DWIZ 882

Nangangalap na ng kumpletong impormasyon ang PNP tungkol sa napaulat na “absentee quarantine” modus ng mga quarantine hotel.

Ito ang inihayag ni PNP Spokesperson PCol. Roderick Augustus Alba matapos na ipaalam ni Tourism Secretary Bernadette Puyat sa PNP at DILG ang ilegal na aktibidad.

Ayon sa kalihim, may mga hotel na nag-aalok ng “absentee quarantine” packages kung saan hindi naglalagi sa hotel ang mga dapat naka-quarantine ng 5-araw na balikbayan, at magtutungo nalang doon sa ika-limang araw para sa COVID test.

Nabisto ang modus nang matuklasan na nagtungo sa isang bar ang isang balikbayan na dapat ay naka-quarantine sa isang hotel sa Makati, na kinalaunan ay nag-positibo sa COVID.  —ulat mula kay Jaymark Dagala (Patrol 9)

Ikinabahala ng OCTA Research group ang muling pagtaas ng positivity rate sa Pilipinas.

Ayon sa OCTA, maaari pa aniya makapagtala ng nasa dalawanlibong bagong kaso ng COVID araw araw pagkatapos ng  bagong taon.

Ipinabatid naman ni Molecular Biologist Fr. Nicanor  Austriaco ng OCTA, ang naturang pagtaas ay dahil umano sa holiday-related mobility at partial public compliance sa minimum health protocols.

Aniya, kung wala aniyang Omicron transmission, posibleng bumaba ang kaso sa unang quarter ng 2022.

Umakyat sa ‘moderate risk category’ mula sa ‘low risk’ ang National Capital Region (NCR).

Ayon kay OCTA Research Fellow Doctor Guido David, bumilis ang hawahan ng COVID-19 sa 1.47 reproduction number mula sa 0.51.

Samantala, pinalalahanan ni David ang publiko na huwag magpakampante lalo’t abala ang lahat sa pagsalubong ng bagong taon. —sa panulat ni Airiam Sancho

Umakyat na sa lima ang lugar na nasa ilalim ng granular lockdown.

Batay sa Philippine National Police (PNP), partikular ito sa lugar ng tondo 1 na may 29 na aktibong kaso, San Andres na may 12 kaso, Pandacan at Sampaloc na may tag-pitong aktibong kaso.

Maliban sa NCR, ang Cordillera Administrative Region ang tanging lugar na naka-granular lockdown sa buong bansa.  —sa panulat ni Airiam Sancho

Nilagdaan na ni Pangulong Rodrigo Duterte ang mahigit limang trilyong pisong 2022 national budget. (P5.024 trilyon)

Kabilang dito ang 50 bilyong pisong inilaan para sa Covid-19 vaccines habang halos 23 bilyong piso (p22.99) ang para sa pagpapaigting ng health facilities.

Sinabi rin ng pangulo na ang paglagda sa 2022 General Appropriations Act ay patunay na responsibilidad ng gobyerno na mabigyan ng magandang buhay ang mga Pilipino sa ilalim ng iba’t ibang programa na makatutulong sa recovery and rehabilitation.

Samantala, ang nasabing budget ang pinakamalaking pondo sa kasaysayan sa ilalim ng administrasyong Duterte.—sa ulat ni Jopel Pelenio (Patrol 17) at panulat ni Airiam Sancho

Dismayado ang ilang pasaherong dumagsa sa Manila Northport Passenger Terminal dahil kanselado ang kanilang biyahe pauwi ng probinsya.

Nabatid na mamaya sana ang biyahe ng mga ito patungong Bacolod City ngunit nailipat bukas, December 31.

Maliban dito, nagreklamo rin ang ilan pang biyahero partikular ang mga patungong Cebu dahil sa wala umano silang natanggap na abiso hinggil sa kanselasyon ng kanilang biyahe na inilipat ng pamunuan sa January 2, 2022.  —sa panulat ni Airiam Sancho

Umabot na sa mahigit apat na libong doses (4, 120) ng mga bakuna ang hindi na magagamit dulot ng pinsala ng bagyong Odette.

Ito ang sinabi ni Vaccine Czar Secretary Carlito Galvez kung saan ang bansa ay dumanas aniya ng “relatively low” COVID-19 vaccine wastage.

Aniya, maaari pang tumaas ang nasabing bilang dahil naghihintay pa sila ng mga ulat ng mga bakunang nakompromiso sa Surigao at iba pang mga lugar sa CARAGA.

Samantala, ipinagpatuloy ng ilang lugar na tinamaan ng nasabing bagyo ang pagbabakuna dahil sa takot na ito’y masira.—sa panulat ni Airiam Sancho