DWIZ 882

Pormal nang hiniling ng US government sa Pilipinas ang pag-extradite kay Kingdom of Jesus Christ founder, Pastor Apollo Quiboloy, upang harapin nito ang mga kasong sex trafficking at racketeering charges sa Estados Unidos.

Kinumpirma ni Philippine Ambassador to the US Jose Manuel “Babe” Romualdez na noong isang buwan pa ipinadala ng Amerika ang formal request at na-transmit na sa Department of Justice.

Kasalukuyang nakapiit sa Pasig City Jail ang 76-anyos na religious leader, na malapit na kaibigan at spiritual adviser ni dating Pangulong Rodrigo Duterte dahil sa mga kasong sexual, child abuse, at human trafficking.

Kabilang si Quiboloy sa Most Wanted List ng Federal Bureau of Investigation ng US dahil sa sex trafficking by force, fraud and coercion, sex trafficking of children, at bulk cash smuggling.

Nilinaw ng House Prosecution Panel na may eksklusibong kapangyarihan ang Kamara na mag-initiate o magpasimula ng mga kasong impeachment.

Ayon kay House Lead Prosecutor Gerville Luistro, batay ito sa pinagtibay na desisyon ng Korte Suprema na nagbasura sa mga petisyong kumukuwestyon at naglalayong ipatigil ang impeachment proceedings laban kay Vice President Sara Duterte.

Iginiit ni Luistro na nilinaw na rin ng Korte Suprema ang mga isyu tungkol sa referral ng Articles of Impeachment ng Kamara, gayundin ang mga alegasyon ng fishing expedition, mini-trial, at pre-judgement.

Aniya, ang Senado naman ang may exclusive powers na magsagawa ng paglilitis at magpasya sa impeachment case, kaya umaasa silang hindi na muling igigiit sa Impeachment Court ang mga isyung napagpasyahan na ng Korte Suprema.

Samantala, sinabi naman ni prosecution legal spokesperson Atty. Benjamin Tolosa Jr. na kinikilala ng Korte Suprema na nagampanan ng Kamara ang tungkulin nito sa impeachment, pero hindi aniya nangangahulugang napatunayang may sala ang Bise Presidente, kundi kailangan lamang nitong sagutin ang mga alegasyong inihain sa Impeachment Court laban sa kanya. | via Geli Mendez (Patrol 30)

Hinamon ng House Prosecution Panel ang kampo ni Vice President Sara Duterte na linawin ang pagkakakilanlan ng mga pangalang nakalista sa acknowledgement receipts at tumanggap ng confidential funds, partikular ang tinaguriang “Chichirya Gang.”

Ayon sa prosecution, hindi pa rin malinaw kung ang mga kontrobersyal na pangalan sa mga acknowledgement receipt gaya nina Mary Grace Piatos, Renan Piatos, at Nova Santos ay tunay na tao o pawang mga alias lamang.

Sa press conference, sinabi ni private prosecutor Atty. Amando Virgil Ligutan na kung mga alias ang mga pangalang ito, dapat ding maipaliwanag kung bakit may mga pirma ang mga ito at kung ang mga lagda ay mga alias din.

Iginiit ni Ligutan na kailanman ay hindi o wala pang nasasabing katotohanan ang kampo ng Bise Presidente hinggil dito.

Samantala, sinabi naman ni prosecution legal spokesperson Atty. Benjamin Tolosa Jr. na hanggang ngayon ay wala pang malinaw na posisyon ang kampo ni VP Sara.

Sa ngayon, patuloy na naghihintay ang prosecution panel sa magiging tugon ng depensa, lalo na kapag naiprisinta na nila ang sarili nilang mga ebidensya sa nagpapatuloy na paglilitis sa Senate Impeachment Court. | via Geli Mendez (Patrol 30)

Dinedma ni Batangas Representative Leandro Leviste ang subpoena ng National Bureau of Investigation ngayong araw kaugnay ng umano’y planong “honey trap” laban kay Executive Secretary Ralph Recto.

Ayon sa NBI, bibigyan nito ng isa pang pagkakataon si Leviste na harapin ang reklamo laban dito sa darating na Martes, Agosto 11, dahil sa pagsuspinde ng trabaho sa pamahalaan dahil sa masamang panahon.

