DWIZ 882

Nagpatupad ng pansamantalang liquor ban at curfew ang Pamahalaang Bayan ng Magsingal, Ilocos Sur dahil sa epekto ng Tropical Storm Maymay.

Ayon kay Acting Mayor Alrico Favis, layunin ng kautusan na maprotektahan ang buhay at kaligtasan ng mga residente habang nananalasa ang bagyo.

Kabilang sa mga mahigpit na ipinagbabawal ang pagbebenta, pagbili, pag-inom, at pamamahagi ng alak sa bayan.

Kasabay nito, ipinatutupad ang curfew mula alas-siyete ng gabi hanggang alas-kuwatro ng madaling araw.

Sa naturang curfew, hindi nito saklaw ang mga kawani ng pamahalaan, mga health worker, utility company personnel, at mga responder sa sakuna at emergency.

Paalala ng mga otoridad, mananatiling umiiral ang liquor ban at curfew hanggang sa alisin ang Tropical Cyclone Wind Signal sa barangay, Magsingal. | Sa panulat ni Reabelle Medina

Tumaas ang bilang ng mga walang trabaho sa Pilipinas noong buwan ng Hunyo.

Batay sa Labor Force Survey ng Philippine Statistics Authority, umabot sa 4.9% ang naitalang unemployment rate sa nasabing buwan, na mas mataas kumpara sa 4.8% noong Mayo.

Samantala, mas mataas din ang bilang na ito kumpara sa 3.7% na naitala sa kaparehong buwan noong 2025.

Tiniyak naman ng PSA ang patuloy na pagbabantay sa mga bagay na nakakaapekto sa trabaho at kabuhayan ng mga Pilipino.—sa panulat ni Mark Terrence Molave

Nakatakdang humarap bilang mga testigo sa Senate Impeachment Court sa susunod na linggo ang dalawa sa mga dating aide ni Vice President Sara Duterte na humawak sa ₱612.5 milyong confidential funds ng Office of the Vice President (OVP) at Department of Education (DepEd).

Kinumpirma ito ni House Lead Prosecutor Gerville Luistro, na nagsabing kabilang sa mga susunod na testigo sina dating Special Disbursing Officers Gina Acosta ng OVP at Edward Fajarda ng DepEd.

Inatasan na rin ni Senate Impeachment Court Presiding Officer Chiz Escudero ang pagpapalabas ng subpoena upang humarap sa paglilitis sina Acosta at Fajarda, gayundin sina COA-ICFAO Supervising Auditor Xylene Mae del Campo at House Legislative Information Resources Management Department Director Marivic Pareja.

Inaasahang ipagpapatuloy ni Del Campo ang kaniyang testimonya sa muling pagbubukas ng paglilitis sa susunod na linggo upang patibayin ang naunang testimonya ng dalawang empleyado ng LandBank na sina Violeta Constantino at Nenita Camposano kaugnay ng ₱612.5 milyong confidential funds ng OVP at DepEd.

Una nang itinuro ni dating COA-ICFAO State Auditor Roderick Wamil na sina Acosta at Fajarda ang tumanggap ng confidential funds at nagsumite ng liquidation documents para sa kani-kanilang tanggapan.

Samantala, iginiit ni House Prosecutor Joel Chua na batay sa patakaran ng COA, ang head of agency ang may pananagutan sa paggamit ng confidential funds.

Ayon naman kay House Trial Spokesperson Zia Alonto Adiong, malinaw sa mga dokumentong iniharap sa impeachment court na si Vice President Sara Duterte ang approving authority, kaya hindi umano maaaring sabihing wala siyang pananagutan sa paggamit ng naturang pondo.

Binabagtas na ng Bagyong Maymay ang hilagang bahagi ng Luzon matapos maglandfall sa Magsingal, Ilocos Sur kaninang alas-dos ng madaling araw.

Batay sa monitoring ng PAGASA, taglay nito ang lakas na animnapu’t limang kilometro kada oras, at pagbugso na aabot sa isangdaan at sampung kilometro kada oras.

Kumikilos ito patungong silangan sa bilis na sampung kilometro bawat oras.

Nananatiling nakataas ang Signal Number Two sa Ilocos Norte; hilaga at gitnang bahagi ng Ilocos Sur; kanlurang bahagi ng Apayao; Abra; hilagang bahagi ng Kalinga; at hilagang bahagi ng Mountain Province.

Nakataas din ang Signal Number One sa nalalabing bahagi ng Ilocos Sur; La Union; hilagang bahagi ng Pangasinan; nalalabing bahagi ng Apayao; nalalabing bahagi ng Kalinga; nalalabing bahagi ng Mountain Province; Ifugao; Benguet; ka-timugang bahagi ng Babuyan Islands; Cagayan; Isabela; Quirino; Nueva Vizcaya; at hilaga at gitnang bahagi ng Aurora.

Samantala, ayon sa PAGASA, posibleng magpatuloy hanggang sa susunod na linggo ang mga pag-ulan dahil sa inaasahang paghila ng Bagyong Dolphin sa hanging habagat. l mula sa panulat ni Reianne Antiquina

Ipinasususpinde ng grupong Concerned Health Advocates for the Prevention and Control of Tuberculosis o CHAP-C-T sa Office of the Ombudsman si Health Secretary Jose Pujalte Junior kaugnay ng pagsuspinde sa mahigit tatlong bilyong pisong procurement ng mga gamot laban sa tuberculosis para sa 2026.

