisyal ay mahihikayat ang publiko na magpaturok laban sa impeksiyon.

Samantala, iginiit din ni Diño na maituturing ding mga frontliners ang mga nagtatrabaho sa media kaya’t mahalagang mabakunahan ang mga ito sa lalong madaling panahon.