DWIZ 882

Matapos ang pinaikling quarantine, nakabalik na sa kanilang serbisyo ang halos 100 Health care workers ng Philippine General Hospital (PGH).

Ito ay makaraang maexpose sa pasyenteng nagpositibo sa COVID-19 ang mga medical personnel sa nasabing ospital na agad isinailalim sa 5-days quarantine.

Ayon kay National Task Force (NTF) against COVID-19 Medical Adviser Dr. Ted Herbosa, mas lumuwag ngayon ang ipinatutupad na quarantine ng pamahalaan sa mga nae-expose sa nakakahawang sakit dahil ang mga walang nararanasang sintomas ng COVID-19 ay papayagang makabalik sa kanilang trabaho matapos ang 5 araw na quarantine.

Ang panibagong Isolation protocols ay ipinatupad matapos humiling ang mga ospital na paikliin ang quarantine at isolation sa kanilang hanay dahil kakulangan ng mga kawani na tumutulong upang puksain ang virus sa gitna ng pandemiya.

Sa ngayon, nasa 1.1K Healthcare workers sa PGH ang nahawahan ng COVID-19 kung saan, karamihan sa kanila ay nakakaranas ng mild symptoms.  —sa panulat ni Angelica Doctolero

Asahan na bukas, Martes, January 18, 2022 hanggang January 24 ang taas-singil sa presyo ng produktong petrolyo.

Papalo sa halos P1 hanggang mahigit P2 ang dagdag singil sa presyo ng Gasolina, Diesel at Kerosene.

Ayon sa kumpaniyang UniOil, maglalaro sa P0.90 centavos hanggang P1 ang dagdag presyo sa kada litro ng Gasolina; P1.70 centavos hanggang P1.80 centavos sa Diesel; habang P2.10 centavos hanggang P2.20 centavos naman ang singil sa presyo sa kada litro ng Kerosene.

Nabatid na patuloy na naghihigpit ang supply kasabay ng pagtaas ng demand ng langis dahil sa banta ng COVID-19 at panibagong variant na Omicron sa bansa.   —sa panulat ni Angelica Doctolero

Patuloy paring makakaranas ng makulimlim na panahon na may kasamang mahihinang mga pag-ulan ang eastern section ng Luzon partikular na sa Cagayan Valley, Aurora, Quezon, at Bicol Region dahil parin sa hanging amihan.

Asahan naman ang malamig na temperatura sa Metro Manila at nalalabing bahagi pa ng Luzon lalo na sa madaling araw at posible ding magkaroon ng Isolated light rains.

Magiging maulap naman na may mahihina hanggang sa katam-tamang mga pag-ulan sa Eastern at Central Visayas maging ang buong bahagi ng Mindanao dahil sa epekto ng shearline.

Agwat ng temperatura sa Metro Manila ay maglalaro mula 21 hanggang 30 °C habang sisikat ang haring araw mamayang 6:25 ng umaga at lulubog naman ito mamayang 5:47 ng hapon. —sa panulat ni Angelica Doctolero

Inihayag ni National Task Force Against COVID-19 Medical Adviser Doctor Ted Herbosa na nakikipag-ugnayan na sila sa mga pribadong drugstores at pharmacies na payagan silang makapagbakuna sa naturang lugar kontra COVID-19.

Aniya, magkakaroon ng trial na isu-suplay sa mga botika ang mga bakuna dahil na rin sa kakulangan ng mga vaccinators.

Ipinaliwanag rin niya na ang hakbang ay dahil maraming healthcare workers sa mga ospital ang tinamaan ng COVID-19.

Samantala, tiniyak ni Herbosa na may sapat na suplay ng bakuna ang bansa kung saan umabot ito sa kabuuang 210 million COVID-19 vaccine doses noong Disyembre 2021. —sa panulat ni Airiam Sancho

Hinimok ng Land Transportation Franchising and Regulatory Board (LTFRB) ang mga drayber ng pampublikong transportasyon na i-report sa kanila ang mga enforcer na mangongotong sa simula ng pagpapatupad ng “No Vaccination, No Ride” policy sa Metro Manila bukas.

Ayon kay LTFRB Technical Division Chief Joel Bolano, hindi nila pinapayagan na abusuhin ng mga enforcer ang nasabing polisiya.

Aniya, dapat na sabihin ng mga tsuper at operator sakaling may ganito mang sitwasyon dahil bukas ang gobyerno para rito.

Samantala, magde-deploy ng mystery passenger sa pampublikong transportasyon ang DOTr upang suriin kung nasusunod ang mga protocol hinggil sa polisiya.  —sa panulat ni Airiam Sancho