Author

DWIZ 882

CONFIDENTIAL FUNDS NI VP SARA, POSIBLENG IPASAULI NG COA

Posibleng ipasauli ng Commission on Audit (COA) ang 612.5-million pesos confidential funds ni Vice President Sara Duterte.

Sa ika-labinglimang araw ng impeachment trial, nilinaw ni COA Auditor Xylene Del Campo na posibleng bawiin ang naturang pondo dahil sa paglipat ng paghawak nito sa mga taong hindi otorisado.

Kinuwestyon ni Senate President Sherwin Gatchalian kung maaari ring ma-disallow ang 125-million pesos OVP confidential fund para sa fourth quarter ng 2022 at ang buong Dep-Ed confidential funds.

Iginiit ni Del Campo na ang paglipat ng cash advance mula sa Special Disbursing Officer patungo sa ibang tao ay nakakaputol sa “chain of accountability,” dahil nawawala ang personal na kaalaman ng SDO kung saan at paano talaga ginamit ang pondo.

Nilinaw ng COA Auditor na patuloy pa rin pinag-aaralan ang pag-disallow sa Dep-Ed confidential funds dahil itinuturing na itong settled accounts at kailangan ng pahintulot ng COA Chairperson para muling buksan.

Ibinibala ni Del Campo na kapag nailipat na sa hindi otorisadong opisyal, maaaring magamit ang pondo sa mga gastusing hindi pinapayagan para sa paggasta ng confidential funds. | sa panulat ni Jordan Gutierrez

August 13, 2026 0 comment

HEADLINES

MARCOS ADMIN, UMANGAT NG 14 POINTS SA SATISFACTION RATING — SWS

written by DWIZ 882

Umangat ng labing-apat na puntos ang satisfaction rating sa administrasyon ni Pangulong Ferdinand Marcos Jr. nitong June 2026.

Batay sa survey ng Social Weather Stations (SWS), 42-percent ng mga adult Filipino ang nagsabing kuntento sila sa performance ng administrasyon, habang 40-percent ang hindi satisfied at 17-percent ang hindi matukoy ang kanilang pananaw.

Ayon sa SWS, ito ay 14-point recovery mula sa negative-13 net satisfaction rating noong March 2026, na naitalang record low para sa administrasyong Marcos at pinakamababa sa loob ng labing-anim na taon.

Kabilang sa mga larangang mababa ang ratings ang pagtugon ng administrasyon sa inflation, na may negative-12, at paglaban sa korapsyon na may negative-14.

Nakakuha naman ng “very good rating” ang administrasyon sa basic education, pagtulong sa mahihirap, at mga polisiya para sa paglikha ng trabaho.

Isinagawa ang survey sa isanlibo dalawangdaang respondents noong June 20 hanggang June 29, isang buwan bago ang ika-limang SONA ni Pangulong Marcos. | sa panulat ni Jordan Gutierrez

August 13, 2026 0 comment

NATIONAL NEWS

LIMANG LIBONG PISONG MULTA SA MALI-MALING PAGTATAPON NG BASURA SA METRO MANILA, ITATAAS

written by DWIZ 882

Daragdagan na ng Metropolitan Manila Development Authority (MMDA) ang multa sa mali-maling pagtatapon ng basura sa Metro Manila.

Ayon kay MMDA Chairman Romando Artes, itataas na sa limang libong piso mula sa limang daang piso ang multa matapos aprubahan ng Metro Manila Council (MMC) ang resolusyon.

Hinihintay pa anya ang mga ordinansa ng bawat lungsod at pag-uusapan ito sa susunod na MMC meeting sa Agosto A-disi-otso.

Nanawagan si Chairman Artes sa publiko na iwasan ang maling pagtatapon ng basura, lalo na sa tag-ulan, dahil maaaring bumara ang mga ito sa drainage at magpalala ng baha. | sa panulat ni Jordan Gutierrez

August 13, 2026 0 comment

NATIONAL NEWS

ITALIAN AEROSPACE FIRM NA LEONARDO, KUMPYANSANG MAKUKUHA ANG MRF CONTRACT NG PHILIPPINE AIR FORCE

written by DWIZ 882

Kumpiyansa ang Italian aerospace company na Leonardo na kaya nitong mag-supply ng kanilang Typhoon fighter jet sa Philippine Air Force (PAF).

Ayon kay Leonardo Eurofighter Export Campaigns Head Enrico Fossatti, nakasalalay sa pamahalaan ng Pilipinas kung gaano kabilis nilang maibibigay ang mga Eurofighter Typhoon sakaling manalo ito sa Multi-Role Fighter Program ng Hukbong Himpapawid.

