Dinagsa ng mga mamimili ang ilang pamilihan sa Metro Manila bago ang pagsalubong sa taong 2022.
Karamihan sa mga binibili ng mga residente ay ang mga bilog na prutas at iba pang panghanda sa bisperas ng bagong taon.
Sa kabila nito, tiniyak ng Metro Manila lgus na nasusunod ang social distancing at tamang pagsusuot ng facemask.
Bukod pa dito, patuloy din ang pagpapatupad ng temperature check at contact tracing bago pumasok sa loob ng mga pamilihan. —sa panulat ni Angelica Doctolero
Patuloy ang pagbabayanihan ng mga Yolanda, Pablo at Sendong victims upang matulungan ang mga pamilyang nasalanta ng bagyong Odette.
Bumuhos ang tulong sa mga sinalanta kung saan, namahagi ng mga pagkain, inumin at damit ang ilang mga grupo na dating nasalanta din ng mga nagdaang bagyo.
Ang iba sakanila ay galing pa ng Cagayan de Oro na talagang bumiyahe papuntang visayas at mindanao para mag-abot ng tulong sa mga nasalanta.
Kabilang pa sa kanilang ipinamahagi ang nasa limang truck ng food grocery items, gasolina, solar energy panels, mga led lights, sako-sakong semento, mga tarpaulins at iba pang construction materials.
Ayon sa mga tumulong, ramdam nila ang hirap at gutom ng mga naapektuhan ng bagyo dahil naranasan din nila ang mawalan ng kuryente, tirahan, malinis na inumin at pagkain matapos hagupitin ng nagdaang bagyo. —sa panulat ni Angelica Doctolero
Nagpositibo din sa COVID-19 ang 15 pang indibidwal matapos makasalamuha ng babaeng nagpositibo sa COVID-19 na galing ibang bansa pero hindi sumunod sa mandatory quarantine sa Berjaya Makati Hotel.
Ayon kay Tourism Secretary Bernadette Romulo-Puyat, umamin na ang naturang indibidwal na siya ay lumabag sa quarantine protocols ng hotel matapos magsumbong ang maraming indibidwal kaugnay sa pag-gagala nito sa lugar.
Ayon sa ilang nagreport, lumabas ang naturang indibidwal para makipagkita sa mga kaibigan nito sa isang party at kalauna’y nagpositibo sa COVID-19.
Nagsasagawa na ngayon ng imbestigasyon ang mga ahensiya ng gobyerno kaugnay sa ulat na pinayagang lumabas ang isang indibidwal sa tinutuluyan nitong hotel kahit hindi pa tapos ang quarantine period.
Hinihingan narin ng paliwanag ang hotel maging ang violator na ngayon ay naka-quarantine na. —sa panulat ni Angelica Doctolero
Sa Parañaque Integrated Terminal Exchange (PITX) na nagpalipas ng gabi ang mga pasahero upang makakuha ng ticket pauwi sa kani-kanilang probinsya upang doon magsalubong ng bagong taon.
Maraming mga pasahero ang naghintay ng matagal bago makabiyahe pauwi sa kanilang pamilya.
Ayon sa ilang mga pasahero, tiniis nila ang walang tulog at pahinga para lang mag-abang ng bus na kanilang masasakyan pauwi.
Karamihan sa mga uuwi ay mga biyaheng Bicol at Batangas kung saan, hiling ng mga pasahero na magkaroon ng online booking upang hindi matagalan o humaba ang pila ng mga biyaherong uuwi ng probinsya.
Sa ngayon, patuloy pa ang pagdagsa ng mga pasahero sa nabanggit na terminal. —sa panulat ni Angelica Doctolero
Nagpaalala sa mga Overseas Filipino Workers (OFWs) ang Philippine Overseas Employment Administration (POEA) kaugnay sa kanilang employment contracts.
Kasunod ito ng report ng Philippine Overseas Labor Office (POLO) sa Milan, Italy tungkol sa ginawang pagtakas ng maraming pilipino sa kanilang mga employers sa Romania.
Ayon kay POEA Administrator Bernard Olalia, marami ngayon sa mga pinoy workers ang iniiwan ang kanilang mga employer at lumilipat ng ibang trabaho ng walang pasabi sa kanilang naunang employer.
Sinabi ni Olalia na mahalagang sumunod ang mga OFW sa labor laws ng pinagtatrabahuhang bansa at tuparin ang kanilang obligasyon, terms, at mga kondisyon na nakasaad sa kanilang employment contracts.
Sa ilalim ng Romanian Laws, ang pagtatapos sa trabaho ng mga empleyado ay hindi kailangang magkaroon ng wastong dahilan kundi dapat ay mayroong formal resignation. —sa panulat ni Angelica Doctolero
Sinabi ni Vaccine Expert Panel Dr. Rontgene Solante na hindi na umano kailangan ng publiko ang ika-4 na dose ng COVID-19 vaccine matapos maturukan ng boosters.
