DWIZ 882

Pinagana na ng Police Regional Office 8 o Eastern Visayas PNP ang kanilang Disaster Incident Management Task Force mula sa Rehiyon pababa sa mga Bayan at Lungsod sa kanilang nasasakupan.

Ayon kay Eastern Visayas PNP Regional Director P/BGen. Rommel Cabagnot, trabaho nito na makipag-ugnayan sa lahat ng Regional Operations Division at Local Disaster Risk Reduction and Management Councils para rumesponde sa anumang pangangailangan.

Aabot sa 1,581 na mga pulis ang ipinakalat para sa Search, Rescue and Retrival Operations katuwang ang may 666 na bumubuo ng Reactionary Standby Support Force.

Sa CARAGA Region naman, ipinag-utos na rin ng Regional Director nitong si P/BGen. Romeo Caramat Jr ang paggana ng Disaster Operations Center na bahag ing kanilang Oplan Saklolo.

Nakahanda na rin ang kanilang mga tauhan para sa Search and Rescue gayundin ang pamamahagi ng logistical assets para sa pagkakasa ng pre-emptive evacuation sa mga apektado ng kalamidad.

Mahigpit din aniya nilang binabantayan ang mga tinatawag na flood prone areas habang patuloy ang kanilang paalala sa kanilang nasasakupan na maging mapagmatyag sa gitna ng masungit na panahon. —sa ulat ni Jaymark Dagala (Patrol 9)

Aabot sa 300 milyong pisong puslit na sigarilyo ang sinunog ng Bureau of Customs (BOC) sa Zamboanga City.

Ayon kay BOC District Collector Segundo Sigmundfreud Barte Jr., tinatayang nasa higit walong libong (8,250) master case ang nalikom mula mayo hanggang Nobyembre ngayong taon na sinunog at binasa ng nasabing kawanihan.

Samantala, umaasa si Barte na mababawasan ang puslit na sigarilyo at mga iligal na aktibidad sa mga susunod pang taon. —sa panulat ni Airiam Sancho

Hinikayat ng opisyal ng Apostolic Vicariate of Southern Arabia (AVOSA) ang mga Pilipino sa Middle East na makiisa sa pagdiriwang ng diwa ng Pasko.

Ayon kay AVOSA Vice General Father Troy De Los Santos, dapat pairalin ng bawat isa ang pag-ibig at pagbibigayan lalo sa panahon ngayon ng pandemya.

Samantala, sinisikap ni social media director ng katolikong pinoy sa Abu Dhabi na si Rommel Pangilinan na maihatid sa publiko ang tradisyon ng mga pilipino na simbang gabi sa kabila ng quarantine restrictions. —sa panulat ni Airiam Sancho

Hindi na kailangan pang pahabain ang mandatory 14-day quarantine period.

Ito ang iginiit ni Vaccine Expert Panel Dr. Rontgene Solante, matapos na ma-detect ang unang dalawang kaso ng Omicron variant sa bansa.

Aniya, sapat na ang 14 na araw upang masubaybayan at maobserbahan ang mga sintomas ng nasabing nagpositibo sa virus.

Samantala, sa ilalim ng bagong alituntunin, ang mga biyahero na kumpleto na ng bakuna ay dapat na mayroong negatibong resulta ng RT-PCR na isinagawa sa loob ng 72 oras bago umalis sa pinagmulang bansa. —sa panulat ni Airiam Sancho

Inihahanda na ng Department of Social Welfare and Development (DSWD) ang mahigit 900 milyong pisong standby funds na tulong sa mga apektado ng bagyong Odette.

Kabilang dito ang Rehiyon 5, 6, 7, at 8 na mabibigyan ng Technical Assistance at Resource Augmentation Support.

Sa datos ng DSWD, 88 milyong piso rin ang inilaan sa pagbili ng mga suplay para sa disaster operation kung saan mahigit 300 libong family food packs ang nakahanda para sa agarang pamimigay sa mga pamilyang masasalanta.

Samantala, inaayos na rin ng DSWD ang pakikipag-ugnayan sa mga lokal na pamahalaan na unang reresponde sa nasabing kalamidad. —sa panulat ni Airiam Sancho

Umakyat na sa 3,440 ang kabuuang bilang ng mga pasaherong na-stranded at apektado ng bagyong Odette sa mga pantalan sa bansa.

Base sa datos ng Philippine Coast Guard, 78 vessels at 1,665 na rolling cargoes at 11 motorbanca ang nakatengga dahil sa nasabing panahon.

Samantala, nakahanda na ang deployable response group ng coast guard para sa paglikas at pagtulong sa mga maaapektuhan ng bagyo kung saan nakipag-ugnayan na rin ito sa mga lokal na pamahalaan. —sa panulat ni Airiam Sancho

Umapela si Assistant Majority Leader Fidel Nograles sa gobyerno na madaliin ang pagtuturok ng COVID-19 vaccines at booster shots lalo sa mga lugar na may mataas na “vaccine hesitancy”

Ito’y kasunod ng makapagtala ang bansa ng dalawang kumpirmadong kaso ng Omicron variant na galing sa isang OFW sa Japan at isang dayuhan na mula sa Nigeria.

Aniya, sa ganitong paraan ay masisiguro ang pagkakaroon ng dagdag na proteksyon sa mamamayan kasabay ng pag-abot ng herd immunity sa buong bansa. —sa panulat ni Airiam Sancho

Nagsimula na ang tradisyunal na siyam na araw na simbang gabi kanina sa ikalawang taon ng pandemya.

Kaugnay nito, patuloy ang online na misa at binuksan rin ng mga simbahan ang kanilang pintuan sa limitadong bilang ng mga nagsisimba alinsunod sa health and safety protocols.

Sa Church of the Gesu na pinangunahan ni Fr. Francis Alvarez, ang pagdiriwang ay dinaluhan ng mga indibidwal na sumunod sa physical distancing at nakasuot rin ng facemask.

Mahigit dalawang libo naman ang dumalo sa online mass na naka-live stream sa Jesuit Residence Ateneo De Manila facebook page.

Pinangunahan naman ni Manila Archibishop Cardinal Jose Advincula ang pagdiriwang sa Manila Cathedral na naka-live stream sa Archdiocese of Manila-Official Communications page. —sa panulat ni Airiam Sancho

Tiniyak ni Office Civil Defense (OCD) Administrator Undersecretary Ricardo Jalad na may sapat na pondo ang gobyerno upang tustusan ang mga pangangailangan ng mga maapektuhan ng bagyong Odette.

Aniya, hindi pa nangyari sa kasaysayan na nawalan ng pondo ang pamahalaan sa pagtugon sa mga sakuna.

Kaugnay nito, mayroon aniyang mahigit 300 milyong pisong halaga ng standby resources ang nakahandsa upang matulungan ang mga apektadong residente. —sa panulat ni Airiam Sancho