Nauna nang isiniwalat ng nadawit na talent manager ng isang digital film platform na pinag-isipang mabuti ang planong character assassination laban kay Recto, kung saan kasabwat sina Leviste at dating Negros Oriental Rep. Jacinto “Jing” Paras.

Nakilala ang talent manager bilang si Lito De Guzman, na umaming nambugaw ng limang artistang babae sa isang five-star hotel sa Maynila kamakailan bilang bahagi ng naturang plano.

Gayunman, iginiit ng talent manager na iniwasan niyang ibugaw ang mga mas sikat na aktres upang hindi masira ang mga career nito.

Nagsisisi rin si De Guzman na nadawit siya sa isyu dahil naapektuhan na rin pati ang kanyang negosyo na nakaugnay sa media industry. | Sa panulat ni Anjo Riñon

Isinusulong ni Parañaque 2nd District Rep. Brian Yamsuan ngayong 2nd Regular Session ng 20th Congress ang isang pangmatagalang solusyon sa kakulangan ng mga textbook sa pampublikong paaralan.

Sa ilalim ng House Bill 7868, bubuo ang Department of Education at National Book Development Board ng isang National Textbook and Learning Resources Plan upang magtakda ng mga polisiya, alituntunin, at hakbang para matiyak na sapat, dekalidad, napapanahon, at epektibo ang mga aklat at learning materials para sa paghubog ng mga mag-aaral tungo sa hinaharap.

Nakapaloob sa panukala ang pagrepaso ng mga aklat kada limang taon upang matiyak na ang mga ito ay naaayon sa pangangailangan ng mga mag-aaral.

Ayon kay Yamsuan, bagama’t naglaan ang DepEd ng P19.5 bilyon para sa produksiyon ng mga aklat at maagang pagsasagawa ng procurement ngayong taon, kailangan itong maisabatas at maisama sa comprehensive plan upang matiyak na tuluy-tuloy ang programang tutugon sa pangangailangan ng mga mag-aaral.

Binanggit din ng kongresista ang resulta ng pag-aaral ng EDCOM II na nagsasabing 87 percent ng mga Grade 11 students ay mga non-independent readers o nahihirapang umunawa sa kanilang binabasa.

Kabilang din sa panukala ang pagbuo ng mga Textbook Review Committee upang matiyak ang kalidad ng mga aklat na gagamitin sa mga pampublikong paaralan.

Umaasa si Yamsuan na agad maipapasa ang panukala sa Kongreso upang tuluyang maresolba ang kakulangan ng mga aklat lalo na sa mga paaralan sa labas ng Metro Manila at Luzon. | via Geli Mendez (Patrol 30)

Tiniyak ni House Speaker Faustino Dy III na tututukan ng Kamara ang mga panukalang may direktang epekto sa araw-araw na pamumuhay ng mga Pilipino sa pagbubukas ng Second Regular Session ng 20th Congress.

Ayon kay Speaker Dy, kabilang sa mga pangunahing prayoridad ng Kamara ang food security, edukasyon, healthcare system, digital transformation, public safety, at paglikha ng mas maraming trabaho at oportunidad para sa mga Pilipino.

Binigyang-diin ng lider ng Kamara na kanilang uunahin ang mga batas na mararamdaman ng mamamayan at hindi lamang nakabatay sa dami ng maipapasang panukala kundi mahalaga rin ang kalidad at tunay na pakinabang ng mga ito sa taumbayan.

Para kay Dy, malaking bagay ang magandang ugnayan ng Kamara, Senado, at Executive Branch upang mapanatili ang mabilis na pagpasa ng mga panukala.

Aniya, patuloy nilang palalakasin ang committee system ng Kamara, kasabay ng maagang konsultasyon sa iba’t ibang sektor at pagpapanatili ng magandang ugnayan sa Senado at Ehekutibo.

Aminado si Speaker Dy marami nang hamon na kinakaharap ang ating mga kababayan kaya tuloy-tuloy ang trabaho ng mga kongresista upang makapagpasa ng mga batas na magpapababa ng gastusin, magpapalakas ng ekonomiya, lilikha ng trabaho, at magpapabuti ng mga serbisyong pampubliko para sa bawat Pilipino.

