DWIZ 882

Isa na namang Pinay ang mag-uuwi ng karangalan sa bansa matapos na tanghaling GRAND WINNER si Jonnabeth Velante sa katatapos lamang na Mrs. Grand International 2026 sa Myanmar.

Tinalo nga ng Pinay mula sa San Jose, Occidental Mindoro ang mga representative ng iba’t ibang bansa sa nasabing pageant na ginanap kahapon, August 11, 2026.

Bukod sa grand title, hakot award din si Velante nang masungkit nito ang apat na special award kabilang dito ang Best in Talent, Best in National Costume, Best Impression Award at Best in Evening Gown.

Ang Pinay beauty queen ay sinamahan ng kaniyang National Director na si Maan Cueto-Aris.

“KUNG MAY TINAMAAN MAN PO, SORRY!”

Ito ang paliwanag ni private prosecutor Atty. Amando Virgil Ligutan matapos siyang “ma-call out” bago ang pagtatapos ng Day 15 ng impeachment trial laban kay Vice President Sara Duterte.

Matatandaang nagbahagi ng opinyon si Ligutan sa kaniyang social media account kasunod ng naging tensyon sa pagitan nina private prosecutor Atty. Lorna Kapunan at counsel for the defense Atty. Kristine Ferrer kaugnay ng usapin sa “misleading questions” na hindi umano pinapayagan o hindi maaaring gamitin sa cross-examination.

Ayon kay Ligutan, wala siyang pinatutungkulan at wala ring malisya sa kaniyang post, dahil ang kaniyang opinyon ay nakabatay lamang sa mga panuntunang ipinatutupad ng Senate Impeachment Court.

Iginiit din ni Ligutan na wala siyang pinagsisisihan sa kaniyang mga pahayag dahil wala naman umano siyang pinangalanan o tinukoy sa kaniyang Facebook post.

Paliwanag ni Ligutan, hindi na niya kasalanan kung mayroon mang tinamaan sa kaniyang pahayag. | via Geli Mendez (Patrol 30)

Naniniwala si House Lead Prosecutor Gerville Luistro na malakas ang mga ebidensyang kanilang ipinrisinta sa impeachment trial para sa Article 1 na tumutukoy sa maling paggamit ng confidential funds ni Vice President Sara Duterte.

Sa ambush interview, sinabi ni Luistro na sapat at matitibay ang mga dokumento at salaysay ng mga testigong iniharap sa impeachment court.

Bagama’t kulang pa ang mga witness na kanilang naiprisinta, dapat abangan ng taumbayan ang mga testigong kanilang ihaharap sa mga susunod na paglilitis para sa Article 1.

Layon aniya nito na mapatunayan ang lahat ng alegasyon, partikular ang iregularidad at maling paggastos ni VP Sara sa confidential funds. | via Geli Mendez (Patrol 30)

“She should be consistent.”

Ito ang giit ni House Lead Prosecutor Gerville Luistro, sakaling humarap na sa impeachment trial si Gina Acosta, ang dating Special Disbursing Officer ni Vice President Sara Duterte.

Ayon kay Luistro, hindi dapat baguhin ni Acosta ang kaniyang sinumpaang salaysay sa naging pagdinig ng House Committee on Good Government and Public Accountability na pinamumunuan ni House Prosecutor Joel Chua.

Maliwanag aniya sa naging pagdinig ang pag-amin nina Acosta at dating DepEd Special Disbursing Officer Edward Fajarda na hindi nila kilala ang mga recipient na tumanggap ng cash advances mula sa confidential funds.

Sinabi rin nina Acosta at Fajarda na ibinigay nila ang pera sa mga security officer, kabilang si Col. Raymund Dante Lachica at isang indibidwal na nagngangalang Nolasco.

Sinabi rin ni Luistro na tinanong din nila sina Acosta at Fajarda kung bakit nila ibinigay ang pondo sa mga security officer gayong sila, bilang mga SDO, ang may pananagutan sa pagdisburse ng pera.

