DWIZ 882

Biglang tumaas ang bilang ng kaso ng COVID-19 sa Iligan City, Lanao Del Norte.

Ito’y ayon kay OCTA Research Fellow Doctor Guido David kung saan nakapagtala ang nasabing lugar ng 22 bagong kaso ng nasabing virus.

Aniya, tumaas sa 2.38 ang reproduction number o bilis ng hawaan ng COVID-19 mula sa dating 0.40.

Iginiit naman ni David na dapat bantayan ng Department of Health (DOH) ang sitwasyon sa nasabing lungsod dahil ito’y nakakabahala lalo’t nakapasaok na ang Omicron variant sa bansa.

Samantala, iminungkahi niya na higpitan muli ang mga protocol para sa domestic travel tulad ng pagre-require muli ng RT-PCR testing. —sa panulat ni Airiam Sancho

Itinuturing na tagumpay ng National Capital Region Police Office (NCRPO) ang pagdaraos ng unang araw ng Misa de Gallo o ang tradisyunal na Simbang Gabi.

Ayon kay NCRPO Spokesperson P/LtC. Jenny Tecson, aabot sa humigit kumulang 60 libo ang kanilang crowd estimate sa mahigit 300 simbahan na kanilang binantayan.

Katuwang din aniya ng may 3 libong pulis na ipinakalat sa mga simbahan ang may 11 libong force multipliers na siyang itinalaga para tumulong na magtiyak ng kapayapaan at kaayusan sa panahon ng simbang gabi.

Mahigpit namang pinayuhan ng NCRPO ang publiko na sundin pa rin ang ipinatutupad na minimum health protocols tulad ng pagsusuot ng facemask at pagpapanatili ng social distancing sa labas ng simbahan.

Pinayuhan din ng NCRPO ang publiko na iwasang iwanan ang mga tahanan ng walang tao o di kaya naman ay patayin ang breaker ng kanilang kuryente at huwag mag-iwan ng mga nakasinding kandila upang maiwasan ang sunog.

Pinaalalahanan din ng Pulisya ang mga magsisidalo sa Misa de Gallo na huwag magdala ng mga mamahaling bagay tulad ng mga alahas at ilabas lamang ang cellphone sa ligtas na lugar maliban kung may mahalagang tawag o mensahe na nais ipadala habang nasa labas. —ulat mula kay Jaymark Dagala (Patrol 9)

Wala nang nakikitang pangangailangan ang Armed Forces of the Philippines (AFP) para muling isulong ang tigil-putukan sa pagitan nila at ng CPP-NPA at NDF ngayong panahon ng kapaskuhan.

Ayon kay AFP Spokesman Col. Ramon Zagala, ang tanging tututukan lang nila sa ngayon ay pangalagaan ang estado mula sa banta ng iba’t ibang bandido na magtatangkang sirain ang pagdiriwang ng pasko sa gitna ng pandemiya.

Aniya, 2017 pa walang ipinatutupad na Holiday Truce ang Pamahalaan laban sa mga rebelde at wala naman aniyang naidudulot itong masamang epekto sa halip ay tumibay pa ang kanilang ginagawang pagbabantay.

Gayunman, nilinaw ni Zagala na kung may ipag-uutos ang mga nakatataas sa kanila lalo na kung manggagaling ito sa kanilang Commander-in-Chief na si Pang. Rodrigo Duterte ay kanila itong susundin.

Nanindigan din ang AFP na tanging ang National Task Force to End Local Communist Armed Conflict o NTF-ELCAC ang susi upang ganap na makamit ng bansa ang inaasam na katahimikan at pag-unlad sa mga kanayunan. —ulat mula kay Jaymark Dagala (Patrol 9)

Mahigpit na nakikipag-ugnayan ang Philippine National Police o PNP sa mga Lokal na Pamahalaang tatamaan ng hagupit ng bagyong Odette.

Ito’y ayon kay PNP Chief P/Gen. Dionardo Carlos ay bilang paghahanda sa worst case scenario dahil sa matinding pinsalang dulot ng bagyo Ayon kay Carlos, naka-alerto na ang PNP sa pagkakasa ng rescue operations lalo’t inaasahang matindi at malawak ang sakop ng mga maaapektuhan ng nagbabadyang sakuna.

Naka-antabay na rin aniya ang kanilang standby force para sa anumang pangangailangan lalo na ang evacuation efforts at rescue sa mga nasa hazard prone areas.

Dagdag pa ng PNP Chief, mainam na magkaisa upang hindi maging malala ang aasahang epekto ng bagyong Odette partikular na sa silangang bahagi ng bansa. —ulat mula kay Jaymark Dagala (Patrol 9)

Tiniyak ng National Disaster Risk Reduction and Management Council o NDRRMC na may sapat na pondo ang Pamahalaan para tustusan ang mga gastusin para sa paparating na Bagyong Odette.

Ito’y ayon kay NDRRMC Executive Director at Office of the Civil Defense Administrator USec. Ricardo Jalad sa gitna na rin ng pangamba na paubos na ang pondo ng mga ahensya ng Pamahalaan lalo’t papatapos na ang taon.

Ani Jalad, maliban sa savings ay may maaari pang pagkunan ng pondo sakaling maubos na ang nakalaan para sa taong ito.

Malabo aniyang maubusan ng pondo ang Pamahalaan para sa Disaster response lalo’t may nakalaan na agad na pondo para sa susunod na taon.

Sa ngayon aniya, may naka-standby silang nasa 331 milyong pisong halaga ng pondo at resources na naka-antabay na para sa mga maapektuhan ng kalamidad bukod pa ang mga standby fund na hawak naman ng iba’t ibang lokal na Pamahalaan. —ulat mula kay Jaymark Dagala (Patrol 9)

Patuloy sa pangangalap ng mga datos at ulat ang National Disaster Risk Reduction and Management Council (NDRRMC) hinggil sa epektong dulot ng bagyong Odette sa bansa.

Batay sa pinakahuling ulat ng NDRRMC, pumalo sa mahigit 12 libo (12,237) pamilya o katumbas ng 45,383 indibiduwal ang inilikas sa mga rehiyon ng Eastern Visayas gayundin sa CARAGA.

Mula sa kabuuang bilang ayon sa NDRRMC, nasa mahigit 17 libong inidbiduwal ang inilikas sa Eastern Visayas habang nasaa 22,218 naman dito ang mula sa CARAGA region.

Partikular rito ang mga residente ng Samar, Eastern Samar, Leyte, Southern Leyte, Biliran, Dinagat Islands, Surigao del Norte, Surigao del Sur, Agusan del Norte at Agusan del Sur Una nang tiniyak ng NDRRMC na nakahanda na ang mga tulong o ayudang kanilang ipamamahagi para sa lahat ng mga maapektuhan ng kalamidad dulot ng bagyo.  —ulat mula kay Jaymark Dagala (Patrol 9)

Nadagdagan pa ang mga bansa at teritoryo na inilagay ng pamahalaan sa COVID-19 red list.

Sinabi ni Acting Presidential Spokesperson Karlo Nograles nabatay sa pinakahuling resolusyon ng IATF, walo pang mga bansa ang napabilang sa red list epektibo simula ngayong araw, December 16 hanggang 31.

Kasama dito ang Andorra, Switzerland, Monaco, Northern Mariana Island, South Africa, France, Reunion at San Marino.

Aniya, ang mga kabilang sa red list ay hindi pahihintulutang pumasok ng bansa maliban na lamang kung sila ay mga overseas filipino workers (OFWs) na nasa repatriation flights. —sa panulat ni Mara Valle