DWIZ 882

Hinimok ng Department of Foreign Affairs ang mga pinuno ng Israel at Palestina na resolbahin ang pagkakaiba ng mga ito sa pag-iimplementa ng Gaza Peace Plan na pinamumunuan ng Estados Unidos sa pamamagitan ng dayalogo.

Inilabas ng DFA ang pahayag nito matapos tanggihan ng Israel ang naturang peace plan.

Ayon sa kagawaran, patuloy na sinusuportahan ng pamahalaan ng Pilipinas ang pangmatagalang tigil-putukan, malayang pagdaloy ng ayuda sa mga Palestino ng Gaza, at ang pagtatatag ng isang estadong Palestino na nakabatay sa “two-state solution,” o ang pagkakaroon at pagpapanatili ng mga bansang Israel at Palestine.

Iginiit din ng DFA na nananatiling “nag-iisang matatag na daan ng kapayapaan” ang two-state solution. | Sa panulat ni Anjo Riñon

Pormal nang isinumite ng Executive Branch sa House of Representatives ang panukalang P7.2 trillion National Expenditure Program (NEP) para sa fiscal year 2027.

Isinagawa ang ceremonial turnover ngayong araw, Agosto 11, sa Romualdez Hall ng Kamara kung saan, mismong si Department of Budget and Management (DBM) Secretary Kim Robert De Leon ang nagdala at nagpresenta ng kopya ng 2027 NEP na may temang “People-Centered Growth for an Inclusive and Resilient Future.”

Dumalo sa seremonya sina House Speaker Faustino Dy III, Senior Deputy Speaker Ferdinand Hernandez, House Majority Leader Sandro Marcos, at Appropriations Committee Chairperson Mikaela Suansing, kasama ang iba pang lider ng Kamara.

Ang panukalang budget na inilaan para sa susunod na taon ay anim na porsyentong mas mataas kumpara sa 2026 national budget na nasa P6.793 trillion.

Pinakamalaki ang alokasyon sa DepEd na nasa P976 bilyon, sinundan ng DPWH na P644 bilyon, DOH na P353.8 bilyon, DILG na P332.5 bilyon, at Department of National Defense na P328.8 bilyon.

Kabilang din sa top 10 ang DOTr na may P302.2 billion; Department of Agriculture na may P261.7 billion; DSWD na P241.6 billion; CHED na P176.5 billion; at Judiciary na mayroon namang P86.3 billion.

Panibagong mga pangalan ang naungkat sa nagpapatuloy na Week 6 o Day 14 ng impeachment trial laban kay Vice President Sara Duterte kaugnay pa rin sa Article 1 na tumutukoy sa maling paggamit ng confidential funds ng Office of the Vice President o OVP at Department of Education o DepEd.

Sa gitna ito ng direct examination na isinagawa ni Private Prosecutor Atty. Lorna Kapunan.

Sa presentasyon ng ebidensya ni Kapunan, kinumpirma ng witness stand na si Xylene Mae Del Campo ang mga pangalang tumanggap din ng acknowledgement receipts.

Kabilang sa mga pangalang tumanggap ng pondo at nakalista sa acknowledgement receipts sa ilalim ng purchased of information ay sina:

Ralph Josh Bacon, na nakatanggap ng P150,000.

Anne Ongpauco, na nakakuha ng P50,000.

Beth Revilla, na nakakuha ng P50,000.

Jose Diokno Jr., na tumanggap ng P120,000.

Sa ilalim naman ng purchased of supplies, nakakuha naman sina:

Heart Santiago, na tumanggap ng P250,000 at

Diane Maple Lapid, na nakakuha ng P150,000.

Tatlong pangalan naman ang nakakuha ng pondo sa ilalim ng purchased of provision of medical and food aid kabilang na sina:

John A. Lapid, na nakakuha ng P350,000.

Clarisse Hontiveros, na tumanggap ng P500,000 at

Feonna Villegas, na nakakuha rin ng P500,000.

Nakakuha rin ng confidential funds si Denise Tanya Escudero ng nasa P120,000; Kristine Applegate Estrada na may P50,000; Honeylet Camille Sy na may P350,000; Connor Adrian Contis na may P50,000; Kokoy Villamin na may P50,000; Miggy Mango na may P50,000; Jay Kamote na may P200,000; Xiaome Ocho na may P100,000; Salah Casim na may P180,000; Nova Santos na may P50,000; Matthew N. Keso na may P250,000; at Beverly Claire Pampano na may P130,000. | via Geli Mendez (Patrol 30)

Kinumpirma ni US Defense Undersecretary Elbridge Colby na magpapadala ang Estados Unidos ng apat na Sentinel-class fast response cutters ng US Coast Guard sa Pilipinas upang umalalay sa bansa sa pagpa-patrolya sa West Philippine Sea.

Ito’y kaugnay ng tungkulin ng Amerika sa Mutual Defense Treaty nito sa Pilipinas.

Wala pang ibang impormasyon o detalye tungkol sa pagde-deploy ng mga nasabing barko ng USCG; ngunit inaasahan ang negatibong reaksyon ng China tungkol dito, batay na rin sa mga insidente sa isyu ng West Philippine Sea kamakailan. | Sa panulat ni Anjo Riñon

Nanghihinayang si Private Prosecutor Atty. Lorna Kapunan sa nasayang na oras at araw na inilaan para sa markings of exhibit na inaprubahan ng Senate Impeachment Court.

Sa kaniyang manifestation, sinabi ni Kapunan na nagpadala ang House Prosecution Team ng kanilang mensahe sa counsel for the respondent para alamin ang kanilang hakbang sa pagmamarka ng mga ebidensya bago simulan ang Week 6 ng impeachment trial laban kay Vice President Sara Duterte.

