DWIZ 882

Pumalo na sa 45,782 ang kabuuang bilang ng mga tinamaan ng COVID-19 sa hanay ng Philippine National Police (PNP).

Ito’y matapos madagdagan ng 310 bagong kaso ngayong araw.

Batay sa datos ng PNP Health Service, mula sa nasabing bilang ay aabot na sa 4,015 ang aktibong kaso.

Samantala, nasa 277 naman ang nadagdag sa bilang ng mga gumaling kaya’t umabot na sa 41,642 ang total recoveries.

Habang wala namang nadagdag sa bilang ng mga nasawi kaya’t nakapako pa rin ito sa 125. —ulat mula kay Jaymark Dagala (Patrol 9)

Pinaigting pa ng Philippine National Police (PNP) ang  presensya ng kanilang mga tauhan sa National Capital Region (NCR).

Ito’y kasabay na rin ng pagpapatupad ng NO VACCINATION, NO RIDE policy ng Department of Transportation o DOTr ngayong araw.

Ayon kay PNP Chief P/Gen. Dionardo Carlos, magpapakalat sila ng mga tauhan sa mga bus stop at terminal ng mga public utility vehicle (PUV’s).

Magsasagawa rin sila ng random check sa mga itinalagang border controlled points papasok at palabas ng NCR para tiyaking nasusunod ang Health Protocols.

Katuwang ang PNP ng Inter-Agency Task Force on Traffic (I-ACT),  Metro Manila Developement Authority (MMDA) at ng mga lokal na pamahalaan. —ulat mula kay Jaymark Dagala (Patrol 9)

Suportado ni Senate President Tito Sotto III ang panawagan ni  Minority Leader Franklin Drilon sa mga kapwa mambabatas na huwag hayaang maging sagabal sa pagpapasa ng mga maghahalagang panukalang batas ang Election Fever.

Ayon kay Sotto sa nalalabing 10 session days, tututukan nila ang pagpapasa sa ilang importanteng panukalang batas.

Naniniwala si Sotto na epektibong pangangampanya ang patuloy  nilang paggampan ng trabaho.

Ilan sa mga nais ni Senator Drilon na maipasa bago mag adjourn ang session sa February 4 ay ang Public Service Act, Sim Card Registration Act at Non-Expiration ng Franchise Bill.

Giit ni Drilon, mahalagang maipasa nila ang mga mahahalagang panukalang batas na  makatutulong para mapabilis ang pagbangon ng ating ekonomiya bago magsimula ang campaign period,  panukalang batas laban sa dumaraming troll account, batas na po-protekta sa solo parents at iba pa.   —ulat mula kay Cely Ortega Bueno (Patrol 19)

Imumungkahi ni Senator Nancy Binay sa Liderato ng Senado na tingnan ang posibilidad na pahusayin ang ventillation sa Session Hall.

Ito ayon kay Senator Binay ay para maging mas ligtas na lugar ang Plenary Session.

Sa ngayon kasi anya ay sobrang kulob ang session hall  kung saan wala itong maayos na ventillation o labasan ng  hangin.

Ayon  kay Binay sa kanyang tanggapan laging nakabukas ang mga bintana para nagsi-circulate ang hangin at maiwasan ang hawahan.

Ngayon araw ay balik sesyon ang mga senador pero mananatiling hybrid kung saan may mga dadalo physically at mayroong virtually.

Samantala, ngayon ay naka self-quarantine ang mister ni Senator Binay makaraang magpositibo sa COVID 19. —ulat mula kay Cely Ortega Bueno (Patrol 19)

Dapat umanong palawigin hanggang sa katapusan ng taon ang renewal ng business permits at pagbabayad ng real property tax payments sa bansa sa gitna ng patuloy na pagsirit ng kaso ng COVID-19.

Ayon kay Anti-Red Tape Authority (ARTA) Director General Jeremiah Belgica, dapat na maging sensitibo ang bansa dahil sa record breaking na bilang ng mga tinatamaan ng nakakahawang sakit.

Sinabi pa ni Belgica, na ang kalusugan ng publiko ang dapat na iprayoridad ng gobyerno sa ngayon dahil ang mga taong nagtutungo sa mga City Hall upang mag-renew ng kanilang mga Business permit at magbayad ng kanilang real Property tax ay hindi makakatulong sa pagpigil sa pagkalat ng virus.

Hinikayat din ni Belgica ang LGUs na sundin ang Republic Act No. 11032 o ang Ease of Doing Business and Efficient Government Service Delivery Act of 2018 para sa Fully Automate Business Permitting and Licensing System upang maging ligtas ang transaksiyon ng publiko at ng gobyerno sa panahon ng pandemya.   —sa panulat ni Angelica Doctolero

Pinuna ni Epidemiologist at Health Advocate Carlo Lorenzo ang target ng pamahalaan na gawing prayoridad sa COVID-19 testing ang mga vulnerable sectors habang inaayos pa ng mga opisyal ang Isolation at Testing protocols sa kabila ng tumataas na bilang ng mga tinatamaan ng virus.