Bilang tugon, sinabi aniya ni Acosta na iniutos sa kanila ni Vice President Sara Duterte ang pag-turnover ng pondo sa mga third party.

Aminado si Luistro na “curious” siya sa posibleng sasabihin nina Acosta at Fajarda sa impeachment trial pero iginiit niya na dapat panindigan ng dalawa ang kanilang naunang mga pahayag upang hindi sila maakusahang nagsisinungaling.

Makatutulong din aniya ito sa pagpapatibay ng mga alegasyon laban kay Sa Bise Presidente. | via Geli Mendez (Patrol 30)

Umakyat na sa dalawampu’t anim na indibidwal ang namatay dahil sa hagupit ng pinalakas na Habagat at mga nakaraang bagyo.

Batay sa pinakahuling datos ng Philippine National Police (PNP), dalawampu’t limang sibilyan at isang pulis ang nasawi sa mga insidenteng kaugnay ng masamang panahon.

Naitala ang pinakamaraming namatay sa CAR o Cordillera Administrative Region na umabot sa labing-anim kung saan lahat ay dahil sa mga pagguho ng lupa sa Baguio City at Benguet.

Pito naman ang kumpirmadong patay sa CALABARZON dahil sa rockfall, landslide, pagkalunod, electrocution at pagkabagsak ng puno; habang dalawa ang nasawi sa Region 1; at isang pulis ang namatay sa pagkalunod sa Cadiz City, Negros Occidental.

Samantala, labing-limang indibidwal din ang nasugatan, kabilang ang labintatlo sa Cordillera at dalawa sa CALABARZON, habang dalawa pa ang patuloy na pinaghahanap ng mga otoridad sa CALABARZON.  l mula sa panulat ni Jordan Gutierrez

Ibinalik ng gobyerno sa panukalang 2027 National Budget ang pondo para sa mga flood-control projects, na umabot sa mahigit 107.4 billion pesos.

Ayon kay Budget Secretary Kim Robert De Leon, layon nitong ipagpatuloy, ayusin at pagandahin ang mga kasalukuyang imprastraktura sa gitna ng patuloy na pagbaha tuwing tag-ulan.

Mahalaga anyang tapusin ang mga nasimulang proyekto at pondohan ang tuluy-tuloy na operasyon ng mga flood-control facility.

Kabilang sa pondo ang 19.6-billion pesos na capital outlay para sa mga ongoing foreign-assisted flood-control projects, habang sakop din nito ang maintenance, repair, rehabilitation at improvement ng mga kasalukuyang pasilidad.

Tiniyak ng gobyerno na malinaw ang lokasyon at may aktuwal na program of work ang mga proyekto upang maiwasan ang mga “ghost” flood-control project.  l mula sa panulat ni Jordan Gutierrez

Natanggap na ng Senado at Kamara ang isinumite ng Department of Budget and Management (DBM) na panukalang pambansang budget para sa 2027, na nagkakahalaga ng 7.2 trillion pesos.

Dinala nina Budget Secretary Kim Robert De Leon at Presidential Legislative Liaison Office Secretary Joey Salceda ang mga kopya ng 2027 National Expenditure Program sa Senado, na tinanggap nina Senate President Sherwin Gatchalian, Finance Committee Chairman JV Ejercito at Senate Majority Leader Migz Zubiri.

Sa Kamara, tiniyak ni House Speaker Faustino “Bojie” Dy the Third na masusing susuriin ng Kongreso ang panukala upang matiyak na ang bawat piso ay mapupunta sa mga programang makabubuti sa mga Pilipino.

Inilaan ang pinakamalaking alokasyon ng pondo sa edukasyon na umabot sa 976-billion pesos, sinusundan ng Department of Public Works and Highways na may 644-billion at Department of Health na 353.8 billion pesos.

Kabilang din ang 332.5-billion pesos na pondo para sa DILG; 328.8-billion sa Department of National Defense; 302.2-billion sa Transportation; 261.7-billion sa Agriculture; 241.6-billion sa DSWD; 176.5-billion sa Higher Education at Judiciary na may 86.3-billion pesos. l mula sa panulat ni Jordan Gutierrez