DWIZ 882

Aabot sa mahigit P500-M ang halaga ng shabu na nasamsam sa daawang suspek na naaresto ng mga otoridad matapos ikasa ang drug buy-bust operation sa Mandaluyong City.

Sa tulong ng pinagsanib pwersa ng mga tauhan ng Philippine Drug Enforcement Agency (PDEA), Philippine National Police (PNP), Drug Enforcement Group (DEG) at Armed Forces of the Philippines (AFP) ay nalambat ang dalawang big time pusher na kinilalang sina Mike Abac, 32-anyos, at Edison De Guzman, 37-anyos.

Ayon sa mga otoridad, aabot sa 77.5 kilo ng shabu ang nakuha sa mga suspek na nagkakahalaga ng 534, 750 kasama ng iba’t-ibang klase ng drug paraphernalia, cellphone at buy-bust money.

Nakakulong na ngayon ang mga suspek at nahaharap sa kasong paglabag sa RA 9165 o ang Comprehensive Dangerous Drugs Act of 2002.  —sa panulat ni Angelica Doctolero

Habang papalapit ang bagong taon, naging mas mabenta pa ngayon ang mga bilog na prutas sa ilang pamilihan kabilang na ang Quiapo, Marikina, Pasig, Divisoria at Balintawak Market.

Patok sa mga mamimili ang ibat-ibang klase ng prutas kabilang na ang ubas, orange, apple, kiat-kiat, pakwan at iba pa.

Sa kabila nito, umaaray naman ang mga mamimili dahil sa patuloy na tumataas na presyo ng mga bilihin sa mga prutas sa mga pamilihan.

Tradisyon o nakaugalian na kasi ng mga pinoy ang paghahain ng labing dalawang bilog na prutas na sinasabing pampa-swerte umano sa pagpasok ng bagong taon.  —sa panulat ni Angelica Doctolero

Naka-quarantine ngayon si Vice President Leni Robredo matapos ma-expose sa kaniyang close-in security na nagpositibo sa COVID-19.

Sa live video ni VP Leni sa kaniyang facebook account, sinabi niyang agad siyang sumailalim sa 7-days quarantine matapos makatanggap ng tawag upang ipaalam ang naturang balita.

Sinabi din ni Robredo na nagpositibo rin sa COVID-19 ang kaniyang anak na si Tricia pero ito ay asymptomatic at ngayon ay tatlong araw nang negatibo.

Humiling naman ng panalangin si Robredo sa publiko na ipagdasal na hindi sila nahawa ng COVID-19.

Sa kabila nito, siniguro naman ng Bise Presidente na tuloy-tuloy ang mga Staff ng Office of the Vice President sa pagsasagawa ng relief operation para sa mga nasalanta ng bagyong Odette.  —sa panulat ni Angelica Doctolero

Inihayag ng World Health Organization na lubhang mapanganib o “very high” ang epektong dala ng Omicron variant.

Ito ay matapos tumaas sa 11% ang mga naitatalang kaso ng COVID-19 sa buong mundo dahil sa panibagong variant na Omicron.

Ayon sa WHO, mas malakas ang epekto ng Omicron variant kung ikukumpara sa Delta variant na may doble o tripleng pagtaas ng kaso.

Ito din ang nangungunang variant ngayon sa buong mundo partikular na sa Britanya at Amerika.

Gayunpaman, kailangan pa ng karagdagang datos para malaman kung gaano kalubha ang naturang virus pagdating sa paggamit ng mga oxygen at mechanical ventilation.

Bukod pa diyan, kailangan din ng karagdagang datos kung paano nito maaapektuhan ang severity ng nakaraang impeksyon sa COVID-19 maging ng bakunang natanggap ng isang indibidwal laban sa virus.  —sa panulat ni Angelica Doctolero

Isang “arts and tatoos for a cause” ang inilunsad ng mga nagsama-samang Humanitarian Artists at Tatooists sa Quezon City para sa mga nasalanta ng bagyong Odette sa Visayas at Mindanao.

Ayon sa naturang grupo, nakikiisa sila sa malawakang relief operations kung saan, ang malilikom na pera ay kanilang ipamamahagi sa mga pamilyang lubhang sinalanta ng bagyong Odette.

Nais ng grupo na matugunan ang pangangailangan sa tubig, pagkain at alternatibong kuryente kagaya ng power bank sa mga apektadong lugar.

Tatagal naman ang nasabing inisyatiba hanggang sa Biyernes, December 31, 2021.  —sa panulat ni Angelica Doctolero

Isang residential area ang nasunog sa Sitio Pingkian 2, Barangay Pasong Tamo, Quezon City kung saan, 45 pamilya ang nawalan ng tirahan.

Ayon sa Bureau of Fire Protection-Public Information Office (BFP-PIO), umakyat sa ikalawang alarma ang sunog bago idineklarang fire under control.

Aabot sa P30K ang inisyal na pinsala sa nasunog na ari-arian kung saan, malungkot ang pagsalubong ng bagong taon ng mga residenteng nawalan ng tirahan.

Wala namang naitalang sugatan o nasawi sa naturang insidente pero patuloy pang iniimbestigahan ng mga otoridad ang dahilan ng sunog.  —sa panulat ni Angelica Doctolero

Nahanap na ng Department of Health ang 22 close contacts ng ika-apat na nagpositibo sa Omicron COVID-19 variant of concern sa Pilipinas.

Nakilala ang mga close contacts matapos sumakay ng Philippine Airlines (PAL) flight PR 127 kasama ang asawa ng pasyente, na nagpositibo rin sa COVID-19.

Ayon sa DOH, kasalukuyang bineberipika ang resulta ng lahat ng close contacts, at nakikipag-ugnayan narin sila sa Regional Epidemiology and Surveillance Units para i-verify ang estado o kalagayan ng kalusugan ng mga close contacts.

Matatandaang nagpositibo ang ika-4 na biyahero na galing sa Estados Unidos na dumating sa Ninoy Aquino International Airport noong Disyembre a-10 na agad isinailalim sa test matapos makaranas ng pangangati ng lalamunan at sipon.

Matapos ang 10 araw sa Isolation Facility ay nadischarge din ito makaraang maging Asymptomatic noong December 24 at ngayon ay nananatiling naka-home isolation.

Nakatakda namang isailalim sa genome sequencing ang asawa ng pasyenteng nagpositibo upang matukoy kung mayroon din itong Omicron variant.  —sa panulat ni Angelica Doctolero