Pumalo na sa kabuuang 45,542 ang kabuuang bilang ng mga dinapuan ng COVID-19 sa hanay ng Philippine National Police (PNP).
Ito’y matapos na maitala ng pnp health service ang 295 na bagong kaso ng virus.
3,982 ang bilang ng mga aktibong kaso sa COVID-19.
41,435 naman ang bilang ng mga nakarekober dito.
Samantala, nananatili sa 125 ang kabuuang bilang ng mga nasawi sa COVID-19 sa PNP. —sa panulat ni Airiam Sancho
Inihayag ng Department of Health (DOH) na nasa National Capital Region (NCR) na ang community transmission ng panibagong variant ng covid-19 na omicron na tatlo hanggang limang beses na mas nakakahawa kumpara sa ibang mga variant ng nakakahawang sakit.
DOH Undersecretary Maria Rosario Vergeire, nasa 149,000 ang kasalukuyang aktibong kaso ng covid-19 sa Metro Manila kung saan, posible pa itong dumoble hanggang sa buwan ng Pebrero.
Nasa 17,124 naman ang average na naitatalang kaso ng covid-19 sa Metro Manila mula Enero A-8 hanggang 14, na malaki ang itinaas mula sa 6,500 noong unang linggo ng Enero.
Kapansin-pansin din ang pagtaas ng covid-19 indicator kabilang na sa lalawigan ng Cordillera, Central Luzon, Calabarzon, Bicol Region maging ang Western at Eastern Visayas.
Sa ngayon, nasa critical risk na ang Metro Manila, Central Luzon, Cagayan Valley, at Cordillera Region.
Dahil dito, nanawagan ang DOH sa mga local government units o lgus na tutukan ang targeted testing o iprayoridad ang pagte-test sa mga vulnerable sector at bawasan ang contact tracing sa mga lugar na may matataas na kaso ng covid-19. –Sa panulat ni Angelica Doctolero
Dinagsa ng mga deboto ang prusisyon ng Pilgrim Image ng Santo Niño sa Cebu.
Subalit dahil sa pagtaas ng kaso ng COVID-19 sanhi ng Omicron variant, isinagawa na lamang ang isang mobile procession ng banal na imahen.
Mula sa Cebu City, dumaan ang pilgrim image sa mga lungsod ng Talisay, Mandaue, at Lapu-Lapu.
Ipinagpapasalamat naman ng ilang mga deboto ng Santo Niño ang kanilang kaligtasan kahit nasira ang kanilang mga bahay dahil sa nagdaang bagyo. —sa panulat ni Airiam Sancho
Handang ma-bash ang Aktres na si Sue Ramirez sa inaabangang serye sa telebisyon na “The Broken Marriage Vow”.
Ayon sa Aktres, inaasahan niyang kakainisan ng mga pinoy ang kaniyang karakter na si Lexy Lucero na magiging kabit ni Zanjoe Marudo bilang David Ilustre at karibal ng totoong asawa na si Doctor Jill Ilustre na role ni Jodi Sta. Maria.
Sinabi pa ni Sue na sa totoong buhay ay hindi siya takot na ma-bash kung ang pagbabasehan ay ang karakter niya dahil mas magpapasalamat pa aniya siya dahil naa-appreciate ng mga tao ang kaniyang role.
Samantala, inaasahan ng aktres na tatatak ang kaniyang karakter sa mga pilipinong manonood. —sa panulat ni Airiam Sancho
Inihayag ni Justice Secretary Menardo Guevarra na nagkasa ng physical security inspection ang mga tauhan ng National Bureau of Investigation (NBI) sa warehouse ng Commission on elections (Comelec) sa Laguna kaugnay sa nangyaring hacking sa mga server ng naturang ahensya.
Ito ay kasunod ng panawagan ng komisyon sa NBI na tulungan silang alamin at imbestigahan ang umano’y data breach kung saan, nanguna sa imbestigasyon ang NBI Cybercrime Division at Special Project Team kasama ang mga kinatawan ng kumpanyang Smartmatic at mga opisyal ng Comelec.
Hawak na ngayon ng NBI ang mga dokumento mula sa Comelec upang isailalim sa validation at authentication.
