Inaayos na ng Department of Foreign Affairs ang repatriation ng mga ‘stranded’ na Filipino seafarers sa Mozambique.
Ayon kay Foreign Affairs Undersecretary Brigido Dulay, ligtas ang lahat ng mga Pinoy sa tumaob na fishing vessel doon at pansamantalang tumutuloy sa isang hotel sa Beira city.
Sinabi ni Dulay na papauwiin na nila sa lalong madaling panahon ang mga seafarers lalo’t hindi pa rin.
Hinimok ng isang advocacy group ang pamahalaan na kung maaari pagkatapos ng mga frontliners ay sunod namang bakunahan ang mga manggagawa sa turismo at food business.
Ayon kay Edmund Mayormita, tagapagsalita ng Grupong Turismo, Isulong Mo, siguradong maeengganyo ang mga turista lalo na ang mga Pinoy na pumunta sa mga pasyalan o tourist destinations kung alam nila na hindi sila mahahawa ng COVID-19 dahil nabakunahan na ang mga manggagawa.
Binanggit naman ni Mayormita na magpapadala sila ng liham sa Inter-Agency Task Force (IATF) para pormal na iparating dito ang kanilang panawagan.
Sinasabing ang grupong ‘Turismo, Isulong Mo’ ay kinabibilangan ng libo-libong mga manggagawa mula sa tourism industry, kabilang na ang mga tourist guides, bangkero, masahista, at iba pa.
Isa pang opisyal ng Iglesia Katolika ang gumaling mula sa coronavirus disease 2019 (COVID-19).
Ayon sa Archdiocese of San Fernando sa Pampanga, nakalabas na ng ospital kahapon si Archbishop Florentino Lavarias.
Nagpasalamat naman si Lavarias sa lahat ng mga doktor at personnel ng ospital na nag-alaga at nagdasal para sa kanya.
Matatandaang dinala sa pagamutan si Lavarias noong Pebrero 27 matapos makaranas ng mga sintomas ng COVID-19.
Maglalabas ng advisory ang Department of Labor and Employment (DOLE) sa susunod na linggol ukol sa isyu ng pagbabakuna sa lugar ng trabaho.
Ayon kay Secretary Silvestre Bello III, hindi maaaring pilitin ang mga empleyado na sumailalim sa vaccination nang walang consent mula rito at aniya’y illegal ang nasabing requirement.
Dahil dito, nanawagan si Bello sa mga manggagawa na i-report sa kanila ang mga ahensya o ang kanilang employer kapag pinilit silang magpabakuna.
Nilinaw naman ni Bello na wala pa silang natatanggap na anumang reklamo mula sa mga empleyado ukol sa naturang usapin.
Patay ang 20 katao habang sugatan naman ang 30 iba pa matapos sumabog ang isang sasakyan na may kargang bomba sa Mogadishu, Somalia.
Ayon sa pulisya, bigla na lamang umanong sumambulat ang car bomb sa isang restoran malapit sa paliparan.
Wala pang umaakong grupo sa naturang pag-atake.
Ibinunyag umano ni Tiger Woods sa mga awtoridad na wala siyang maaalala noong masangkot siya sa aksidente sa Los Angeles.
Sa ulat ng USA Today, isiniwalat na hindi rin umano matandaan ni Woods na nagmamaneho siya ng mga oras na iyon.
Sinasabing binanggit din ang kopya ng search warrant affidavit na siyang ginamit ng LA County Sheriff’s Department upang makakuha ng black box mula sa SUV ni Woods.
Nakatanggap ng bakuna kontra COVID-19 ang siyam na unggoy sa San Diego Zoo sa Estados Unidos na kinabibilangan ng apat na orangutan at limang bonobo.
Ayon sa ulat, isa sa mga naging recipients ng vaccine ay ang 28-anyos na babaeng Sumatran orangutan na si “Karen” na siyang kauna-unahang “ape” na sumalang sa open-heart surgery noon pang 1994.
Sinasabing minadali ang pagbabakuna sa mga unggoy matapos tamaan ng coronavirus ang walong gorilya sa nasabing zoo noong Enero.
Isa sa mga nagkasakit ay ang 48 taong gulang na si “Winston” na nagkaroon ng pneumonia at heart disease na kasalukuyang nagpapagaling.
Ibinunyag ng aktor na si Gerald Anderson na masaya siya ngayon dahil kay Julia Barretto.
Ginawa ni Anderson ang pahayag matapos ang mahigit isang taong espekulasyon ukol sa kanilang relasyon.
Sa isang show, tinanong ni Boy Abunda si Anderson kung si Barretto ba ay “source of happiness” para sa kanya kung saan sumagot naman ang aktor ng “oo”.
Mariin ding pinabulaanan ng aktor na “na-ghost” niya si Bea Alonzo dahil nagkaroon naman umano sila ng pag-uusap ukol sa hiwalayan nilang dalawa.
Matatandaang noong 2019 ay pumutok ang balita ng paghihiwalay nila ni Alonzo at ang isa sa mga itinuturong dahilan ay si Barretto.
Ligtas ang mga Pilipino sa New Zealand kasunod ng pagtama ng magnitude 8.1 na lindol sa nasabing bansa.
Ayon kay Ambassador Gary Domingo, walang apektadong Pinoy doon ngunit kinailangang ilikas ang ilan sa mga kababayan natin sa Bay of Islands, Matata, at Great Barrier Island patungo sa ligtas na lugar.
Nanawagan naman si Domingo sa Filipino communities sa New Zealand na magpatala sa embahada para sa mas mabilis na komunikasyon.
Target ng Philippine Statistics Authority (PSA) na makapagrehistro ng 70 milyong Pilipino sa ilalim ng national ID system hanggang sa katapusan ng taon.
Ayon kay PSA Assistant Secretary Rosalinda Bautista, nagpapatuloy pa rin ang registration process sa mga lalawigan.
Matatandaang umarangkada ang unang hakbang ng pagpapatala ng mga Pinoy para sa Philippine Identification System noong October 2020 sa 32 probinsya na mababa ang bilang ng mga naitatalang COVID-19 transmission.
Sinasabing nasa 20 million registrants na ang nakakumpleto ng step 1 ng registration, kabilang ang pangangalap ng demographic data tulad ng pangalan, permanent address, petsa at lugar ng kapanganakan, at blood type.