Ayon kay Kapunan, pagkatapos ng impeachment trial noong Wednesday ng nakaraang linggo ay nag-text sila sa kabilang panig kung kailan sila magkakaroon ng pagpupulong para sa markings of evidence pero hindi aniya sila nireplyan.

Kinabukasan o Thursday ay naghintay aniya sila ng mensahe kung saan, sinabi ng kampo ng Bise Presidente na available lamang sila sa August 14 na malayo sa itinakdang araw na inaprubahan ni Senate Presiding Officer Chiz Escudero.

Sinabi ni Kapunan na malinaw sa direktiba ng Impeachment Court na dapat magkasundo ang magkabilang panig sa inaprubahang petsa.

Dagdag pa ni Kapunan, isang oras bago sinimulan ang impeachment trial ay nagpadala ulit sila ng mensahe sa kabilang panig para hikayatin na gawin na ang markings of exhibit upang hindi na masayang ang oras na igugugol sa gitna ng paglilitis.

Bilang tugon, sinabi aniya ng counsel for the respondent na hindi na nila kailangan ang markings of exhibit at gagamitin na lamang nila ang summary of evidence.

Paliwanag ni Kapunan, sa 4,492 documents na kailangang i-stipulate, tanging covering page lamang ng mga dokumento ang dahilan ng kampo ni VP Sara kung bakit hindi pumayag ang mga ito sa stipulations.

Sa ngayon, sinimulan na ng panels of the prosecutors ang direct examination kay Xylene Mae Del Campo, ang kasalukuyang supervising auditor ng COA-ICFAO, para pagtibayin ang mga pahayag ng mga naunang tumestigo sa Article 1 na may kaugnayan sa maling paggamit ng confidential funds ng Office of the Vice President o OVP at Department of Education o DepEd na aabot sa kabuuang P612.5 million. | via Geli Mendez (Patrol 30)

Hinimok ni Akbayan Party-list Representative Perci Cendaña na pabilisin ang proseso ng extradition ni religious leader Apollo Quiboloy matapos kumpirmahin ng Department of Justice na natanggap na ng Pilipinas ang pormal na extradition request mula sa Estados Unidos.

Ayon kay Rep. Cendaña, mahalagang mapabilis ang proseso upang makamit ang katarungan para sa mga babae at bata na sinasabing naging biktima.

Lumutang na rin aniya sa mga pagdinig ng Senado ang mga testimonya kaugnay ng mga alegasyon laban kay Quiboloy.

Iginiit din ng mambabatas na dapat na bigyan ng agarang aksyon ang usapin dahil nananatiling banta sa mga sinasabing biktima ang impluwensya at mga koneksyon ni Quiboloy kahit ito’y nakapiit.

Sa ngayon, hinihintay ang susunod na hakbang sa proseso ng extradition habang patuloy na pinoproseso ng mga kinauukulang ahensiya ang kahilingan ng pamahalaan ng Estados Unidos, alinsunod sa umiiral na batas at mga kasunduang internasyonal. | Sa panulat ni Reabelle Medina

Patuloy na tumataas ang lebel ng tubig sa Magat Dam sa Isabela kasunod ng mga pag-ulan nitong nakalipas na araw.

Ayon sa National Irrigation Administration, umabot na sa 166.44 meters ang water elevation ng Magat Dam nitong August 6, na mas mataas sa 160 meters above sea level.

Anila, nakatulong ang cloud seeding operations ng Philippine Air Force katuwang ang NIA at iba pang ahensya, para mapataas ang water level at mapanatili ang suplay ng tubig para sa mga magsasaka.

Bunsod nito, libo-libong ektarya ng mga taniman ng palay at mais ang naiwasang maapektuhan ng kakulangan sa tubig. | Sa panulat ni Reabelle Medina

Ilang miyembro ng tinaguriang “Maleta Boys” ang nagbawi ng kanilang mga alegasyon laban kina Pangulong Ferdinand Marcos Jr., dating House Speaker Martin Romualdez, at dating Congressman Zaldy Co.

Apat sa 18 Maleta Boys ang lumagda sa mga bagong sinumpaang salaysay na nagbabawi sa kanilang mga naunang paratang laban sa tatlong personalidad.

Ayon sa apat na Maleta Boys, hindi umano totoo ang nilalaman ng kanilang mga naunang affidavit at nagpasya silang bawiin ang mga ito dahil nais na lamang nilang mamuhay nang tahimik habang humaharap sa mga kaso at umano’y banta sa kanilang buhay.

Iginiit din nila na nilagdaan nila ang naunang joint affidavit dahil sa pangakong pinansyal na tulong at seguridad para sa kanilang mga pamilya.

Tatlo sa kanila ang nagsabing ang mga naunang affidavit ay isinumite sa Office of the Ombudsman bilang bahagi ng isinasagawang imbestigasyon sa flood control scandal. Inamin din nilang napilitan silang lumagda sa mga nakahanda nang dokumento dahil sa banta ng patung-patong na kaso kung tatanggi sila.

Ibinunyag din ng apat na may ilan pa sa kanilang dating mga kasamahan ang pinag-iisipan ding bawiin ang kani-kanilang mga naunang salaysay.

Matatandaang lumantad ang 18 Maleta Boys, na nagpakilalang dating bodyguards ni dating Congressman Co, noong Pebrero 2026 at sinabing naghatid umano sila ng mga maleta ng pera kina Pangulong Marcos, Romualdez, Co, at iba pang personalidad. | Sa panulat ni Jordan Gutierrez