Iginiit ni Dy na mananatiling bukas ang Kamara sa pakikipagtulungan at matugunan ang pangangailangan ng ating mga kababayan.| via Geli Mendez (Patrol 30)

Binigyang-diin ng prosecution panel na hindi mabubura ang impeachment case laban kay Vice President Sara Duterte kahit pa ibalik nito ang pondong pinasasaili ng Commission on Audit.

Ayon kay private prosecutor, Atty. Benjamin “Jay” Tolosa Junior, hindi lamang tungkol sa pagbawi ng pondo ang isyu ng impeachment, kundi nakatutok sa mali at mapanlinlang na paggamit sa confidential funds na maituturing na pagtataksil sa taumbayan.

Iginiit ni Atty. Tolosa na sa ilalim ng proseso ng COA, may dalawang opsyon ang isang opisyal na inisyuhan ng Notice of Disallowance, ang pagsasauli ng pera o i-apela ang desisyon.

Maituturing anyang “restitution” na pag-amin na hindi naging tama ang paggastos sa pondo, pero nasa Senado pa rin bilang impeachment court ang pagpapasya kung paano bibigyang bigat ang nasabing usapin.

Suportado ng National Electrification Administration (NEA) ang panukalang alisin ang system loss charge sa mga konsyumer.

Gayunman, iginiit na dapat itong tumukoy sa non-technical losses gaya ng iligal na koneksyon at pagnanakaw ng kuryente.

Ayon kay NEA Administrator Antonio Mariano “Nani” Almeda na mahalagang isama sa panukalang batas ang mas matibay na suporta sa kampanya laban sa electricity pilferage upang mapanatiling matatag ang operasyon ng mga electric cooperative.

Bukod dito, ibinida rin ni Admin. Almeda ang analytics-driven anti-electricity pilferage program ng NEA na ipinatupad sa Zamboanga City Electric Cooperative na nagpababa sa system loss ng kooperatiba mula dalawampung porsyento noong Enero hanggang labing-apat na porsyento pagsapit ng Hunyo ngayong taon.

Samantala, nagbabala naman ang NEA na kung ipapasa sa mga electric cooperative ang lahat ng technical losses, maaari silang mahirapan na magbayad sa kanilang mga power supplier na posibleng makaapekto sa suplay ng kuryente.

Pinaiimbestigahan sa Senado ni Senate President Sherwin Gatchalian ang kawalan ng regular na fuel cost audit sa gitna ng patuloy na pagtaas ng generation charges sa singil sa kuryente na nagpapabigat sa gastusin ng mga konsyumer.

Kaugnay nito, naghain si SP Gatchalian ng isang resolusyon upang busisiin ang kasalukuyang sistema.

Ayon kay SP Gatchalian, ipinapakita ng tumataas na generation charges at kawalan ng regular na fuel cost audit ang pangangailangan ng mas matibay na pananagutan at transparency sa sektor ng power generation.

Binigyang-diin na mula January 2025 hanggang July 2026, tumaas sa dalawanlibo’t siyamnadaan pitumpung piso ang buwang bayarin ng isang residential customer ng Meralco na kumokonsumo ng 200 kilowatt-hours, mula sa dating dalawanlibo tatlumpung piso.

Giit pa ni SP Gatchalian, ang mataas na singil sa kuryente sa bansa ay pangunahing dulot ng generation charges na sa huli ay ipinapasa rin sa mga konsyumer kaya’t mahalagang magkaroon ng regular na fuel cost audit upang matiyak na makatarungan at makatwiran ang presyo ng kuryente.

Nagsampa ang Philippine Air Force (PAF) ng kasong administratibo laban sa tatlong estudyanteng umano’y nanggulo sa exhibit nito sa loob ng University of Santo Tomas (UST) sa Maynila noong Abril.

Kinilala ang mga naturang estudyante na sina Raven Racelis, Kerby Calizar, at Ray Manuel, na pawang mga mag-aaral ng UST at iniuugnay umano sa Kabataan Party-list.

Matatandaang binulyawan ng tatlong student-activist ang ilang opisyal ng Air Force sa naturang exhibit, kabilang ang tagapagsalita nitong si Col. Christina Basco.

Samantala, sa isang social media post, mariing kinondena ni Racelis ang pagsasampa ng reklamo ng Philippine Air Force laban sa kaniya at sa kaniyang mga kasama. | Sa panulat ni Anjo Riñon