DWIZ 882

Nakahanda ang Metropolitan Manila Development Authority (MMDA) na tumulong sa Department of Transportation (DOTr) para sa unang araw ng implementasyon ng ‘No Vaxx, No Ride’ Policy.

Ayon kay MMDA Chairman Benhur Abalos, sumulat sa kanilang tanggapan si Transportation Secretary Art Tugade na humihiling na tulungan sila sa pagpapatupad ng naturang polisiya.

Layunin anya ng nasabing polisiya na protektahan ang mga hindi bakunado laban sa matinding epekto ng COVID-19 at hindi para gipitin o tanggalan sila ng karapatan.

Simula ngayong araw ay bawal nang sumakay sa anumang public transportation ang mga unvaccinated individuals sa Metro Manila, maliban na lamang kung bibili sila ng pagkain o gamot at kung mayroong medical reason.  —sa panulat ni Mara Valle

Kalaboso ang mag-asawa na tulak ng iligal na droga matapos ang buy-bust operation sa Caloocan City.

Kinilala ang mga suspek na si Mark Anthony Diwa alyas “bolok”, 40 anyos at Meriam Mariano alyas “yampot”, 29 anyos.

Ayon sa Caloocan City Police, narekober sa mag-asawa ang nasa 11 grams ng shabu na nagkakahalaga ng P74,800 at P500 marked money.

Nahaharap ang mga suspek sa kasong paglabag sa RA 9165 o Comprehensive Dangerous Drug Act of 2002. —sa panulat ni Mara Valle

Hinihikayat ang lahat ng fully vaccinated individuals na gumaling matapos mahawaan ng COVID-19, na agad magpabooster.

Ayon kay Health Undersecretary Maria Rosario Vergeire, kapag nawala na ang sintomas at natapos na ang isolation period ay maaari nang tumanggap agad ng booster ang sinumang nakakumpleto na ng 1^st at 2^nd dose.

Alinsunod sa IATF Resolution, ang sinumang tinamaan ng mild symptoms, healthcare worker man o hindi, ay kailangang mag-isolate ng 7 araw mula sa dating 10 araw.

Mahalaga anya ang agarang pagpapaturok ng booster upang magkaroon muli ng proteksyon laban sa COVID-19 lalo’t hindi nawawala ang banta ng re-infection. —sa panulat ni Mara Valle

Nangako si Partido Federal ng Pilipinas (PFP) standard-bearer Ferdinand ‘Bongbong’ Marcos, Jr. na buo niyang susuportahan ang National Task Force to End Local Communist (NTF-ELCAC) sa laban nito para wakasan ang kaguluhan.

Maliban dito, tiniyak rin ni Marcos ang dagdag na pondo, kung siya ang mananalo sa darating na halalan.

Matatandaang binatikos ni Marcos ang desisyon ng Senate Finance Committee na bawasan ang pondo ng NTF-ELCAC, dahil aniya ay baka masayang lamang ang mga tagumpay na natamo ng pamahalaan sa pagsugpo ng insurgency.

Pinuri rin ni Marcos ang mahusay na pagganap ng Anti-Insurgency Body sa kanilang tungkulin kahit pa nabawasan ng P4-B ang kanila sanang P28.12-B na pondo ngayong taon.

Iginiit pa ng dating senador  ang mahalagang papel ng NTF-ELCAC sa pagbibigay ng tulong pangkabuhayan sa mga rebel returnees at ang pagkakaloob ng pagkakataong muli silang mapabilang sa lipunan bilang mabuting mamamayan.

Nangako rin si Marcos na kanyang bibigyan ng dagdag suporta ang Support to Barangay Development Program ng Task Force na naglalayon na makapagbigay ng P20-M sa mga komunidad na napalaya ng pamahalaan sa kamay ng mga komunistang grupo.

Arestado ang isang sundalo at 14 na iba pa dahil sa Tupada sa Taguig City.

Kinilala ng Southern Police District ang naarestong sundalong si Francisco Serdan, 30 anyos.

Narekober mula sa sundalo ang isang sling bag na naglalaman ng calibre 45 pistol, dalawang magazine at apat na bala.

Bukod sa iligal na sugal, mahaharap din si Serdan sa kasong paglabag sa umiiral na election gun ban.

Kabilang din sa mga nasakote sa iligal na sabungan sina Roy Moreno, Jed Jomoc, Julian Bogtong at Jovanni Vibal na pawang mga edad 25 hanggang 70 anyos.  —sa panulat ni Mara Valle

Tinatayang P680,000 na halaga ng shabu ang narekober sa buy-bust operation ng Northern Police District at District Drug Enforcement Unit mula sa dalawang suspek sa Caloocan City.

Kinilala ang mga suspek na sina Paul Llacer, 26-anyos at Marlon Mendoza, 25-anyos.

Narekober din sa dalawa ang P7,500  na buy-bust money, isang sachet ng shabu, itim na belt bag at motorsiklo.

Nahaharap ang mga suspek sa kasong paglabag sa Republic Act 9165 o Comprehensive Dangerous Drugs Act of 2002.  —sa panulat ni Mara Valle

Arestado ang isang pulis matapos gahasain ang 17-anyos na babae sa Quezon City.

Kinilala ang suspek na si Chief Master Sergeant Galahad Altarejos 18-anyos.

Ayon kay Lt. Col. Alex Sonido, hepe ng QCPD-Station 10,  kakasara lamang ng karinderya ng tiyahin ng biktima kung saan suki ang suspek nang magboluntaryo itong ihatid ang mag-tiyahin sa kanilang bahay.

Dito na umano nagkaroon ng pagkakataon si Altarejos na halayin ang dalagita.

Nang pasukin ng tiyahin ang kwarto ng biktima ay nakita niya na lamang itong walang saplot at agad nagsumbong sa mga otoridad. —sa panulat ni Mara Valle