DWIZ 882

Ibinasura na ng Korte Suprema ang pinagsama-samang mga petisyon na kumukuwestiyon sa mga isinagawang pagdinig ng Kamara at ng House Committee on Justice kaugnay ng mga reklamo sa impeachment laban kay Vice President Sara Duterte.

Sa desisyon ng Supreme Court En Banc, wala na anyang dapat desisyunan sa mga petisyon dahil naging moot and academic o wala nang saysay ang mga isyung inihain matapos maaprubahan at maipadala ng Kamara sa Senado ang Articles of Impeachment.

Ayon sa Korte Suprema, natapos na ang tungkulin ng Kamara sa proseso ng impeachment nang maipasa nito sa Senado ang Articles of Impeachment, kaya naisakatuparan na ang mga hakbang na nais pigilan ng mga petitioners.

Iginiit din ng SC na nasa Senado na ang proseso ng impeachment, na ngayon ay nakaupo bilang impeachment court at nagsimula na ang mga pagdinig.

Dahil dito, sinabi ng Korte Suprema na anumang magiging pasya nito hinggil sa mga naging hakbang ng Kamara at ng House Committee on Justice ay hindi na makaaapekto sa usapin.

Kabilang sa mga ibinasurang petisyon ang inihain ni Atty. Israelito Torreon at iba pa, gayundin ang hiwalay na petisyon ni Vice President Duterte.

Iginiit ng mga petitioner na lumampas umano sa kapangyarihang ipinagkaloob ng Konstitusyon ang House Committee on Justice nang mangalap ito ng ebidensya at magpatawag ng mga testigo sa paunang pagtalakay sa mga reklamong impeachment.

“Talagang aabutin tayo ng Christmas!”

Ito ang sinabi ni Private Prosecutor Atty. Lorna Kapunan nang matanong tungkol sa stipulations na hindi napagkasunduan ng House Prosecution Panel at Defense Team para sa Article 1 na tumutukoy sa maling paggamit ng confidential funds ng OVP at DepEd.

Matatandaang nagpasya ang Senate Impeachment Court na ipagpatuloy na lang sa Lunes ang direct examination ng prosekusyon kay COA-ICFAO State Auditor Xylene Mae Del Ocampo sa Day 13 ng impeachment trial laban kay Vice President Sara Duterte bunsod ng markings of exhibit na isinagawa para sa stipulations o karagdagang ebidensya na gagamitin ng magkabilang panig.

Sa naging press conference, tinungkuran ni Kapunan ang naging pahayag ni Impeachment Presiding Officer Chiz Escudero na karapatan ng depensa kung tatanggapin o hindi ang stipulations ng prosekusyon.

Pero iginiit ni Kapunan na ang naging problema ay dahil aabot sa 4,492 ang kabuuang dokumento na hindi na-stipulate ng depensa.

Kataka-taka para kay Kapunan kung bakit ayaw ipakita ng depensa ang kanilang ebidensya sa prosekusyon.

Una nang sinabi ni Counsel for Defense Atty. Kristine Ferrer na sa mahigit apat na libong stipulations, sampu lang ang kanilang isinama bilang karagdagang ebidensya.

Paliwanag ni Kapunan, sa naging “pre-trial” ng impeachment ay nagkaroon ng markings sa mga dokumento ang magkabilang panig kaya wala nang “surprise” o bago sa mga ito. | via Geli Mendez (Patrol 30)

Nabigo ang Office of the Vice President na makapagsumite ng official receipts sa liquidation report nito sa 125 million peso confidential funds noong 2022.

Ito ang ibinunyag testigo ng prosekusyon na si Atty. Roderick Wamil, dating state auditor ng Commission on Audit – Intelligence and Confidential Funds Audit Office (COA-ICFAO) mula Setyembre 2014 hanggang Pebrero 2024.

Sa ika-labing-tatlong araw ng impeachment trial, nilinaw ni Wamil, 849 acknowledgment receipts o A.R. ang isinumite ng OVP at DepEd sa liquidation report.

Bagaman hindi niya masabi na standard practice ito, aminado si Wamil na ito ang kauna-unahang beses na pawang A.R. ang isinumite sa kanila.

