MASUSING pinag-aaralan ngayon ng mga eksperto kung palalawigin pa nila ang modified enhanced community quarantine o MECQ sa Kamaynilaan at iba pang karatig-lugar.
Pahayag ng Department of Health, titingnan nila, kasama ang Inter-Agency Task Force o IATF, kung naging epektibo ang nasabing lockdown level.
Inaasahang ihahayag naman ng gobyerno ang quarantine status sa mga susunod na araw.
MAY nakaamba na namang oil-price hike sa susunod na linggo.
Ayon sa mga taga-industriya, inaasahan na ang gasolina ay may P0.50 hanggang P0.60 kada litrong taas-presyo.
Nasa P0.90 hanggang P1 naman ang posibleng magiging dagdag-presyo sa diesel habang P0.80 hanggang P0.90 sa kerosene.
Sinasabing ito na ang ikalawang sunod na price hike sa mga produktong petrolyo.
SUGATAN ang isang lineman matapos tuklawin ng hinuli nilang ahas na nakapulupot sa linya ng kuryente sa Brgy. San Isidro, Jaro, Iloilo City.
Kinilala ang biktima na si Rutaben Salvacion, empleyado ng More Power Corporation.
Sa imbestigasyon, humingi ng tulong sa mga lineman ang mga residente nang makitang sumabit sa linya nila ang ahas at nang hulihin nila ito ay doon na natuklaw sa kaliwang kamay si Salvacion.
Agad namang tinurukan ng anti-venom vaccine si Salvacion habang nai-turn over na sa mga tauhan ng DENR Region 6 ang naturang ahas.\
MAAARING makulong ng hanggang 10 taon ang sinumang mapatutunayang sangkot sa overpricing ng Tocilizumab na ginagamit na gamot sa mga malulubhang kaso ng COVID-19.
Ito ang ibinabala ni DOH Undersecretary Maria Rosario Vergeire kasabay ng paglilinaw na ang suggested retail price o SRP sa Tocilizumab ay naglalaro sa 13,000 pesos hanggang 25,000 pesos. Maliban aniya sa pagkakabilanggo, maaari ring mapatawan ng mula P5,000 hanggang P1-M ang sinumang mapatutunayang lumabag sa SRP.
Samantala, aminado naman si Vergeire na nagkakaroon talaga ngayon ng kakulangan o shortage ng gamot sa harap ng pagsirit ng mga kaso ng impeksiyon sa buong mundo na dulot ng Delta variant.
NAKATANGGAP ng tulong pangkabuhayan ang mga informal sector workers sa dalawang probinsya sa Calabarzon at Central Luzon na bahagi ng livelihood packages ng gobyerno na nagkahahalaga ng P18-M.
Ayon sa Department of Labor and Employment o DOLE, kasama sa mga makikinabang sa P1.5-M na livelihood check para sa DOLE AKAP at Halik Multi-Purpose Cooperative ay ang mga minimum wage earners at mga manggagawang nawalan ng trabaho sa Lucena.
Sa Candaba, Pampanga, tinatayang P6.9-M naman ang inilaan ng DOLE para sa mga TUPAD workers sa naturang bayan.
MALAPIT nang umarangkada ang clinical trials ng mga bakuna laban sa mga bagong variants ng COVID-19.
Ginawa ni Presidential Spokesperson Harry Roque ang pahayag matapos aniyang aprubahan ng Inter-Agency Task Force o IATF ang rekomendasyon para sa trials kung saan idadaan muna ito sa Food and Drug Administration o FDA.
Ayon kay Roque, tututukan sa pag-aaral ang iba’t ibang age groups at mga taong may comorbidities.
Maliban dito, sinabi ni Roque na inaprubahan din ng IATF ang hirit na iprayoridad sa Phase 3 clinical trials ang mga volunteers na nasa pediatric age groups o 6 na buwan hanggang 12 taong gulang, buntis, matatanda na edad 60 pataas, at mga taong may mga karamdaman.
SUMAMPA na sa mahigit 2M ang bilang ng mga tinamaan ng COVID-19 sa bansa.
Ito’y makaraang makapagtala ang Department of Health o DOH ng 20,741 na bagong impeksiyon.
Nagkaroon naman ng halos 22,000 na bagong recoveries kung kaya’t pumalo na sa higit 1.8 milyon ang bilang ng mga gumaling sa sakit.
Sa nasabing numero, nasa 157,646 ang mga aktibong kaso. Halos dalawang daan naman ang nadagdag sa death toll dahilan upang sumirit sa higit 34,000 ang bilang ng mga nasawi.
NANGANGANIB na lumipat sa ibang network ang mga subscribers ng third telco player sa bansa.
Ito’y makaraang madiskubre na bigo umanong makasabay ang download speed ng Dito Telecommunity sa Globe at PLDT na kapwa agresibo sa pagpapalawak ng kanilang agwat o superiority.
Ayon sa OpenSignal, isang independent mobile analytics specialist, nahaharap sa limitadong network footprint ang Dito kung saan lumalabas na sa nakalipas na dalawang buwan ay bumagsak sa 11 %, 26%, at 16% ang download speed nito na mas mabagal kumpara sa Globe at PLDT sa Cebu, Davao at Metro Manila.
At bunga ng sinasabing network quality gap, mas pinipili na ngayon ng mga quality-focused users ang dalawang telcos kaysa sa Dito.
ANG pagtugon sa pandemya ng mga national at local leaders ang magiging sukatan ng mga botante sa halalan sa susunod na taon.
Ito ang paniniwala ng batikang political analyst na si Prof. Mon Casiple kasabay ng paliwanag na kung pagbabatayan ang kultura ng mga Pilipino ay hindi madaling nakakalimot ang mga ito.
Kaya naman, sa pinagdaraanan aniya ng bawat isa sa panahon ng krisis ay maaalala nila kung sino ang nakatulong at nakitang may nagawa habang tiyak namang ibabasura ang mga palpak na politiko.
Kasama naman sa mga binabatikos ngayon ay si Davao City Mayor Sara Duterte dulot ng sinasabing mahinang pagtugon sa mataas na COVID-19 cases sa kanyang nasasakupang lungsod.
Para naman kay Stratbase ADR Institute for Strategic and International Studies (ADRi) President Victor Andres Manhit, magiging malaking isyu sa susunod na eleksiyon ang pandemya, kahirapan, gutom, kawalang trabaho, at pagtaas ng presyo ng mga pangunahing bilihin.
Samantala, sa panig naman ni Michael Henry Yusingco ng Ateneo Policy Center, namemeligrong sumadsad ang popularidad ni Pangulong Rodrigo Duterte bunsod ng sablay na pandemic response ng pamahalaan.
PATULOY ang bakbakan sa pagitan ng mga Taliban fighters at resistance forces sa probinsya ng Panjshir sa Afghanistan.
Dahil dito, nagsilikas na ang tinatayang 400 pamilya patungo sa ligtas na lugar tulad ng Parwan province.
Sinusubukan umano ng mga miyembro ng Taliban na makipag-negosasyon upang mabuo na ang bagong gobyerno ngunit ayaw sumuko ng mga kalaban.
May mga nagsasabi naman na pawang mga kasapi ng Afghan National Army ang mga kumokontra sa Taliban.
Gayunman, hanggang ngayon ay wala pang kumpirmasyon mula sa naturang grupo.