Ayon kay Lorenzo, hindi makatwiran ang naging desisyon ng gobyerno dahil inuuna ng Department of Health (DOH) ang nasabing grupo na mabakunahan at ngayon ay muling ipaprayoridad sa COVID-19 testing.

Sinabi ni Lorenzo na dapat ay iprayoridad din ang iba pang nasa category lalo na ang mga hindi umano naaabot sa pagbabakuna dahil posible din silang mahawahan ng COVID-19.

Dagdag pa ni Lorenzo na masyadong maaga ang ginawang implementasyon ng DOH sa bagong Isolation at Testing protocols kung saan, ang makakaranas ng mild COVID-19 symptoms ay isasailalim sa 7-days quarantine habang ang mga hindi naman bakunado na makakaranas ng mild COVID-19 symptoms ay isasailalim naman sa 10-days quarantine.

Ang mga moderate at severe cases naman ay kailangang ihiwalay sa loob ng 10 hanggang 21 araw.  —sa panulat ni Angelica Doctolero

Napagkasunduan ng mga opisyal sa Pilipinas na bumili ng Anti-Ship Missile System na binuo ng India at Russia para ipagtanggol at depensahan ang teritoryo ng bansa.

Ayon kay Defense Secretary Delfin Lorenzana, ang nasabing Missile system ay nagkakahalaga ng halos $375-M o nasa mahigit P19-T para mapalakas ang hukbong-dagat.

Layunin nitong gawing moderno ang mga lumang sasakyan at kagamitan na kinabibilangan ng mga barkong pandigma mula sa World War II at mga helicopter na ginamit ng Estados Unidos sa Vietnam War.

Samantala, sinabi naman ng India Defence Ministry na ang Pilipinas ang kauna-unahang bansa na bibili ng nasabing system.  —sa panulat ni Angelica Doctolero

Mas mabisa at kayang labanan umano ng Johnson & Johnson COVID-19 booster shots ang panibagong variant na Omicron na 3 hanggang 5 beses na mas nakakahawa kaysa sa Delta variant.

Ayon kay South Africa Medical Research Council Head Glenda Gray, 85% epektibo ang naturang booster kung saan, kaya nitong protektahan ang isang indibidwal laban sa Omicron variant.

Sinabi ni Gray na kayang tumagal ang bisa ng naturang bakuna hanggang 2 buwan kung saan, kabilang sa pag-aaral ang 477, 234 Healthcare workers, na binakunahan ng J&J shot, kung saan 236K ang naturukan ng J&J booster shot.

Base sa Laboratory Study ng US, pinapakita dito na ang bakuna ay kayang pasiglahin at palakasin ang ating Immune system mula sa ating mga cell laban sa malubhang sakit.

Batay sa bilang ng mga Healthcare workers  na tinamaan ng COVID-19 sa ika-4 na wave nito,  nabawasan ng 63% ang bilang ng mga na-ospital na naturukan ng J&J booster sa unang dalawang linggo ng pagkakaturok nito, at hanggang 85% naman sa pagitan ng isa hanggang 2 buwan.

Ang J&J booster ay ibinibigay sa pagitan ng 6 at 9 na buwan pagkatapos ng unang dose ng bakuna.  —sa panulat ni Angelica Doctolero

Kinumpirma ng Philippine National Police (PNP) na umabot na sa 144 ang kabuuang bilang ng mga inarestong violator sa gitna ng implementasyon ng Election Gun ban sa buong bansa.

Ayon kay PNP Chief P/Gen. Dionardo Carlos, kasunod ito ng  pagsisimula ng 2022 Election period noong January 9 kung saan, sa isinagawang 126 na operasyon, nakumpiska ang 121 baril.

Base sa Resolusyon ng Commission on Election (COMELEC), sakop ng Ban ang pagdadala at pagbibiyahe ng firearms o deadly weapons sa lahat ng pampublikong lugar hanggang June 8.

Matatandaang simula nitong January 9, nagtalaga ng mga tauhan ang PNP sa 18,978 checkpoints sa buong bansa upang ipatupad ang COMELEC Gun ban.

Ang mga mahuhuling lalabag sa Gun ban ay maaaring makulong ng hindi bababa sa 1 taon hanggang 6 na taon.   —sa panulat ni Angelica Doctolero

Nagbabala sa publiko ang Land Transportation Franchising and Regulatory Board (LTFRB) kaugnay sa mga gumagamit ng pekeng Vaccination cards kasunod ng implementasyon ng “No vaccination, No ride” policy ng Department of Transportation (DOTr) na sisimulan ngayong araw, January 17.

Ayon kay LTFRB-NCR Director Zona Tamayo, tanging ang mga vaccinated individual at mga hindi pa nabakunahan pero may Barangay Health Pass o Medical Certificate ang papayagang sumakay sa mga pampublikong sasakyan sa Metro Manila.

Sinabi pa ni Tamayo na itinuturing na Criminal Offense ang paglabag sa naturang panukala kung saan, mahaharap sa parusa ang mga violator.

Pagmumultahin mula P500 hanggang P5K o maaaring makulong ng hanggang 6 na buwan habang bibigyan naman ng warning o babala ang mahuhuli sa unang linggo ng bagong patakaran.  —sa panulat ni Angelica Doctolero