DWIZ 882

Para kay Counsel for Prosecution Legal Spokesperson Atty. Benjamin Tolosa Jr., mas makatutulong ang mahabang oras at panahon ng paglilitis upang mas mailatag nang maayos ang mga ebidensya at mas maunawaan ng publiko ang impeachment trial ni Vice President Sara Duterte.

Ayon kay Tolosa, case-to-case basis ang mga testimonya ng bawat testigo at hindi maiiwasan ang mahahabang pagtatanong depende sa usapin o magiging paksa ng mga ebidensya.

Gayunman, iginiit ni Tolosa na nasa kamay pa rin ng mga senator-judge ang magiging desisyon at kanilang igagalang kung ibabalik sa hapon ang schedule ng impeachment trial.

Matatandaang iminungkahi ni Senator-Judge Juan Miguel Zubiri na ilipat sa alas-tres ng hapon ang paglilitis at isagawa na lamang sa alas-diyes ng umaga ang regular na legislative session ng Senado. | via Geli Mendez (Patrol 30)

“Dati nang mayroong credit notice ang Department of Education.”

Ito ang iginiit ni Defense Counsel Atty. Michael Poa matapos mabanggit ang credit notice hinggil sa paggamit ng confidential funds noong 2023 sa impeachment trial.

Ayon kay Attorney Poa, natanggap nila ang credit notice noong Agosto 9, 2024 mula sa Commission on Audit. Matagal na rin daw nila itong binabanggit sa mga committee hearing.

Ito ay matapos suriin ng COA ang liquidation report, mga isinumiteng dokumento, at mga sagot sa Audit Observation Memorandum.

Dagdag pa ng abogado, mahalagang nailahad na sa open court ang naturang credit notice.

Gayunman, handa namang harapin ng depensa kung muling bubuksan ang usapin sa credit notice sakaling may lumitaw na bagong ebidensiya. | via Jenn Patrolla (Patrol 38)

Suportado ni House Prosecutor at San Juan City Rep. Ysabel Zamora na maisama pa rin ang flood control projects sa panukalang P7.2 trillion 2027 national budget.

Sa ambush interview, binigyang-diin ni Zamora na marami sa mga proyekto laban sa baha ng bawat distrito sa bansa ang naging epektibo.

Inihalimbawa ni Zamora ang proyektong ipinatupad sa kaniyang distrito at maging sa Marikina City kung saan, naiwasan ang pagbaha bunsod ng malalakas na pag-ulan dala ng hanging habagat.

Pinuri ni Zamora ang local government unit ng Marikina dahil sa epektibong pagpapatupad ng proyekto laban sa baha.

Patunay aniya ito na marami sa proyekto ng bawat distrito ay gumagana at nakatutugon sa pangangailangan ng kanilang nasasakupan.

Dagdag pa ng mambabatas, bagamat dapat ipagpatuloy ang imbestigasyon sa mga natuklasang anomalya sa ilang proyekto, kailangan pa rin aniya na isaalang-alang ang malaking tulong ng mga ito sa pagbawas ng baha.  | via Geli Mendez (Patrol 30)

Malinaw na mayroong pananagutan si Vice President Sara Duterte sa maling paggamit ng confidential funds.

Ito ang kinumpirma ng witness stand na si Xylene Mae Del Campo, ang kasalukuyang supervising auditor ng COA-ICFAO, matapos ang direct examination ni Private Prosecutor Atty. Lorna Kapunan sa nagpapatuloy na impeachment trial hinggil sa misuse of confidential funds ng OVP at DepEd.

Natanong kasi ni Kapunan si Del Campo kung sino ang dapat na managot sa mga acknowledgement receipts o cash advance na inilabas sa ilalim ng OVP at DepEd.

Bilang tugon, sinabi ni Del Campo na ang Bise Presidente ang dapat na managot dahil si VP Sara aniya ang nag-apruba sa mga transactions ng lahat ng accomplishment reports.

Batay rin aniya sa Joint Circular ng COA, ang head of agency na siyang lumagda sa mga resibo at nag-apruba sa pagpapalabas ng pondo ang may pananagutan.

Ayon kay Del Campo, pondo ng taumbayan ang pinag-uusapan at si VP Sara ang designated na SDO o Special Disbursing Officer at may responsibilidad sa pag-disburse ng cash advance sa confidential funds.

Batay aniya sa isinumiteng liquidation ng OVP at DepEd, kulang ang mga ito sa mga dokumento at hindi tumutugma sa mga naging gastos ng dalawang ahensya.

Bukod pa dito, isinama rin ng OVP sa kanilang liquidation ang gastos sa certification na ginamit ng Armed Forces of the Philippines.

Ipinakita rin sa pagdinig ang iba pang mga pangalang kasama sa acknowledgement receipts na tumanggap ng pondo at naka-address sa iba’t ibang lugar sa bansa.

Natuklasan na sa mga nabanggit na acknowledgement receipts, mahigit dalawampu’t lima ang walang pangalan pero tumanggap ng pondo sa iba’t ibang lugar sa bansa.

Sa pagtatapos ng paglilitis kanina, ipinaalala ni House Prosecutor Joel Chua na nasa tatlong testigo pa ang natitira sa prosecution na hindi pa naihaharap sa paglilitis, kabilang na ang dalawang dating Special Disbursing Officer ni VP Sara na sina Gina Acosta at Edward Fajarda.

Maging si House Legislative Information Resources Management Department Dir. Marivic Pareja.

Hiniling ni Chua sa Senate Impeachment Court na mabigyan sila ng pagkakataon na magsumite na lamang ng listahan ng mga testigong ihaharap batay sa magiging resulta ng impeachment trial na agad namang inaprubahan ni Senate Presiding Officer Chiz Escudero. | via Geli Mendez (Patrol 30)

Naghain ng mosyon si Defense Lawyer Atty. Kristine Ferrer ng “asked and answered” habang isinasagawa ni House Prosecution Counsel Atty. Lorna Kapunan ang direct examination sa testigong si COA State Auditor Xylene Del Campo.

Bago ito, kinumpirma ni Del Campo kay Kapunan na sa halip na Notice of Suspension, Notice of Disallowance ang agad nilang inisyu sa Office of the Vice President dahil sa nakitang irregularidad.

Matapos ito, muling naghain ng mosyon si Atty. Ferrer, na pinagbigyan naman ni Presiding Officer Chiz Escudero.

Kaugnay nito, kwenestiyun din ng depensa ang kredibilidad ni Del Campo bilang state witness, matapos makwestiyon ang partisipasyon ng hepe ng security group sa pag-disburse ng confidential funds. | via Jenn Patrolla (Patrol 38)

Natanggap na ng Ateneo de Manila University ang kopya ng order ng Department of Labor and Employment tungkol sa umano’y employment permit requirements ng dati nitong men’s basketball coach na si Tab Baldwin.

Ayon sa Ateneo, sinusuri ng legal team nito ang naibabang kautusan ng DOLE upang tingnan kung ano ang gagawin nitong hakbang.

Matatandaang ipinatawag ng kagawaran si Baldwin kaugnay ng kinalaman nito sa pagkalunod ng dalawang miyembro ng Ateneo Blue Eagles na sina Rene Baterbonia at Divine Adili.

Pinatawan si Baldwin ng multa dahil sa umano’y paglabag nito sa Article 40 ng Labor Code dahil bigo itong mag-apply ng Alien Employment Permit at Certificate of Exemption; habang minultahan din ng DOLE ang Ateneo dahil sa bigo itong humingi ng mga nasabing dokumento sa dating Blue Eagles head coach. | Sa panulat ni Anjo Riñon