DWIZ 882

Muling bumalik at nagpaabot ng tulong sa mga nasalanta ng Bagyong Odette si Partido Federal ng Pilipinas standard bearer Ferdinand ‘Bongbong’ Marcos Jr., at ka-tandem na si vice presidential aspirant Sara Duterte.

Unang nagtungo ang dating senador sa Southern Leyte kung saan ay sinalubong siya ni Southern Leyte Gov. Damian Mercado at iba pang opisyal ng lalawigan.

Aabot sa P1 milyong ang ibinigay ng BBM-Sara UniTeam kay Gov. Mercado at P500,000 kay San Ricardo Mayor Roy Salinas.

Maliban sa tulong pinansiyal, namahagi rin ng 77 sets ng solar panels at LED flashlights ang BBM-Sara UniTeam para sa mga residente na wala pa ring ilaw at kuryente.

Nagpasalamat naman si Gov. Mercado sa mga natanggap na tulong at pinuri ang pagiging totoo ni Marcos sa kanyang pangako na babalik sa Southern Leyte.

Nagtungo rin sa isla ng Siargao sina Marcos at Mayor Sara upang magbigay ng P1-milyong tulong pinansiyal kay Surigao del Norte 2nd District Congressman Ace Barbers at P500,000 naman kay General Luna Mayor Cecilia Rusillon.

Naghatid din ng iba pang tulong ANG BBM-Sara UniTeam gaya ng mga bigas, relief goods, solar panels, 10 sets ng water bucket filter at water purifier system na kayang gumawa ng 180 gallons per hour na malinis na tubig.

Mababatid na problema pa rin sa Siargao ang maiinom na malinis na tubig.

Dumayo rin ang dating senador at alkalde sa Dumaguete para alamin ang sitwasyon ng probinsya.

Sinalubong sila ni Governor Roel Degamo at kanyang mga opisyal kung saan nagbigay din ng situational disaster report ang PDRRMC sa pinsala ng bagyong Odette sa Negros Oriental.

Namahagi rin ang BBM-Sara UniTeam ng P1-milyong tulong pinansyal ang kay Gov. Degamo at P500,000 kay Bayawan City Mayor Pryde Henry Teves na gagamitin para sa rehabilitasyon at iba pang pa­ngangailangan.

Samantala, plano ni Marcos na magdala pa ng mga construction materials sa susunod niyang pagbisita matapos mabatid na bukod sa mga nasirang tahanan at paaralan, ay napinsala rin ang evacuation centers.

Umaasa ang dating senador na sa kabila ng nararanasan na hirap dulot ng bagyong Odette ay magiging positibo at babangon muli ang bawat isa para salubungin ng may ngiti at pag-asa ang taong 2022.

Nadiskubre ng mga otoridad ang tangkang pananabotahe sa relief operation ng pamahalaan ng mga New People’s Army (NPA) sa relief operations sa Leyte.

Ayon kay Captain Ryan Layug, Spokesman Ng Army’s 8th Infantry Division na nasilat ng kanilang grupo ang plano ng mga ito matapos silang magkasagupa.

Base naman sa isang nag tip, plano ng mga rebelde na mag­lagay ng mga road block para kulimbatin ang mga family food packs na ipamamahagi sa mga residente na naapektuhan ng bagyong Odette.

Patuloy namang nakataas ang alerto ng mga otoridad sa mga naturang lugar sa pagsalakay ng mga NPA. —sa panulat ni Mara Valle

Nasabat ang tinatayang nagkakahalagang 528,000 pesos na shabu sa magkahiwalay na anti-drug operation na isinagawa sa Makati at Taguig.

Nakuha sa suspek na kinilalang si Kathleen Pascua ang dalawang plastic sachet na naglalaman ng nasa 11.67 gramo ng hinihinalang shabu na may halagang P79,356.00, sa Makati.

Nakumpiska naman ang anim na plastic sachet na may lamang 66 gramo ng hinihinalang shabu na nagkakahalaga ng P448,800 sa mga suspek na sina John Michael Ballado, Danilo Montay, Delvis Dequillo at Allan Gamboa sa Taguig City.

Nasabat din ng mga otoridad ang, dalawang kalibre .45 baril, pitong bala, at ang 500 pesos marked money na ginamit sa buy bust.

Kasalukuyan naman naka-detain ang mga suspek na nahaharap sa kasong paglabag sa RA 9165 o Comprehensive Dangerous Drugs Act of 2002. —sa panulat ni Mara Valle

Nararamdaman na ng grupo ng mga doktor ang muling paglobo ng bilang ng kaso ng Covid-19 sa bansa.

Sa kabila ng banta ng Covid-19 Omicron variant patuloy ang pag luwag ng mga restriksiyong ngayong holiday season.

Ayon sa isang grupo ng doktor, marami ang nagpopositibo sa test sa mga emergency room, kung kaya’t kailangan na raw nilang paghandaan ang pinangangambahang surge ngayong papasok na bagong taon.

Inanunsiyo naman ng Department of Health(DOH) kamakailan na nadagdagan nang 889 ang mga kumpirmadong kaso ng Covid-19, halos doble ng sa higit 400 na naitala noong martes. —sa panulat ni Mara Valle

Nasawi ang isang street sweeper sa Caloocan matapos tadtarin ng saksak ng sarili nitong pamangkin.

Natagpuan ang biktima na kinilalang si Art John Mijares sa Talakitok Street, Barangay 22 na duguan at wala nang buhay.

Batay sa impormasyon, nagtalo ang suspek at ang biktima sa hindi pa nalalamang rason, bandang alas-11 ng gabi at kalaunan ay nauwi na nga sa di inaasahang saksakan.

Samantala, itinuro naman ng karelasyon ni Mijares na ang pamangkin ng biktima ang nasa likod ng krimen.

Patuloy naman ang follow-up operations ng mga otoridad para matunton ang suspek. —sa panulat ni Mara Valle

Patay ang isang motorcycle rider matapos itong maipit ng 12-wheel fuel truck sa kahabaan ng Edsa-Ortigas Flyover.

Kinilala ang biktima na si Christopher Chua, at ang driver ng trak driver na si Edward Lapitan.

Ayon kay Lapitan, habang sinusuyod nila ang trapiko sa nasabing lugar ay pumailalim sa kanyang minamanehong trak ang biktima sakay ng motor nito, matapos iwasan na bumangga sa kasalubong na van.

Agad namang dinala ng Metropolitan Manila Development Authority (MMDA) ang labi ni Chua sa isang punerarya.

Samantala, iniimbestigahan pa ng mga otoridad kung may kakaharaping kaso ang driver ng trak dahil sa insidente.  —sa panulat ni Mara Valle

Nagpatupad ng firecracker ban ang Las Piñas City Government bilang paghahanda sa selebrasyon at pagsalubong ng bagong taon.

Ayon kay Las Piñas City Mayor Imelda ‘Mel’ Aguilar, ipinagbabawal ang paggawa, pag-display, pagbebenta, distribusyon, posesyon o paggamit ng anumang uri ng paputok maging ang pyrotechnic devices at iba pang kahalintuald nito.

Sa ilalim ng naturang ordinansa, paiigtingin ng City Health Office ang kampanya upang ipaalam sa publiko ang mga impormasyon tungkol sa idudulot na panganib ng mga paputok.

Samantala, inatasan narin ng alkalde ang mga opisyal ng barangay na magsagawa ng regular na pagpapatrulya sa ilang bahagi ng lungsod upang mapanatili ang pagsunod ng mga residente sa ipinatutupad na ordinansa.  —sa panulat ni Angelica Doctolero