Ayon sa grupo, posibleng magdulot ng pagkaantala sa supply ng gamot sa buong bansa dahil umaabot ng anim hanggang siyam na buwan ang procurement at delivery ng mga ito.

Bukod dito, inirerekomenda rin ng grupo ang paghahain ng kasong graft laban kay Pujalte.

Giit pa ng CHAP-C-T, katumbas na ng grave misconduct, grave abuse of authority at conduct prejudicial to the best interest of the service ang pagsuspinde ng kalihim sa mga gamot para sa tuberculosis program.

Binanggit din sa reklamo ang alegasyon ng mga umano’y whistleblower na sinadyang pabagalin ang bidding process upang mapaboran ang isang pribadong supplier.  l mula sa panulat ni Reianne Antiquina

Nakaalerto na ang Department of Social Welfare and Development (DSWD) matapos yanigin ng magnitude 6.4 na lindol ang Sarangani at Davao Occidental kahapon.

Ayon kay DSWD Secretary Irene Dumlao, patuloy na nakikipag-ugnayan ang ahensya sa mga lokal na pamahalaan habang nakaantabay na rin ang mga quick response team para sa agarang pagtugon.

Dagdag pa ni Secretary Dumlao, nakahanda na rin ang mga family food pack at iba pang relief supplies upang maipamahagi agad sa mga naapektuhang pamilya.

Ayon sa PHIVOLCS, aftershock ng magnitude 7.8 na lindol na tumama sa Sarangani noong Hunyo a-otso ang naganap na pagyanig kahapon.  l mula sa panulat ni Reianne Antiquina

Ibinasura na ng Korte Suprema ang mga petisyon na kumukuwestiyon sa mga isinagawang pagdinig ng House Committee on Justice kaugnay ng mga impeachment complaints laban kay Vice President Sara Duterte.

Ayon sa Supreme Court En Banc, naging moot and academic o wala nang saysay ang mga isyung inihain matapos maaprubahan at maipadala ng Kamara sa Senado ang Articles of Impeachment.

Anya, natapos na ang tungkulin ng Kamara nang maipasa nito sa Senado ang Articles of Impeachment, kaya naisakatuparan na ang mga hakbang na nais pigilan ng mga petitioners.

Iginiit din ng hukuman na nasa kamay na ng Senate Impeachment Court ang proseso kaya anumang magiging pasya nito hinggil sa mga naging hakbang ng Kamara ay hindi na makakaapekto sa usapin.   l mula sa panulat ni Reianne Antiquina

Ikinalugod ni House Committee on Justice Chairperson at House Lead Prosecutor Gerville Luistro ang naging desisyon ng Korte Suprema na ibasura ang mga petisyong kumukuwestiyon sa proseso ng Kamara kaugnay ng impeachment laban kay Vice President Sara Duterte.

Ayon kay Luistro, pinagtibay ng desisyon ng Korte Suprema ang mga mekanismo ng Saligang Batas at ang prinsipyong walang sinumang opisyal ng pamahalaan—kahit pa ang ikalawang pinakamataas na opisyal ng bansa—ang nakahihigit sa pananagutan.

Aniya, sa pagkilala ng Korte Suprema na moot na ang mga petisyon matapos maipadala sa Senado ang Articles of Impeachment, maaari nang magpatuloy ang proseso ng paglilitis at paghahanap ng katarungan.

Nanawagan din si Luistro na igalang ang Konstitusyon, itaguyod ang rule of law, at hayaang gampanan ng Senate Impeachment Court ang mandato nito nang may buong kalayaan, patas na pagtingin, at walang kinikilingan.

Binigyang-diin pa niya na higit na mapaglilingkuran ang hustisya kung ang mga institusyon ng bansa ay malayang makatutupad sa kanilang mga tungkulin nang may integridad, kalayaan, at mahigpit na pagsunod sa batas.

Pinag-aaralan ng Department of Interior and Local Government (DILG) ang pagsasampa ng kasong human trafficking laban kay dating Negros Oriental Representative Jing Paras.

Ayon kay Interior Secretary Jonvic Remulla, si Paras ang itinuturing na person of interest sa planong paggamit ng mga babae upang idiin ang matataas na opisyal ng pamahalaan.

Bukod kay Executive Secretary Ralph Recto, sinabi ng kalihim na kabilang siya, ang kaniyang kapatid na si Ombudsman Jesus Crispin Remulla, Public Works Secretary Vince Dizon at iba pang opisyal ng gobyerno sa mga target ng plano.

Lumilitaw ang usapin matapos arestuhin ng National Bureau of Investigation (NBI) ang isang talent manager na hinihinalang bugaw na nagbanggit ng pangalan ng dating congressman kaugnay ng sinasabing plano.

Samantala, mariing itinanggi nina Paras at Batangas Representative Leandro Leviste ang mga paratang.  l mula sa panulat ni Reianne Antiquina