DWIZ 882

Mahigit 4,100 doses ng COVID-19 vaccines ang nasayang dahil sa epekto ng bagyong Odette.

Ayon kay Health Undersecretary Maria Rosario Vergeire, pawang nasa Regions 4-B, 6 AT 7 ang mga nasirang bakuna.

Kabilang anya sa dahilan ang kawalan ng kuryente o power outages sa mga storage facility.

May mga bakuna ring ibinalik o inililipat upang ma-assess o mabatid kung maaari pang iturok sa mga tao.

tiniyak naman ni Vergeire na nakatutok ang DOH sa sitwasyon sa mga lugar na naapektuhan ng kalamidad kabilang ang bakunahan kontra COVID-19.

Magugunitang kinansela ang vaccination activities sa ilang mga lugar na nasalanta ng bagyo. —sa panulat ni Drew Nacino

Ipinag-Utos na ni Pangulong Rodrigo Duterte ang pagkakaloob ng Service Recognition Incentive sa mga empleyado ng gobyerno na may uniform rate na P10K.

Ito’y bilang pagkilala sa lahat ng public servants sa kanilang hindi matatawarang kontribusyon sa paghahatid serbisyo sa publiko sa gitna ng COVID-19 pandemic at mga kalamidad.

Sa Administrative Order 45, kabilang sa mga makatatanggap ng nasabing halaga ang mga civilian personnel na regular, contractual o nasa casual positions, personnel na nananatili sa government service as of November 30;

Personnel na mayroong kabuuang apat na buwang satisfactory service as of November 30 at mga nasa ilalim ng alternative work arrangements na itinatakda ng Civil Service Commission;

Mga empleyado na hindi nakatanggap ng kahit na anong year-end benefit ngayong 2021 na otorisado sa ilalim ng christmas bonus, na inamiyendahan ng RA 8441;

Kahit ang mga hindi pa umaabot ng apat na buwan ang satisfactory service as of November 30 ay entitled naman sa prorated share ng S.R.I.  —sa panulat ni Drew Nacino

Magkakasa ng mock elections ang Commission on Elections (COMELEC) sa tatlumput apat na barangay bukas, Miyerkules, December 29, 2021 na magsisimula alas-siete ng umaga hanggang alas-singko ng hapon.

Sakop ng nasabing aktibidad ay ang ilang lugar sa Luzon, Visayas at Mindanao kung saan, kabilang sa mga barangay na isasama ay ang mga sumusunod:

• Sa National Capital region (NCR): tig-dalawang barangay sa Pateros, Taguig City at Pasay City.
• Sa Isabela: tig-dalawang barangay sa Cauayan City at Cordon
• Sa Albay: tig-dalawa sa Legaspi City at Pioduran
• Sa Negros Oriental: tig-dalawa sa Dumaguete City at Zamboanguita
• Sa Leyte: tig-dalawa rin sa Tacloban City, Baybay City, at Palampon
• Sa Maguindanao: tig-dalawa sa Cotabato City, Shariff Aguak at Buluan
• Sa Davao del Sur: dalawang barangay sa Digos City at dalawa rin sa barangay sa Sulop

Ayon kay COMELEC Spokesperson James Jimenez, bubuksan ng kanilang ahensya ang proceedings sa media, citizens’ arm groups, at ilang political parties.

Sinabi pa ni Jimenez na ang mga pangalan ng mga kandidato sa 2022 national and local election ang mismong nakaimprenta sa mga balotang gagamitin sa mock election at hindi nila gagamitin ang pansamantalang listahan dahil magdudulot lamang ito ng kalituhan sa bawat isa.—sa panulat ni Angelica Doctolero

Karagdagang 1, 187, 550 doses ng Pfizer-Biontech COVID-19 vaccine ang dumating na sa bansa.

Dakong alas-9 kagabi nang dumating ang panibagong bulto ng mga bakuna sa Ninoy Aquino International Airport Terminal 3, Pasay City.

Ayon kay Vaccine Czar Carlito Galvez Jr., dahil sa dagdag supply, sumampa na sa mahigit 200M doses ng bakuna ang na-i-deliver sa bansa simula noong Pebrero.

Sa katunayan anya ay sobra pa ang vaccine supply upang bakunahan ang mahigit 100M Filipinos at makapagbigay ng additional doses sa eligible individuals.  —sa panulat ni Drew Nacino

Siniguro ng Department of Budget and Management (DBM) na maipapamahagi ng pamahalaan ang anim na bilyon sa sampung bilyong pisong halaga ng pondong ipinangako ni Pangulong Rodrigo Duterte para sa mga nasalanta ng bagyo sa Visayas at Mindanao.

 Ayon kay Acting Budget Secretary Tina Rose Canda, bago matapos ang taon ay kanilang maitu-turn-over sa local LGUs ang anim na bilyong pisong halaga ng tulong para sa mga residenteng biktima ng bagyong Odette.

 Sinabi ni Canda na dalawang bilyon mula sa contingency fund ng pangulo ay nailabas na nito lamang Biyernes at Lunes habang plano pang ipamahagi sa mga local government sa linggo ang nasa apat na bilyong piso pang pondo.

 Bukod pa diyan, maglalabas pa ng karagdagang apat na bilyon ang pamahalaan sa susunod na taon na manggagaling naman sa mahigit P5 trillion pesos ng 2022 national budget sakaling lagdaan na ni pangulong duterte sa December 30. —sa panulat ni Angelica Doctolero

Nilinaw ng Department of Health na hindi pa sinisimulan ang pagbabakuna laban sa COVID-19 sa mga edad 5 hanggang 11.

Ayon kay Health Undersecretary Maria Rosario Vergeire, naghahanda pa sila para sa rollout ng COVID-19 vaccines sa nabanggit na age group.

Tinatalakay pa anya nila ang nasabing hakbang kasama ang Food and Drug Administration at mga eksperto.

Pinaalalahanan naman ng DOH ang publiko na habang naghihintay para sa COVID-19 vaccines para sa pediatric group, kumpletuhin na ang routine immunization ng mga bata laban sa ibang sakit tulad ng tigdas, rubella, tetanus at diphtheria. —sa panulat ni Drew Nacino