Gayunman, may apat anyang aktibong aircraft assembly line ang kompanya, sa bawat bansang bahagi ng Eurofighter program, tulad ng Italia, Germany, United Kingdom, at España.

Giit din ni Fossatti, malinaw ang pakikitungo nito sa pamahalaan ng Pilipinas at sa Philippine Air Force, kaya makakaasa ang bansa na kayang i-deliver ang mga Eurofighter Typhoon.

Nauna nang sinabi ni Defense Secretary Gilberto Teodoro na naghahanap ang bansa ng limang supplier para sa MRF program ng Air Force.

Ilan sa mga kakumpetensya ng Eurofighter Typhoon ang Saab JAS-39 Gripen ng Sweden; KF-21 Boramae ng Korea Aerospace Industries, na manufacturer din ng FA-50 light fighter; F-16 Viper ng Lockheed Martin; at Rafale ng Dassault Aviation. | sa panulat ni Anjo Riñon

August 13, 2026 0 comment

HEADLINES

DAGUPAN CATHEDRAL, NANATILING WALANG BAHA DAHIL SA SARILING FLOOD CONTROL SYSTEM NITO

written by DWIZ 882

Mala-himala ang sinapit ng St. John the Evangelist Cathedral sa Dagupan City dahil nanatili itong tuyo at hindi naapektuhan ng baha dulot ng tuloy-tuloy na malakas na ulang dulot ng bagyo at Habagat.

Gayunman, ayon kay Dagupan Cathedral Parish Priest, Msgr. Manuel Bravo, ito’y dahil kinabitan nito ng isang underground cistern ang parking lot ng simbahan noong 2025 upang doon imbakin ang tubig-baha tuwing umuulan, sa tulong ni dating Public Works Secretary Rogelio “Babes” Singson.

Dagdag pa ng pari, may lalim na tatlong metro ang nasabing imbakan na inilagay sa ilalim ng paradahan sa patyo ng katedral; at mayroon din itong mga pump upang mailabas ang tubig-baha sa drainage system ng lungsod.

Nakatulong din anya na elevated ang pasukan sa nasabing simbahan upang maiwasang pumasok sa compound nito ang baha mula sa kalsada.

Iginiit din ni Msgr. Bravo na si Singson ang nagpaliwanag sa pamunuan ng simbahan na gamitin ang naturang teknolohiya, na nakabatay naman sa flood control system ng Bonifacio Global City (BGC) sa Taguig.

Nagpadala rin anya ang dating kalihim ng DPWH ng ilan sa kanyang mga tauhan upang umalalay sa pagsasagawa ng nasabing imbakan. | sa panulat ni Anjo Riñon

August 13, 2026 0 comment

NEWS

MARIKINA LGU, PINURI ANG MABILIS NA AKSYON NG MMDA

written by DWIZ 882

Nagpasalamat ang lokal na pamahalaan ng Marikina City sa Metropolitan Manila Development Authority (MMDA) sa mabilis nitong pagde-deploy ng mobile booster pump upang mabilis na pahupain ang mga binahang bahagi ng Barangay Malanday at Tumana.

Ayon kay Mayor Maan Teodoro, kinailangang humingi ng tulong ang Marikina LGU sa MMDA dahil pumalya umano ang lokal na pumping station sa Tumana.

Malaking tulong anya ang kagyat na pagresponde ng ahensya upang mas mapadaling makabalik sa normal na pamumuhay ang mga residente ng mga naaapektuhang lugar.

Umaasa rin si Teodoro na mapapalakas pa ang ugnayan ng Marikina LGU at ng MMDA upang mas mapaayos ang pagresponde ng mga ito sa baha.

Matatandaang umabot sa lagpas 17 meters ang peak level ng Marikina River matapos ang tuloy-tuloy na pag-ulan sa mga nakalipas na araw; habang saglit na umakyat kagabi ang lebel ng ilog sa 15 meters, o first alarm. | sa panulat ni Anjo Riñon

August 13, 2026 0 comment

HEADLINES NATIONAL NEWS

Leadership fund para sa mga priority projects ng mga senador, ibinunyag ni dating DPWH Secretary Bonoan

written by DWIZ 882

Ibinunyag ni dating Public Works Secretary Manuel Bonoan sa Sandiganbayan na bawat senador ay may tinatawag na “leadership fund” mula sa pambansang budget noong 2024 para sa kanilang priority projects.

Ayon kay Bonoan, nasa limandaang milyong piso ang minimum na alokasyon sa bawat senador, habang umaabot sa isang bilyong piso ang para sa mga namumuno sa mahahalagang komite ng Senado.

Isiniwalat din ng dating D.P.W.H. Secretary na ang 24-billion-peso leadership fund ay partikular na inilaan sa mga senador na nagrekomenda ng mga proyektong isasama sa mga programa ng gobyerno.

