Nababahala ang pamunuan ng St. Luke’s Medical Center sa posibleng pagtaas ng kaso ng COVID-19 sa bansa.
Ayon kay Medical Director Doctor Benjamin Campomanes, tumaas sa 42% ang kanilang emergency room COVID-19 test positivity rate sa Quezon City.
Samantala, nagpaalala si Campomanes na hindi pa ito ang tamang panahon para sa mga party at malalaking pagtitipon. —sa panulat ni Airiam Sancho
Nasawi ang isang driver sa pamamaril nang hindi pa nakikilalang riding in tandem sa lalawigan ng Maguindanao.
Kinilala ang biktima na si Kaloy Umpal, 50 anyos.
Batay sa imbestigasyon, dinikitan ng nasabing suspek ang minamanehong sasakyan ni umpal sa barangay Awang Datu Odin Sinsuat at binaril ang biktima.
Patuloy naman ang imbestigasyon ng otoridad sa naturang insidente.—sa panulat ni Airiam Sancho
Inihayag ni presidential adviser for Entrepreneurship Joey Concepcion na pinag-aaralan na ng pribadong sektor ang pagbibigay ng booster shot kada tatlong buwan o apat na beses sa loob ng isang taon.
Aniya, ang pagtuturok ng booster dose kada kwarter ay isang mabisang panlaban sa COVID-19 Omicron variant.
Dagdag pa niya na target nilang maturukan ang mas maraming manggagawa ng booster shot sa ikalawang kwarter ng 2022.
Samantala, nakikipag-ugnayan na si Concepcion sa mga opisyal ng aztrazeneca para sa posibleng pagbili ng naturang booster shot sa pebrero 2022.
Arestado ang apat na indibidwal matapos ang ikinasang buy-bust operation ng otoridad sa bayan ng Cardona, Rizal.
Kinilala ang mga suspek na sina alyas Angie, Jon, Devina at Jay-R.
Batay sa imbestigasyon, nakumpiska mula sa mga suspek ang siyam na pekete ng hinihinalang shabu na may bigat na 55 gramo na tinatayang nagkakahalaga ng halos apat na raang libong piso (P374K).
Nahaharap naman ang mga nasabing indibidwal sa kasong paglabag sa Comprehensive Dangerous Drugs Act of 2002. —sa panulat ni Airiam Sancho
Hinikayat ni presidential aspirant Ferdinand ‘Bongbong’ Marcos, Jr., ang mga pilipinong gawing halimbawa ang katapangan at pagiging makabayan ng pambansang bayani na si Dr. Jose Rizal.
Nanawagan din si Marcos sa bawat Pilipino na palagiang isipin at isapuso ang kabayanihang ipinamalas ni Rizal para na rin sa ikauunlad ng Pilipinas.
Kasabay nito, tiwala ang dating senador na muling makakabangon ang bansa mula sa COVID-19 pandemic at mga kalamidad, basta’t patuloy na magkakaisa ang mga Pilipino.
Hinimok pa ni Marcos ang publiko na isantabi ang mga pulitikal na paniniwala, at isulong ang ‘mapagkaisang pamumuno’.
Niyanig ng napakalakas na lindol ang Maluku Province, Indonesia.
Dakong 12:20 nang madaling araw, oras sa Pilipinas, nang tumama ang Magnitude 7.3.
Natunton ng Indonesian Seismological Centre ang sentro ng pagyanig 120 kilometers, hilagang-silangan ng bayan ng Lospalos.
Naramdaman din ang lindol sa ilang panig ng indonesia hanggang sa Northern Territory, Australia.
Wala namang napaulat na tsunami warnings o nasaktan o nasawi at napinsala sa malakas na pagyanig. —sa panulat ni Drew Nacino
Inaresto ng mga otoridad sa Cavite ang isang babae matapos nitong magbenta ng mga sobreng mukhang P1K bills.
Isinagawa ng mga operatiba ng National Bureau of Investigation (NBI) at Bangko Sentral Ng Pilipinas (BSP) ang operasyon sa General Mariano Alvarez, Cavite.
Nakuha sa suspek ang binili ng undercover agent na 150 piraso ng sobre, na mapagkakamalang nakatuping mga P1K na papel.
Ayon Kay Bank Officer II Armida Artango ng BSP, ipinagbabawal sa ilalim ng BSP circular, ang paggaya sa philippine currency notes, maliban kung may paalam sa BSP.
Ang paglabag sa naturang kautusan ay mahaharap sa pagkakakulong ng lima hanggang 10 taon.
Mariin namang itinatanggi ng suspek na siya ang gumagawa ng mga nasabing sobre, gayun pa man nasa kustodiya parin ng mga otoridad ang suspek habang patuloy nilang inaalam kung saan nanggagaling ang mga ito. —sa panulat ni Mara Valle
Nakatakas ang isang preso na may kasong murder mula sa isang sub-provincial jail sa Samar.
Kinilala ang nakatakas na preso na si Julito Dacles.
Ayon sa Police Regional Office 8, lumapit umano si dacles sa mga bantay na pulis dahil nahihirapan umano itong huminga, nang dinala ang preso sa lobby at iwanan saglit ng mga pulis ay bigla na itong nawala.
Inanunsiyo naman ang mga otoridad na marapat na kaagad ipagbigay alam sa kanila kung may makatukoy kung nasaan ang bilanggo upang agad nilang maaksiyunan, nagbabala rin ang mga ito na armado si Dacles. —sa panulat ni Mara Valle
Nadakip sa buy-bust operation ang dalawang big-time drug pushers sa harap ng isang private school sa Valenzuela City.
Kinilala ang mga suspek na sina, Gerhel Jumawan at Jeorge Javier, kapwa mga nakatira sa Caloocan City.
Nasabat sa mga ito ang may kabuuang 186 gramo ng iligal na droga na may market value na 1,258,000 pesos.
Kasalukuyang nahaharap ang mga tulak sa patong-patong na kaso at wala namang piyansa na inirekomenda ang piskalya. —sa panulat ni Mara Valle
Dead-on-the-spot ang isang senior citizen at isang babae nang araruhin ng pampasaherong bus sa Quezon.
Kinilala ang mga biktimang sina Jacobo Magdamit, 65-anyos, at ang babaeng natukoy lang sa alyas na ‘tess perida’ nasa edad-40.
Sa inisyal na ulat ng quezon police, patawid ng kalsada ang dalawa nang masagasaan ng dongfeng bragais bus na byaheng-maynila.
Sa bilis at lakas ng impact ay mabilis na binawian ng buhay ang dalawa.
Agad namang sumuko sa mga otoridad ang driver ng bus na si Michael Baraero, na nahaharap ngayon sa kasong reckless imprudence resulting in double homicide. —sa panulat ni Mara Valle