Matatandaang sinabi ni Comelec Spokesman James Jimenez na ilalabas ng kanilang ahensya ang pinal na report ngayong linggo sa magiging resulta ng kanilang imbestigasyon. –Sa panulat ni Angelica Doctolero
Naglunsad ng work from home station ang ilang lugar sa Visayas kabilang na ang Mandaue, Lapu-Lapu at Talisay maging ang bayan ng Consolacion at Liloan sa Cebu City.
Layunin nitong matulungan ang mga residenteng wala paring kuryente kung saan, patuloy paring naapektuhan ang kanilang trabaho dahil sa nagdaang bagyo.
Ayon sa lokal na pamahalaan sa lugar, libre ang kuryente at internet sa mga residenteng apektado ng bagyong odette.
Kailangan lamang ipakita ang katunayan na ikaw ay nasailalim ng work from home set up katulad na lamang ng company id at certification habang sa mga free lancer, kailangang magpakita ng proof of work.
Sa ngayon, naibalik na ang 300,392 sa 474,182 na apektadong consumer sa Visayas. –Sa panulat ni Angelica Doctolero
Patay ang limang indibidwal matapos umanong kumonsumo ng nakakalasong inumin sa Nalanda, India
Batay sa imbestigasyon, tatlo ang namatay sa Manhur nang uminom ng hooch isang illegal country-made liquor habang dalawa rin ang namatay sa Chhoti Pahari kung saan ito’y kinilala na pamilya ng mga nasabing nasawi.
Samantala, patuloy ang imbestigasyon ng otoridad sa naturang insidente. —sa panulat ni Airiam Sancho
Pinataob ni Unbeaten Filipino Boxer Jade Bornea si Mohammed Obaddi sa ikatlong round ng International Boxing Federation (IBF) na ginanap sa Monterrey, Mexico.
Sa umpisa pa lamang ng laro ay kapansin-pansin na pinaulanan ni Borneo ng suntok ang kalaban.
Tumama ang uppercut nito sa 3rd round ng laban.
Dahil sa pagkapanalo, mayroon ng rekord na 17 panalo at walang talo si Borneo habang mayroong 22 panalo, dalawang talo, at 13 knockouts naman si Obaddi.
Samantala, nakahanay na si Bornea na maging katunggali sa IBF World Super Flyweight World Title na hawak ng pinoy boxer na si Jerwin Anjacas. —sa panulat ni Airiam Sancho
Nakatakdang ipamahagi ng Department of Labor and Employment ang ikatlong bugso ng cash assistance para sa mga manggagawa sa formal sector na apektado muling pagpapalawig ng alert level 3 sa Metro Manila na tatagal hanggang sa katapusan ng Enero.
Ayon sa DOLE, makakatanggap ng tig-P5,000 ang 200,000 manggagawa bago matapos ang buwan ng Enero.
Ang naturang ayuda ay katumbas ng isang bilyong pisong sa ilalim ng covid-19 adjustment measures program o camp ng pamahalaan.
Base sa datos ng DOLE, para sa unang anim na araw ng taon, 3,000 manggagawa na sa bansa ang nawalan ng trabaho sa mahigit 200 establisimyento makaraang magsara ang kanilang kumpanya habang ang iba naman ay na-retrench o naalis sa kanilang trabaho.
Samantala, sinabi naman ng ahensya na maglalaan din sila ng limampung milyong ayuda para sa mga nagtatrabaho sa tourism sector na naapektuhan ng mga restriction. –Sa panulat ni Angelica Doctolero
Magpapatupad ang mga lokal na pamahalaan sa labas ng Metro Manila ng executive order para ipatupad ang “No Vaccination, No Ride” policy sa kanilang lugar.
Ito ang inihayag ni Union of Local Authority of The Philippines President at Quirino Governor Dakila Cua kaugnay sa nabanggit na polisiya ng DOTr na nagbabawal sa mga hindi bakunado sa Metro Manila na sumakay sa pampublikong transportasyon.
Aniya, maraming lgus na ang sinisimulang mag-usap at magpanukala ng “No Vax, No Ride” policy.
Dagdag pa ni Gobernador, magkakaroon sila ng kaunting modifications sa executive order upang mai-qualify kung sino lamang ang papayagang gumamit ng naturang transportasyon.
Samanatala, sinabi ni Cua na pabor din siya sa paghihigpit sa paggalaw ng mga hindi pa bakunadong indibidwal upang mapabagal ang pagkalat ng COVID-19. —sa panulat ni Airiam Sancho