Iginiit ni Bonoan na may pahintulot ni dating Senate President Juan Miguel Zubiri ang naturang pondo at ang senador din ang may otoridad kung itataas ang alokasyon.

Inilahad din ng dating kalihim na sinabi ni dating DPWH Undersecretary Roberto Bernardo kina dating Senador Bong Revilla at Senador Jinggoy Estrada na magsumite ng mga proyekto, habang nagsumite rin ng listahan sina Senators Bong Go at Robin Padilla.

Gayunman, nilinaw ni Bonoan na hindi nangangahulugang ilegal ang paggamit ng leadership funds dahil nakapaloob anya ito sa ad hoc discretionary allocation ng ahensya.

Ginawa ni Bonoan ang mga pahayag sa pagdinig ng Sandiganbayan Third Division kaugnay ng kasong malversation laban kay dating Senador Bong Revilla na may kaugnayan sa umano’y ghost flood control project sa Pandi, Bulacan. | Sa panulat ni Jordan Gutierrez

August 13, 2026 0 comment

NATIONAL NEWS

OVP, walang naipakitang resibo sa mga biniling items gamit ang confidential funds — COA

written by DWIZ 882

Bigong makapagsumite ang Office of the Vice President ng mga opisyal na resibo o sales invoice para patunayang nabili ang ilang gamit gaya ng mga mesa, upuan, desktop computer at printer gamit ang confidential funds.

Ito ang sinabi ni COA Witness Xylene Mae Del Campo sa Impeachment Court matapos siyang tanungin ni Presiding Officer Chiz Escudero.

Ayon kay Del Campo, kailangan ang resibo o invoice para mapatunayan na totoong nabili ang mga produkto, lalo na’t ordinaryong commercial establishments ang pinagbilhan.

Binigyang-diin ng COA witness na pare-pareho ang requirement ng COA sa lahat ng ahensya ng gobyerno.

Taliwas ito sa posisyon ng OVP na hindi na kailangang magsumite ng invoices o official receipts dahil confidential ang kanilang surveillance at monitoring activities.

Matatandaang si Del Campo rin ang naglabas ng Notices of Disallowance kaugnay ng paggamit ng OVP ng 125 milyong pisong confidential funds sa loob ng labing-isang araw noong December 20 hanggang 31, 2022.—sa panulat ni Reabelle Medina—ulat mula kay Cely Ortega-Bueno (Patrol 19)

August 12, 2026 0 comment

NATIONAL NEWS

Subpoena para sa mga testigong ihaharap sa susunod na paglilitis, muling inihain ng House prosecutors

written by DWIZ 882

Muling naghain ng subpoena ang House Prosecution Panel para sa mga testigong kanilang ihaharap sa susunod na paglilitis.

Sa pagtatapos ng Day 15 ng impeachment trial laban kay Vice President Sara Duterte, hiniling ni House Lead Prosecutor Gerville Luistro kay Senate Presiding Officer Chiz Escudero na muling magpalabas ng subpoena ad testificandum sa tatlong witness na hindi nakaharap ngayong linggo.

Kabilang na dito sina Marivic Pareja, ang Bureau Director ng Legislative Information Office ng House of Representatives; Gina Acosta, ang dating Special Disbursing Officer ng Office of the Vice President o OVP; at Edward Fajarda, ang dating Special Disbursing Officer ng Department of Education o DepEd.

Ipinapasaama rin ni Luistro sa pag-isyu ng subpoena si Lemuel Ortonio, ang Assistant Chief of Staff ng OVP.

Nabatid na si Ortonio ang ikaapat na testigong ihaharap sa susunod na linggo ng prosecution team para sa Article 1 ng Articles of Impeachment. | via Geli Mendez (Patrol 30)

August 12, 2026 0 comment

NATIONAL NEWS

PINAY, TINANGHAL NA GRAND WINNER SA MRS. GRAND INTERNATIONAL 2026

written by DWIZ 882

Isa na namang Pinay ang mag-uuwi ng karangalan sa bansa matapos na tanghaling GRAND WINNER si Jonnabeth Velante sa katatapos lamang na Mrs. Grand International 2026 sa Myanmar.

Tinalo nga ng Pinay mula sa San Jose, Occidental Mindoro ang mga representative ng iba’t ibang bansa sa nasabing pageant na ginanap kahapon, August 11, 2026.

Bukod sa grand title, hakot award din si Velante nang masungkit nito ang apat na special award kabilang dito ang Best in Talent, Best in National Costume, Best Impression Award at Best in Evening Gown.

Ang Pinay beauty queen ay sinamahan ng kaniyang National Director na si Maan Cueto-Aris.

August 12, 2026 0 comment

Newer Posts

Older Posts