Ayon kay Solante, matagal na panahon pa ang ilalaan upang mapatunayang nakakatulong ang ika-apat na bakuna laban sa nakahahawang sakit.
Sinabi ni Solante na dapat ay ilaan na lamang ang ika-4 na bakuna sa mga severely immunocompromised population kung saan, ang naturang bakuna ay maaaring hindi kasinghusay kumpara sa general population.
Dagdag pa ni Solante na ang pagbabakuna ay nagpapatunay lamang na kaya nitong maprotektahan ang katawan ng isang tao laban sa matinding impeksiyon na dala ng COVID-19. —sa panulat ni Angelica Doctolero
Inihayag ni Bohol Governor Arthur Yap na makatatanggap ng aabot sa P90M financial assistance ang probinsya ng Bohol mula sa ipinangakong P28M ni Pangulong Rodrigo Duterte.
Ayon kay Yap, bukod kay Pangulong Duterte ay tatanggap din ang probinsya ng P55M mula sa National Housing Authority kung saan, makikinabang ang halos 11K indibidwal.
Samantala, tatanggap pa ang kanilang probinsya ng P10M mula naman sa Assistance to Individuals in Crisis Situation ng Department of Social Welfare and Development.
Sa ngayon, hinihinatay nalang ng naturang probinsya ang tulong na ibibigay ng pamahalaan at ng ibat-ibang ahensya. —sa panulat ni Angelica Doctolero
Hindi muna papayagan ng pamahalaan na makapasok ng Pilipinas ang anim na bansa matapos ilagay sa red list ang Eswatini, Lesotho, Malawi, Mozambique, Namibia, at Spain sa January 1 hanggang January 15, 2022.
Ayon sa Malacañang, tanging papayagan lamang na makapasok ng bansa ang Overseas Filipino Workers Repatriation Flights na inorganisa ng pamahalaan ng Pilipinas at iba pang private partners.
Samantala, narito naman ang mga bansang isinailalim sa green list kabilang na ang:
Bangladesh
Benin
Bhutan
British virgin islands
China
Cote d’ ivoire (Ivory Coast)
Djibouti
Equatorial Guinea
Falkland islands (malvinas)
Fiji
The Gambia
Guinea
Hong Kong
Indonesia
Kuwait
Kyrgyzstan
Liberia
Montserrat
Oman
Pakistan
Paraguay
Rwanda
Saba (Special Municipality Of The Kingdom Of The Netherlands)
Saint Barthelemy
Sao Tome and Principe
Senegal
Sierra Leone
Sint Eustatius
Taiwan
Timor-Leste (East Timor)
Togo
Uganda, at
United Arab Emirates
Ang mga bansa namang hindi kasama sa mga nabanggit na pangalan ay inilagay naman sa yellow list.
Dahil dito, nagpaalala ang Bureau of Quarantine, Department of Transportation-One Stop Shop at ang Bureau of Immigration na kikilalanin lamang ang proofs of vaccination na aprubado ng IATF. —sa panulat ni Angelica Doctolero
Patay ang limang armadong suspek habang sugatan naman ang apat na pulis sa naganap na engkwentro sa Pikit, Cotabato.
Ayon kay SOCCSKSARGEN Police Director Brig. Gen. Alexander Tagum, maghahain sana sila ng warrant of arrest nang manlaban ang mga suspek dahilan para gumanti ang mga otoridad.
Nakatakas ang isa sa mga suspek na kinilalang si Joel Manampan na itinuturing na “most wanted” sa bansa dahil sa kasong murder at may patong na nagkakahalagang P175, 000.
Samantala, nakuhanan naman ng isang rifle at mga bala si Mohidin Dalagonan Mantok na ngayon ay hawak na ng mga otoridad.
Sa ngayon, iniimbestigahan na ng Regional Police ang mga nasamsam na motorsiklo. —sa panulat ni Angelica Doctolero
Patay ang walong indibidwal kabilang na ang isang sanggol matapos pagbabarilin ng mga armadong kalalakihan ang dalawang bahay sa North-Central Mexico.
Base sa nakuhang impormasyon ng mga otoridad, pinagbabaril ang mga biktima dahil target ng mga suspek ang naturang bahay na planong gamitin ng mga adik sa iligal na droga.
Ayon sa mga otoridad, mayroon pang tatlong biktima ng pamamaril ang nakaligtas at ngayon ay nagpapagaling na sa ospital.
Patuloy pang nagsasagawa ng imbestigasyon ang mga otoridad upang alamin kung anong grupo o miyembro ang responsable sa pagpatay sa mga biktima. —sa panulat ni Angelica Doctolero