Mandato, aniya, ng mga government agencies na gumagamit ng confidential and intelligence funds na magsumite ng supporting documents, gaya ng sales invoice o official receipts para sa kani-kanilang liquidation reports.

Si Wamil ay isa sa testigo para sa Article 1 ng impeachment case, na nag-a-akusa kay Vice President Sara Duterte ng paglabag dahil sa systematic, misappropriation, at irregular liquidation ng confidential funds na 625 million pesos ng OVP at DepEd.

Kinumpirma ng Philippine Navy na pumangatlo ang guided missile frigate nitong BRP Miguel Malvar sa Naval Surface Fire Support Rodeo naval gunnery competition sa katatapos na 2026 Rim of the Pacific Exercise, o RIMPAC 2026.

Ayon sa Hukbong Dagat, naka-score ng pinakamalapit na average distance ang Malvar matapos itong magpakawala ng limang round mula sa 76mm Oto Melara Super Rapid main gun nito.

Nagkampeon naman sa kompetisyon ang ROKS Daejeon, isang Daegu-class frigate na nakilahok din sa nasabing pagsasanay.

Ito na ang ikalawang beses na naka-podium finish ang Philippine Navy sa nasabing kompetisyon matapos makamit ng BRP Antonio Luna ang ikatlong puwesto noong RIMPAC 2022. | Sa panulat ni Anjo Riñon

Kinumpirma ng House Prosecution Panel ang pagbasura ng Korte Suprema sa mga petisyong kumukuwestiyon sa proseso ng “mini-trial” na isinagawa ng Kamara laban kay Vice President Sara Duterte dahil naging “moot and academic” na ang mga ito.

Ayon kay House Prosecutor Joel Chua, natanggap na nila ang opisyal na kopya kaugnay sa naging desisyon ng Korte Suprema na nagsasabing wala nang umiiral at wala nang kailangang resolbahin sa mga petisyon.

Iginiit ni Chua na patunay lamang ito na tapos na ang proseso sa Kamara makaraang maipasa ang Articles of Impeachment sa Senado.

Aniya, wala nang balakid sa pagpapatuloy ng paglilitis sa Senate Impeachment Court na siyang magpapasya sa mga kasong isinampa laban sa Bise Presidente.

Sinabi ni Chua na hindi pa nila nababasa ang buong desisyon ng Korte Suprema, subalit batay sa opisyal na pahayag, wala nang isyung dapat pagpasiyahan ukol sa mga naging hakbang ng Kamara.

Nilinaw ni Chua na ang desisyon ng Korte Suprema ay hindi nangangahulugang may sala o walang sala si VP Sara, dahil ang paglilitis sa nilalaman ng Articles of Impeachment ay nagpapatuloy sa Impeachment Court.

Dagdag pa ni Chua, dapat nang magpokus ang magkabilang panig sa impeachment trial dahil wala na ring isyu sa hurisdiksiyon ng kaso.

Gayunman, iginiit ni Chua na kailangan pa ring patunayan ng prosekusyon ang bawat nilalaman ng apat na artikulo, at ang senator-judges pa rin ang magpapasya kung katanggap-tanggap, kapani-paniwala, at sapat ang bigat ng mga ebidensyang ihaharap laban sa Bise Presidente. | via Geli Mendez (Patrol 30)

Pinalawig ng Ateneo de Manila University ang termino ng pangulo nito na si Fr. Roberto “Bobby” Yap, S.J. hanggang Mayo 2027.

Ayon sa Ateneo, ito’y upang makahanap ang unibersidad ng hahalili kay Yap para sa Academic Year 2027–2028 at upang maging maayos ang transition sa pagpapalit ng pamunuan.

Dagdag pa ng unibersidad, maluwag na tinanggap ni Fr. Yap ang pagpapalit ng pamunuan nito bilang epekto ng pagkasawi ng dalawa nitong atleta na sina Rene “Bobet” Baterbonia at Divine Adili noong Hunyo.

Karaniwang ginagawang pangulo ng mga Ateneo schools sa buong bansa ang mga paring miyembro ng kongregasyong Society of Jesus, o mas kilala bilang mga Heswita. | Sa panulat ni Anjo Riñon