DWIZ 882

Kailangan ng Commission on Elections (COMELEC) ng karagdagang 3-billion pesos budget sa bawat taong maipagpapaliban ang Barangay at Sangguniang Kabataan Elections (BSKE).

Ayon kay COMELEC Chairman George Garcia, nakatakdang idaos ang nasabing halalan sa November 2, 2026, ngunit may mga panukalang naghangad na ipagpaliban ang eleksyon.

Anya, kailangan ng dagdag na pondo dahil maaaring muling buksan ang voter registration sa Setyembre kung hindi matutuloy ang halalan sa November 2.

Magugunitang ang COMELEC budget para sa BSKE ngayong taon ay 19-billion pesos, kung saan 8-billion na ang nagamit para sa pag-imprenta ng balota, election materials at overtime pay.

Sa natitirang 11-billion, nakalaan ang 9-billion para sa mga electoral board member, habang tig-isang bilyong piso para sa training at deployment ng election materials. l mula sa panulat ni Jordan Gutierrez

Kinumpirma ni Department of Foreign Affairs Spokesperson Analyn Ratonel na wala pang naiulat na nasawing Pilipino sa malakas na lindol sa Colombia noong Lunes, Agosto A-diyes.

Tiniyak ni Ratonel na patuloy na nakikipag-ugnayan ang ahensya sa mga otoridad sa Colombia kasunod ng magnitude 7.4 na lindol na yumanig sa naturang bansa.

Ayon sa DFA, nasa isangdaan labingsiyam na Pilipino ang nananatili sa nasabing bansa.

Batay sa ulat ng Colombian authorities, umakyat na sa mahigit dalawangdaan limampung katao ang bilang ng mga namatay sa pagyanig. l mula sa panulat ni Reianne Antiquina

Umakyat na sa tatlong daang toneladang basura ang nahakot kahapon mula sa Baclaran Estero sa Parañaque City matapos maipon dahil sa tuloy-tuloy na pag-ulan sa Metro Manila.

Nabatid na mahigit limampung truck na ang napuno ng mga nakolektang basura.

Bumisita ni DPWH Secretary Vince Dizon ang lugar kung saan sinabi niya na inanod papasok sa estero ang mga basura mula sa Manila Bay.

Para kay Secretary Dizon, maituturing na krisis ang sitwasyon dahil sa napakaraming basura na kailangang linisin.

Ipinaliwanag naman ni Parañaque CENRO Officer-in-Charge Bernie Amurao na nasira ang isa sa dalawang trash catchment na pumipigil sa basura mula sa Manila Bay na makapasok sa estero dahil sa malalakas na alon.

Samantala, ipinagpapatuloy na ngayong araw ang clearing operations sa tulong ng MMDA o Metropolitan Manila Development Authority at Regasco.  l mula sa panulat ni Reianne Antiquina

Nagsampa ng tatlong kaso ng grave threats ang Department of Justice laban kay Vice President Sara Duterte kaugnay ng pagbabanta nito laban kay Pangulong Ferdinand Marcos Jr., First Lady Liza Araneta Marcos, at dating House Speaker Martin Romualdez.

Ayon kay Justice Spokesman Atty. Polo Martinez, napagpasyahan nilang maghain ng kaso matapos matuklasang may prima facie evidence na may reasonable certainty of conviction.

Kaugnay nito, ibinasura ng DOJ ang reklamong inciting to sedition laban sa Pangalawang Pangulo dahil sa kawalan ng prima facie evidence.

Matatandaang inirekomenda ng National Bureau of Investigation (NBI) noong February 2025 na kasuhan ang Bise Presidente ng inciting to sedition at grave threats ngunit nanatili ito sa DOJ hanggang sa pagsisimula ng impeachment trial. l mula sa panulat ni Reianne Antiquina

Hinikom ng Office of the Ombudsman ang Sandiganbayan na repasuhin ang desisyon nito na tanggihang italaga si dating Public Works Secretary Manuel Bonoan bilang state witness.

Humarap si Bonoan kahapon sa anti-graft court para sa kanyang arraignment kaugnay sa kasong graft ni Senador Jinggoy Estrada ngunit iniurong ito sa Agosto A-disi-otso.

Samantala, tiniyak ng Philippine National Police (PNP) na makadadalo ang dating kalihim sa paglilitis kay dating Senador Bong Revilla Jr. kaugnay ng kasong malversation.

Matatandaang nahaharap sina Bonoan, Estrada, at Revilla sa alegasyon na tumanggap ng kickback mula sa maanomalyang flood control projects.  l mula sa panulat ni Reianne Antiquina

Tiniyak ng Department of Social Welfare and Development (DSWD) na tuloy-tuloy ang pagbibigay ng humanitarian assistance para sa mga pamilyang apektado ng hagupit ng Habagat at mga nagdaang Bagyong Luis at Maymay.

Pinakilos na ng DSWD ang mga mapagkukunan nito upang suportahan ang mahigit walongdaang libong pamilya o katumbas ng halos tatlong milyong indibidwal na apektado ng patuloy na sama ng panahon, pamamahagi ng family food packs, at tulong pinansyal sa buong bansa.

Ayon kay Assistant Secretary Irene Dumlao, maayos ang supply ng mga relief goods kung saan ang lahat ng mga bodega ng DSWD sa buong bansa ay nananatiling ganap na ligtas at tuyo sa gitna ng pagbaha.

Sa ngayon, batay sa datos ng ahensya, nasa 4.7 million na family food packs pa ang nakahandang ipamigay sa buong bansa, at mayroon ding 1.6 billion pesos na standby funds upang mapanatili ang suporta ng pamahalaan para sa mga apektadong lugar.  l mula sa panulat ni Reianne Antiquina

Nanindigan ang kampo ni dating Congressman Jing Paras na tulong at hindi panunuhol ang 5.5 milyong piso na ibinigay sa umano’y isang talent manager matapos tumestigo ang nasabing indibidwal tungkol sa umano’y planong paninira kay Executive Secretary Ralph Recto.

Ayon kay Atty. Mark Tolentino, ang abogado ni Paras, kusang lumapit sa kanila ang isang indibidwal na kinilala bilang si alyas “Ken” upang tumestigo at magpatulong sa pagbuo ng sinumpaang salaysay niya at ng iba pang kababaihan.

Sinabi rin ni Atty. Tolentino na natatakot umano ang mga testigo dahil mataas na opisyal ang sangkot kaya humingi sila ng pondo para sa kanilang seguridad, at iba pang gastusin.

Samantala, nagpaplano na rin anya si Paras na magsampa ng reklamong perjury laban sa mga taong nag-aakusa sa kanya. l mula sa panulat ni Reianne Antiquina