DWIZ 882

Nilagdaan na ni Defense Secretary Delfin Lorenzana ang kasunduan para sa pagbili ng dalawang corvette ng Philippine Navy sa South Korea.

Sinaksihan ito nina AFP chief of staff General Andres Centino, Philippine Navy flag-officer-in-command Vice Admiral Adeluis Bordado at ilan pang opisyal.

Nagkakahalaga ang dalawang warship ng P28-B kung saan mayroon itong anti-ship, anti-submarine at anti-warfare capabilities.

Bibilhin ang mga barko sa Hyundai Heavy Industries (HHI) na gumawa rin sa dalawang frigate ng Navy na BRP Jose Rizal (FF-150) at BRP Antonio Luna (FF-151).

Inaasahan na mapapadali nito ang maintenance at repairs ng mga asset ng Navy.

Magiging karagdagan din ito sa corvette ng Navy na BRP Conrado Yap na mula rin sa South Korea. —ulat mula kay Jaymark Dagala (Patrol 9)

Nakapagtala ang National Disaster Risk Reduction and Management Council (NDRRMC) ng mas mataas na pinsala sa imprastraktura dahil sa pananalasa ng bagyong Odette.

Batay sa pinakahuling ulat ng NDRRMC, papalo sa 325 ang kabuuang bilang ng mga imprastraktura ang winasak ng bagyo na nagkakahalaga ng mahigit 16 na bilyong piso (16,715,334,982.11).

Nagmula sa mga rehiyon ng MIMAROPA, CENTRAL VISAYAS, EASTERN VISAYAS, NORTHERN MINDANAO, SOCCSKSARGEN at CARAGA ang mga nawasak na imprastraktura.

Aabot naman sa mahgigit 5.3 bilyong piso (5,342,538,557.25) ang naitalang pinsala sa sektor ng Agrikultura kung saan ay nasa halos 80 libong (79,452.9925) ektarya ng taniman ang napinsala habang nasa 1.7 milyon (1,174,296) ang napinsalang livestock at poultry. —sa ulat ni Jaymark Dagala (Patrol 9)

Tiyak na masisibak sa serbisyo ang sinumang pulis na masasangkot sa indiscriminate firing kasabay ng pagsalubong sa bagong taon.

Ito ang babala ni Philippine National Police (PNP) Chief P/Gen. Dionardo Carlos kasunod na rin ng insidente ng pamamaril ng 3 sundalo sa Taguig na ikinasugat ng 6 nuong araw ng Pasko.

Tulad aniya sa mga nagdaang taon, sinabi ni Carlos na wala silang balak selyuhan ang baril ng kanilang mga tauhan dahil tiwala siya sa disiplina ng mga ito.

Hamon din ng PNP Chief sa mga rehistradong nagmamay-ari ng baril na patunayang sila’y responsable sa pag-iingat ng kanilang mga armas.

Nanawagan din si Carlos sa publiko na agad ipag-bigay alam lang sa kanila kung may makikita silang nagpapaputok ng baril na hindi naman awtorisado bago habang o kahit matapos ang pagsalubong sa bagong taon. —sa ulat ni Jaymark Dagala (Patrol 9)

Paiigtingin pa ng National Capital Region Police Office (NCRPO) ang presensya ng kanilang mga tauhan kasunod ng pagsalubong sa bagong taon.

Ito’y ayon kay NCRPO Director, P/MGen. Vicente Danao Jr makaraang ipag-utos nito ang pagpapaigting ng police visibility upang matiyak na nasusunod pa rin ang mga alituntunin sa paggamit ng mga paputok.

Ani Danao, sa mga eskinita o maliliit na kalye kadalasang nakikita ang mga paglabag tuwing sumasalubong ang lahat sa bagong taon kung saan, may gumagamit pa rin ng mga iligal o ipinagbabawal na paputok.

Giit ng NCRPO Chief, hindi basta-basta maaaring gumamit ng mga paputok o pailaw sa mga eskinita o maliliit na kalye dahil maaari itong magdulot ng pinsala hindi lamang sa mga tao kungdi maging sa mga ari-arian at kabahayan.

Umaapela naman si Danao sa mga Opisyal ng Barangay na tumulong at makipagtulungan upang mapanatili pa rin ang kaayusan at kapayapaan para sa ligtas na pagsalubong sa taong 2022. —sa ulat ni Jaymark Dagala (Patrol 9)

Umabot na sa mahigit 1 milyong pamilya (1,082,910) o katumbas ng nasa 4.2 na indibidwal (4,235,400) ang labis na naapektuhan ng pananalasa ng bagyong Odette.

Batay iyan sa datos ng National Disaster Risk Reduction and Management Council (NDRRMC) mula sa may 6,115 na barangay sa 11 rehiyon sa bansa.

