Pitong pang Pilipino sa labas ng bansa ang tinamaan ng coronavirus disease 2019 (COVID-19).
Ito’y batay sa datos ng Department of Foreign Affairs (DFA) dahilan upang umakyat na sa 15,948 ang impeksiyon doon.
Ayon sa DFA, nasa 9,666 na ang recoveries kasunod ng paggaling ng 17 pang pasyente.
Isa naman ang nadagdag sa bilang ng mga nasawi kaya’t sumampa na sa 1,045 ang death toll habang nasa 5,237 ang active cases sa hanay ng mga Pinoy sa ibayong dagat.
Tinamaan ng COVID-19 ang 33 empleyado ng Supreme Court.
Bunga nito, inirekomenda ng Office of Administrative Services ng mataas na hukuman ang pagtatalaga ng skeleton force hanggang ika-26 ng Marso.
Magugunitang sinuspinde ni Chief Justice Diosdado Peralta ang pasok sa kanilang tanggapan mula ika-11 hanggang ika-14 ng Marso upang bigyang daan ang disinfection sa mga gusali nito na matatagpuan sa Padre Faura sa Maynila.
Nilinaw ng Civil Service Commission (CSC) na tuloy-tuloy pa rin ang serbisyo ng mga ahensya ng pamahalaan.
Ito’y ayon kay Liza Agamata, director ng Public Assistance and Information Office ng CSC, kahit marami sa mga ito ay naka-lockdown bunsod ng paglaganap ng COVID-19.
Balik-operasyon na ang CSC kahapon habang naka-lockdown pa rin ang Senado, Kongreso, Department of Social Welfare and Development o DSWD at ang on-site work ng Department of Agriculture at Department of Justice.
Sinabi ni Agamata na may mga empleyado pa rin naman ng mga ahensya na naka-work from home at online ang serbisyo ng karamihan sa mga ito.
Gayunman, hinakayat ni Agamata ang publiko na mag-check sa mga website ng mga tanggapan na nais puntahan para matiyak na bukas ito.
Wala pang natatanggap na official application ang Food and Drug Administration (FDA) para sa emergency use authorization ng COVID-19 vaccines ng Johnson & Johnson, Moderna at Sinopharm.
Ayon kay FDA director-general Eric Domingo, bagama’t nagpahayag na ng intensiyon ang dalawa sa mga nasabing kompanya ay wala pang isinusumiteng aplikasyon ang mga ito sa kanilang tanggapan.
Sinabi naman ni Domingo na nabigyan na rin nila ang tatlong vaccine makers ng listahanan ng mga dokumento at requirements para maaprubahan sana ang kanilang aplikasyon.
Gayunman, sinabi ng opisyal na hanggang ngayon ay wala pa silang natanggap na update mula sa mga ito.
Inaprubahan na ng Metro Manila Council (MMC) ang mga religious activities sa mga simbahan sa Holy Week.
Ayon kay MMC chairman at Parañaque City Mayor Edwin Olivarez, payag ang mayorya ng mga alkalde sa Kalakhang Maynila na okupahan ang 50 percent ng seating capacity ng mga simbahan.
Gayunman, inihayag ni Olivarez na dapat tiyakin ng pamunuan ng iglesiya na nasusunod ang standard health protocols laban sa COVID-19.
Samantala, binigyang diin naman ni Olivarez na hindi nila papayagan ang mass gathering tulad ng prusisyon at iba pa sa Holy Week celebration mula Marso 28 hanggang Abril 4.
Puspusan ang pagsasanay ngayon ng ilang aso sa Thailand para maging COVID-19 sniffer dogs.
Nabatid na anim na labrador retrievers ang isinasalang sa training para maka-detect kung sino ang may coronavirus.
Sinasabing nagagawa nila ito sa pamamagitan ng pag-amoy sa pawis ng tao.
Malamyang pagsunod sa health protocols.
Ito ang isa sa mga nakikita ng World Health Organization (WHO) na posibleng sanhi ng pagtaas ng COVID-19 cases sa bansa, kabilang ang presensya ng mas nakakahawang variants.
Isa rin sa mga maaaring dahilan nito, ayon kay WHO Country Representative Rabindra Abeyasinghe [Abi-ya-singha], ay ang mababang kumpiyansa ng tao sa bakuna.
Giit ni Abeyasinghe [Abi-ya-singha], dahil walang tiwala ang mga mamamayan sa bakuna ay hindi na nasusunod ang health protocols kaya’t nagiging dahilan ito ng pagdami ng mga nadadapuan ng impeksiyon.
Welcome sa Department of Agriculture (DA) ang isinusulong na imbestigasyon ni Sen. Panfilo Lacson kaugnay ng umano’y “tongpats” sa importasyon ng baboy.
Ayon kay Agriculture Secretary William Dar, bagama’t bumuo na sila ng special committee na bubusisi sa sinasabing anomalya sa Minimum Access Volume (MAV) scheme ay bukas sa kanila ang anumang pagsisiyasat ukol dito.
Magugunitang ibinuking ni Lacson na ginagamit ng mga taga-DA ang African swine fever (ASF) outbreak sa kanilang talamak na raket kung saan tinatayang aabot sa P6 bilyon ang di-umano’y kickback ng mga ito kapalit ng pagdaragdag ng imported pork products at pagtatapyas ng taripa.
Pagsisiwalat pa ni Lacson, namamayagpag umano ang sindikato sa DA at kumokolekta ng P5 hanggang P7 kada kilo ng imported na karne sa ilalim ng “tong-pats system” sa ahensya.
Samantala, nilinaw ni Dar na kaya lamang dinadagdagan ang volume ng imported meat products ay upang mapatatag ang suplay at presyo ng karneng baboy sa bansa.
Sumampa na sa mahigit 292,000 ang bilang ng frontline workers na nabigyan ng bakuna kontra COVID-19.
Ito ang inihayag ni Secretary Carlito Galvez Jr., chief implementer ng National Task Force Against COVID-19, sa gitna ng paglobo ng coronavirus infections sa bansa.
Maliban sa higit isang milyong doses ng bakuna mula China at Britanya, inaasahang may darating pa na 2.3 million doses sa mga susunod na linggo.
Nanawagan sa publiko si Pangulong Rodrigo Duterte na bigyan ng tsansa ang national ID system.
Ayon sa Pangulo, layon ng programa na mapabilis ang paghahatid ng serbisyo, masawata ang korapsiyon at masugpo ang red tape sa mga ahensya ng gobyerno.
Matatandaang nilagdaan ng presidente ang Philippine Identification System (PhilSys) Act noong 2018 kung saan iminamandato nito ang pagkakaroon ng iisang official identification card ng lahat ng Filipino citizens at foreign residents.
Pinaaalalahanan naman ng Pangulong Duterte ang publiko na sumunod sa health protocols sa pagpaparehistro para sa ID system upang maiwasan ang pagkalat ng COVID-19.