Partikular na rito ang MIMAROPA; BICOL; EASTERN, CENTRAL at WESTERN VISAYAS; ZAMBOANGA PENINSULA; NORTHERN MINDANAO; DAVAO; SOCCSKSARGEN; CARAGA at BARMM.

Aabot naman sa 561,459 indibiduwal ang nawalan ng bahay dahil sa bagyo kung saan ay 305, 229 dito ang tumutuloy ngayon sa may 1,201 evacuation centers.

Nasa 508,785 naman ang kabuuang bilang mga napinsalang kabahayan kung saan ay nasa 341,368 rito ang partially damaged habang nasa 167,417 naman ang hindi na talaga mapakikinabangan. —sa ulat ni Jaymark Dagala (Patrol 9)

Nadagdagan pa ng 8 ang bilang ng mga napapaulat na nasawi dulot ng pananalasa ng bagyong Odette na ngayon ay nasa 397 na.

Batay ito sa pinakahuling datos ng National Disaster Risk Reduction and Management Council (NDRRMC) kung saan 1,147 sa mga ito ang napaulat na nasugatan habang nasa 83 ang napaulat na nawawala.

Gayunman, nilinaw ng NDRRMC na mula sa naturang bilang ay nasa 59 pa lamang ang kumpirmadong nasawi, 74 ang kumpirmadong nasugatan habang 8 naman ang nawawala na may kaugnayan sa pananalasa ng bagyo.

Habang ang nalalabing bilang ay patuloy pang isinasailalim sa validation ng Office of the Civil Defense, Department of the Interior and Local Government at Department of Social Welfare and Development. —sa ulat ni Jaymark Dagala (Patrol 9)

Isa nang full pledged General o katumbas ng 4 na estrella si Armed Forces of the Philippines (AFP) Chief of Staff Andres Centino.

Ito’y matapos aprubahan ni Pangulong Rodrigo Duterte ang promosyon ni Centino at iba pang opisyal ng AFP batay na rin sa isinumiteng endorsement ni Defense Sec. Delfin Lorenzana.

Maliban kay Centino, aakyat na rin bilang 3 star o Tinyente Heneral sina Philippine Army Commanding General Romeo Brawner Jr at Philippine Air Force Commanding General Connor Anthony Canlas Sr.

Inaprubahan din ng Pangulo ang promosyon kina Northern Luzon Command Acting Commander Andrew Costello ng Army at Air Force 580th Air Control and Warning Wing Commander Augustin Malinit bilang Major General na may katumbas na 2 star Generals.

11 Opisyal din ng AFP na may ranggong Koronel ang nai-angat na ng ranggo bilang Brigidier General ng Hukbong Sandatahan ng Pilipinas. —sa ulat ni Jaymark Dagala (Patrol 9)

Bilang pakikiisa sa paggunita sa ika-125 na anibersaryo ng kabayanihan ni Gat. Jose Rizal, magkakaloob ng libreng sakay ang pamunuan ng Metro Rail Transit (MRT) line 3.

Epektibo ala-7 hanggang ala-9 ng umaga ng Disyembre a-30, Huwebes ang libreng sakay at masusundan pa ito ganap na ika-5 ng hapon hanggang ika-7 ng gabi.

Muli namang umapela sa publiko ang pamunuan ng MRT 3 na ugaliing sundin ang minimum public health and safety protocols kontra COVID-19 tulad ng maayos na pagsusuot ng facemask at pagpapanatili ng physical distancing.

Iwasan din ang pakikipag usap sa katabi maging ang pagsagot ng tawag sa cellphone upang maiwasan na rin ang posibleng hawaan ng virus.

Deklarado bilang regular holiday ang Disyembre a-30 kung saan ay walang pasok sa trabaho at mga paaralan. —sa ulat ni Jaymark Dagala (Patrol 9)

Aabot sa mahigit 67 milyong piso ang ibinahagi ng Philippine Charity Sweepstakes Office (PCSO) sa may 5 ahensya ng Pamahalaan.

Pinangunahan ni PCSO General Manager Royina Garma ang turn-over ng tseke sa mga kinatawan ng Philippine National Police (PNP), National Bureau of Investigation (NBI).

Gayundin sa Dangerous Drugs Board (DDB), Commission on Higher Education (CHED) at sa Philippine Sports Commission (PSC).

Ayon kay Garma, layunin nitong suportahan ang iba’t ibang programang pangkalusugan at medikal ng mga nabanggit na ahensya.

Nagmula ang ipinamahaging pondo sa shares o sapi ng kinita ng PCSO sa kanilang mga palaro bilang bahagi ng kanilang mandatory contributions. —sa ulat ni Jaymark Dagala (Patrol 9)